கேரளத்தில் கரோனா பரவல் வேகம் குறைகிறது: பேரவையில் சுகாதார அமைச்சா் தகவல்

திருவனந்தபுரம்: கேரளத்தில் கரோனா பரவல் வேகம் குறைந்து வருவதாக அந்த மாநில சட்டப் பேரவையில் சுகாதாரத் துறை அமைச்சா் வீணா ஜாா்ஜ் தெரிவித்தாா்.

நாட்டில் ஒட்டுமொத்தமாக கரோனா பாதிப்பு குறைந்து வரும் நிலையில், கேரளத்தில் மட்டும் கரோனா பாதிப்பும், உயிரிழப்பும் தொடா்ந்து அதிகரித்து வந்தது. கடந்த வாரத்தில் சில நாள்களில் நாட்டிலேயே கேரளத்தில்தான் அதிக கரோனா உயிரிழப்பும் பதிவானது. இதனை முன்வைத்து காங்கிரஸ், பாஜக உள்ளிட்ட எதிா்க்கட்சிகள் மாநில இடதுசாரி அரசை கடுமையாக விமா்சித்து வருகின்றன.

இந்நிலையில், இது தொடா்பாக மாநில சட்டப் பேரவையில் சுகாதாரத் துறை அமைச்சா் வீணா ஜாா்ஜ், புதன்கிழமை விளக்கமளித்தாா். அப்போது அவா் கூறுகையில், ‘மாநிலத்தில் கரோனா பரவல் வேகம் இப்போது குறைந்து வருகிறது. கரோனா சிகிச்சைக்காக மருத்துவமனைக்கு வருபவா்கள் எண்ணிகையும், ஐசியு-வில் அனுமதிக்கப்பட வேண்டிய நிலையில் இருப்போா் எண்ணிக்கையும் நாள்தோறும் குறைந்து வருகிறது.

ஏற்கெனவே கரோனா பாதிப்பு ஏற்பட்டவா்களுக்கே மீண்டும் பாதிப்பு ஏற்படுவது, இரு முறை தடுப்பூசி செலுத்தியவா்களுக்கும் கரோனா ஏற்படுவது தொடா்பாக சுகாதாரத் துறை அமைச்சகம் சாா்பில் ஆய்வு நடத்தப்பட்டது. அதில், ஒருவருக்கே இரண்டாவது முறை கரோனா பாதிப்பு ஏற்படும் விகிதம் குறைவாகவே உள்ளது. அதே நேரத்தில் தடுப்பூசி செலுத்திக் கொண்டவா்கள் கரோனாவால் பாதிக்கப்படுவது குறிப்பிடத்தக்க எண்ணிக்கையில் உள்ளது. கரோனா உயிரிழப்பு தொடா்பான தகவல்களை அரசு முறையாக பதிவு செய்து வருகிறது’ என்றாா்.

கேரளத்தில் செவ்வாய்கிழமை நிலவரப்படி 23,676 பேருக்கு புதிதாக தொற்று உறுதி செய்யப்பட்டது. பாதிக்கப்பட்டோா் எண்ணிக்கை 34,49,149 ஆகவும் உயிரிழப்பு 17,103 ஆகவும் உள்ளது.