நாகாலாந்து துப்பாக்கிச் சூடு: காங்கிரஸ் குழு அமைப்பு

நாகாலாந்து ராணுவ துப்பாக்கிச் சூடு சம்பவம் குறித்து அறிக்கை தாக்கல் செய்ய 4 பேர் கொண்ட குழுவை காங்கிரஸ் திங்கள்கிழமை அமைத்தது.

நாகாலாந்தில் ராணுவத்தினர் நடத்திய மூன்று துப்பாக்கிச் சூடு சம்பவங்களில் பொதுமக்கள் 14 பேர் பலியாகினர். இதுதொடர்பாக விசாரிக்க 5 பேரைக் கொண்ட சிறப்புப் புலனாய்வுக் குழுவை மாநில அரசு அமைத்துள்ளது.

இந்த சம்பவம் தவறுதலாக நடந்துவிட்டதாக மத்திய உள்துறை அமைச்சர் அமித் ஷா நாடாளுமன்றத்தில் திங்கள்கிழமை விளக்கமளித்தார்.

இதையும் படிக்க | ‘நாகலாந்து சம்பவத்திற்கு மன்னிப்பு கோரியது ராணுவம்’: மக்களவையில் அமித் ஷா

அவரது விளக்கம் திருப்தியளிக்கும் வகையில் இல்லை எனக் கூறி திமுக உள்ளிட்ட எதிர்க்கட்சிகள் மக்களவையிலிருந்து வெளிநடப்புச் செய்தன. 

இந்த நிலையில், சம்பவம் குறித்து அறிக்கை தாக்கல் செய்ய 4 பேர் கொண்ட குழுவைக் காங்கிரஸ் அமைத்துள்ளது. இந்தக் குழுவானது நாகாலாந்து சென்று சம்பவம் தொடர்பாக ஆய்வு நடத்தி ஒரு வாரத்தில் காங்கிரஸ் தலைவரிடம் அறிக்கை சமர்ப்பிக்கவுள்ளது.

குழுவில் இடம்பெற்றுள்ளவர்கள்:

• ஜிதேந்திர சிங், காங்கிரஸ் பொதுச்செயலாளர்
• அஜோய் குமார், நாகாலாந்து மேலிடப் பொறுப்பாளர்
• கௌரவ் கோகோய், எம்.பி.
• ஆண்டோ ஆண்டனி, எம்.பி.