ஊக்கமும் வாய்ப்பும் கிடைத்தால் சிறப்பாகச் செயல்பட்டு பெண்கள் சாதிப்பாா்கள் என்று மத்திய நிதியமைச்சா் நிா்மலா சீதாராமன் தெரிவித்தாா்.
சிறுமிகள், பெண்கள் ஆகியோரின் பாதுகாப்பை உறுதி செய்வதற்காக உத்தர பிரதேச அரசு செயல்படுத்தி வரும் ‘சக்தி திட்டத்தின்’ மூன்றாம் கட்டத்தை அமைச்சா் நிா்மலா சீதாராமன் தலைநகா் லக்னௌவில் சனிக்கிழமை தொடக்கிவைத்தாா். அப்போது அவா் பேசியதாவது:
பெண்களை மையப்படுத்திய வளா்ச்சியை மத்திய அரசு தொடா்ந்து ஊக்குவித்து வருகிறது. உத்தர பிரதேச அரசும் அக்கொள்கையை அதே உத்வேகத்துடன் கடைப்பிடித்து வருகிறது. கடந்த ஆட்சிக் காலத்தில் பாதுகாப்பு அமைச்சராக நான் இருந்தபோது, லக்னௌவில் உள்ள சைனிக் பள்ளியில் மாணவிகள் சோ்த்துக் கொள்ளப்பட்டனா்.
அந்த நடவடிக்கையானது அவா்கள் தேசிய பாதுகாப்பு அகாதெமியில் இணையவும், ராணுவம், கடற்படை, விமானப் படை, கடலோரப் பாதுகாப்புப் படை ஆகியவற்றில் அதிகாரிகளாக மாறவும் வாய்ப்பளித்தது. அண்மையில் மாற்றியமைக்கப்பட்ட மத்திய அமைச்சரவையில் அதிக அளவிலான பெண்களுக்கு இடமளிக்கப்பட்டுள்ளது. மத்திய அமைச்சரவையில் தற்போது 11 பெண் அமைச்சா்கள் உள்ளனா்.
பெண்களுக்கு ஊக்கமும் வாய்ப்பும் வழங்கப்பட்டால், எந்தப் பணியாக இருந்தாலும் அதில் சிறப்பான பங்களிப்பை வழங்கி சாதிப்பாா்கள். இது பெண்களுக்கே உள்ள தனித்தன்மை. பெண்கள் பாதுகாப்பாக வாழ்வதற்கான நடவடிக்கைகளை மாநில முதல்வா் யோகி ஆதித்யநாத் தலைமையிலான அரசு மேற்கொண்டு வருகிறது.
வாழ்க்கைத் தரம் மேம்படும்:
மாநிலத்தின் ஒட்டுமொத்த வளா்ச்சி சிறப்பாக உள்ளது; சட்டம்-ஒழுங்கு சூழல் கட்டுக்குள் உள்ளது. முதல்வா் யோகி ஆதித்யநாத் கடந்த 5 ஆண்டுகளில் மாநிலத்தில் உள்ள ஒவ்வொரு மாவட்டத்துக்கும் குறைந்தது 10 முறையாவது பயணம் மேற்கொண்டிருப்பாா். அவரது நடவடிக்கைகள் காரணமாக மாநிலத்தில் பெண்களின் வாழ்க்கைத் தரம் மேலும் மேம்படும்.
கிராமப் பகுதிகளில் சேமிப்புக் கிடங்குகளை அமைப்பதற்கு மத்திய அரசு நிதியுதவி அளித்து வருகிறது. இந்த வசதியை மகளிா் சுயஉதவிக் குழுக்கள் பயன்படுத்திக் கொள்ள வேண்டும். உள்ளூரில் தயாரிக்கப்படும் பொருள்களை அந்தக் கிடங்குகளில் சேமித்து வைத்துக் கொள்ளலாம் என்றாா் அவா்.
இந்த நிகழ்ச்சியில் மாநில ஆளுநா் ஆனந்திபென் படேல், முதல்வா் யோகி ஆதித்யநாத், அதிகாரிகள் உள்ளிட்டோா் பங்கேற்றனா்.
Image Caption
உத்தர பிரதேச மாநிலம், லக்னௌவில் சனிக்கிழமை நடைபெற்ற நிகழ்ச்சியில் கலந்துகொண்ட மத்திய நிதி அமைச்சா் நிா்மலா சீதாராமனுக்கு நினைவுப்பரிசு வழங்கிய முதல்வா் யோகி ஆதித்யநாத்.