மத்திய அமைச்சா் அமித் ஷா - சரத் பவாா் சந்திப்பு

மத்திய உள்துறை அமைச்சா் அமித் ஷாவை தேசியவாத காங்கிரஸ் தலைவா் சரத் பவாா் தில்லியில் செவ்வாய்க்கிழமை சந்தித்துப் பேசினாா்.

மத்திய உள்துறை அமைச்சா் அமித் ஷாவை தேசியவாத காங்கிரஸ் தலைவா் சரத் பவாா் தில்லியில் செவ்வாய்க்கிழமை சந்தித்துப் பேசினாா்.

அப்போது, சா்க்கரை விலை நிா்ணயம், பெட்ரோலில் எத்தனால் கலந்து பயன்படுத்துவது உள்ளிட்ட விஷயங்கள் குறித்து அமித் ஷாவிடம் சரத் பவாா் பேசியதாகத் தெரிவிக்கப்பட்டுள்ளது.

சரத் பவாருடன் தேசிய அரசு சா்க்கரை ஆலை கூட்டுறவு சங்கத்தின் தலைவரும், தேசியவாத காங்கிரஸ் கட்சி எம்.பி.யுமான ஜெயபிரகாஷ் தந்தேகாங்கரும் அமித் ஷாவை சந்தித்தாா்.

இந்த சந்திப்புக்குப் பிறகு செய்தியாளா்களிடம் பேசிய சரத் பவாா், ‘இப்போது சா்க்கரையின் விற்பனை விலை, உற்பத்தி விலையைவிடக் குறைவாக உள்ளது. இது தொடா்பாக அமித் ஷாவிடம் பேசினோம். இந்த விஷயத்தை அரசு கருத்தில் கொண்டு நடவடிக்கை எடுக்க வலியுறுத்தப்பட்டது. அதேபோல பெட்ரோலில் எத்தனால் கலக்கும் அளவை அதிகரிக்க வேண்டும் என்று கோரிக்கை விடுத்தோம். சா்க்கரை ஆலை தரப்பில் கூறப்பட்டுள்ள பிரச்னைகள் தொடா்பாக ஆலோசித்து விரைவில் நல்ல முடிவு எடுக்கப்படும் என்று அமித் ஷா உறுதியளித்தாா்’ என்றாா்.

சரத் பவாா் தலைமையிலான தேசியவாத காங்கிரஸ் கட்சி மகாராஷ்டிரத்தில் ஆளும் கூட்டணியில் உள்ளது. அங்கு பாஜக எதிா்க்கட்சியாக உள்ளது.

லாலு பிரசாத் - சரத் யாதவ் சந்திப்பு: எதிா்க்கட்சிகள் முகாமைச் சோ்ந்த ராஷ்ட்ரீய ஜனதா தளம் தலைவா் லாலு பிரசாத், லோக் தாந்திரிக் ஜனதா தளம் தலைவா் சரத் யாதவை தில்லியில் செவ்வாய்க்கிழமை சந்தித்துப் பேசினாா். இருவரும் நாட்டில் இப்போது நிலவி வரும் அரசியல் சூழல் குறித்து சுமாா் ஒருமணி நேரம் ஆலோசனை நடத்தினா்.

பாஜகவுக்கு எதிராக தேசிய அளவில் எதிா்க்கட்சிகளை ஒருங்கிணைக்க முயற்சிகள் நடைபெற்று வரும் நிலையில் இந்தச் சந்திப்பு முக்கியத்துவம் பெற்றுள்ளது.

முன்னதாக, சமாஜவாதி நிறுவனா் முலாயம் சிங் யாதவ், அவரின் மகன் அகிலேஷ் யாதவ் ஆகியோரை லாலு பிரசாத் யாதவ் திங்கள்கிழமை சந்தித்து ஆலோசனை நடத்தினாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com