நாடாளுமன்ற அவை நடவடிக்கைகளை சீா்குலைக்கும் வகையில் நடந்து கொண்ட எம்.பி.க்கள் மீது தகுந்த நடவடிக்கை மேற்கொள்ளப்பட வேண்டும் என்று மாநிலங்களவைத் தலைவா் வெங்கையா நாயுடுவும் மக்களவைத் தலைவா் ஓம் பிா்லாவும் தெரிவித்துள்ளனா்.
நாடாளுமன்றத்தின் மழைக்கால கூட்டத்தொடா் கடந்த மாதம் 19-ஆம் தேதி தொடங்கியது. பெகாஸஸ் உளவு விவகாரம், வேளாண் சட்டங்கள் விவகாரம், பெட்ரோல், டீசல் விலை உயா்வு விவகாரம் உள்ளிட்டவற்றை எழுப்பி காங்கிரஸ், திரிணமூல் காங்கிரஸ், சமாஜவாதி, பகுஜன் சமாஜ், மாா்க்சிஸ்ட் கம்யூனிஸ்ட், இந்திய கம்யூனிஸ்ட் உள்ளிட்ட எதிா்க்கட்சிகள் தொடா் அமளியில் ஈடுபட்டன.
சில எம்.பி.க்கள் காகிதங்களைக் கிழித்து வீசியெறிந்தனா். அவையின் மையப் பகுதிக்கு பதாகைகளுடன் வந்து எம்.பி.க்கள் கோஷங்களை எழுப்பினா். மத்திய அமைச்சா்கள் பேசும்போது அவா்களுக்கு முன் பதாகைகளைப் பிடித்தவாறு முழக்கமிட்டனா்.
அதன் காரணமாக மக்களவை, மாநிலங்களவை நடவடிக்கைகள் முடங்கின. கூட்டத்தொடா் திட்டமிட்டதற்கு முன்பே கடந்த புதன்கிழமை முடித்துக் கொள்ளப்பட்டது. இந்நிலையில், மக்களவைத் தலைவா் ஓம் பிா்லா, மாநிலங்களவைத் தலைவரும் குடியரசு துணைத் தலைவருமான வெங்கையா நாயுடுவை வியாழக்கிழமை சந்தித்துப் பேசினாா்.
இது தொடா்பாக குடியரசு துணைத் தலைவா் அலுவலகம் சாா்பில் வெளியிடப்பட்ட சுட்டுரைப் பதிவில், ‘நாடாளுமன்ற மழைக்காலக் கூட்டத்தொடரின்போது அவைகளில் நிகழ்ந்த துரதிருஷ்டவசமான சம்பவங்கள் குறித்து அவைத் தலைவா்கள் ஆய்வு செய்து ஆலோசனை மேற்கொண்டனா்.
கூட்டத்தொடரின்போது சில எம்.பி.க்கள் அவையின் மாண்பை சீா்குலைக்கும் வகையில் நடந்து கொண்டதை ஏற்றுக் கொள்ள முடியாது என்று அவா்கள் தெரிவித்தனா். அவா்கள் மீது தகுந்த நடவடிக்கை எடுக்கப்பட வேண்டுமெனவும் அவா்கள் முடிவெடுத்தனா்’ என்று குறிப்பிடப்பட்டுள்ளது.
முன்னதாக, மாநிலங்களவைத் தலைவா் வெங்கையா நாயுடுவை சந்தித்த மத்திய அமைச்சா்கள், அவையில் முறையின்றி நடந்து கொண்ட எம்.பி.க்கள் மீது நடவடிக்கை எடுக்க வேண்டுமென வலியுறுத்தியிருந்தனா்.