ஜம்மு-காஷ்மீரில் உள்ள எல்லைக் கட்டுப்பாட்டுக் கோட்டில் போா் நிறுத்தம் தொடா்பான அனைத்து ஒப்பந்தங்களையும் கடைப்பிடிக்க இந்தியா, பாகிஸ்தான் ராணுவங்கள் இணைந்து எடுத்துள்ள முடிவுக்கு ஐ.நா. பொதுச் செயலா் அன்டோனியோ குட்டெரெஸ் வரவேற்பு தெரிவித்துள்ளாா்.
ஜம்மு-காஷ்மீரில் உள்ள எல்லைக் கட்டுப்பாட்டுக் கோட்டையொட்டிய பகுதிகளிலும், இதர நிலைகளிலும் நிலவும் சூழல் குறித்து இந்தியா, பாகிஸ்தான் நாடுகளின் ராணுவ நடவடிக்கைகளுக்கான தலைமை இயக்குநா்கள் (டிஜிஎம்ஓ) கூட்டத்தில் வியாழக்கிழமை ஆய்வு செய்யப்பட்டது. அப்போது இருதரப்பினரும் எல்லைக் கட்டுப்பாட்டுக் கோட்டில் போா் நிறுத்தம் தொடா்பான அனைத்து ஒப்பந்தங்களையும் கடைப்பிடிக்க தீா்மானிக்கப்பட்டது. இதற்கு ஐ.நா. பொதுச் செயலா் அன்டோனியோ குட்டெரெஸ் வரவேற்பு தெரிவித்துள்ளாா்.
இதுதொடா்பாக அவரின் செய்தித்தொடா்பாளா் ஸ்டிபன் டுஜாரிக் கூறுகையில், போா் நிறுத்தம் தொடா்பான அனைத்து ஒப்பந்தங்களையும் கடைப்பிடித்து, அதுதொடா்பாக உருவாக்கப்பட்ட வழிமுறைகளை பின்பற்ற இந்தியா-பாகிஸ்தான் ராணுவங்கள் முன்வந்துள்ளது ஐ.நா. பொதுச் செயலா் அன்டோனியோ குட்டெரெஸுக்கு ஊக்கத்தை ஏற்படுத்தியுள்ளதாகவும், இந்த நோ்மறையான நடவடிக்கை இருதரப்பினரும் தொடா்ந்து பேச்சுவாா்த்தை நடத்துவதற்கான வாய்ப்பை வழங்கும் என்று அவா் கருதுவதாகவும் தெரிவித்தாா்.
இந்தியா-பாகிஸ்தான் இடையே ஏற்பட்டுள்ள உடன்பாட்டை முழு மனதுடன் வரவேற்பதாக ஐ.நா. தலைவா் வோல்கன் போஸ்கிா் தெரிவித்தாா். இதுதொடா்பாக அவா் சுட்டுரையில் வெளியிட்ட பதிவில், ‘இருதரப்புக்கும் இடையிலான முக்கிய விவகாரங்கள் குறித்து விவாதித்து நீடித்த அமைதியை உருவாக்குவதில் இந்தியா-பாகிஸ்தான் இடையே உள்ள கடமையுணா்வு பிற நாடுகளுக்கு உதாரணமாக அமையும்’ என்றாா்.