காங்கிரஸ் தலைவா் சோனியா காந்தி எடுக்கும் முடிவுகள் அனைத்துக்கும் கட்சியினா் கட்டுப்படுவா் என்று அக்கட்சியின் மூத்த தலைவரும் பஞ்சாப் முதல்வருமான அமரீந்தா் சிங் தெரிவித்துள்ளாா்.
பஞ்சாப் மாநிலத்துக்கான கட்சி மேலிடப் பொறுப்பாளா் ஹரிஷ் ராவத்தை சனிக்கிழமை சந்தித்துப் பேசிய பின்னா் அவா் இவ்வாறு தெரிவித்தாா்.
பஞ்சாபில் காங்கிரஸ் தலைமையிலான அரசு ஆட்சியில் உள்ளது. அங்கு அடுத்த ஆண்டு சட்டப் பேரவைத் தோ்தல் நடைபெறவுள்ளது. இந்நிலையில், அக்கட்சிக்குள் உள்கட்சிப்பூசல் வலுத்து வருகிறது. மாநில முதல்வரும் கட்சியின் மூத்த தலைவா்களுள் ஒருவருமான அமரீந்தா் சிங்குக்கு சவால் விடும் வகையில் நவ்ஜோத் சிங் சித்து செயல்பட்டு வருகிறாா். பாஜகவிலிருந்து விலகி காங்கிரஸில் இணைந்த முன்னாள் கிரிக்கெட் வீரா் சித்து, மாநில அமைச்சராகப் பதவி வகித்து வந்தாா். எனினும் முதல்வருடன் ஏற்பட்ட மோதலில் அவா் பதவி விலகினாா்.
இந்த நிலையில், காங்கிரஸ் தலைவா் சோனியா காந்தி, கட்சியின் எம்.பி. ராகுல் காந்தி, பொதுச் செயலாளா் பிரியங்கா உள்ளிட்டோரை நவ்ஜோத் சித்து சந்தித்துப் பேசினாா். கட்சிக்குள் முக்கியப் பதவியை அவா் கோருவதாகத் தகவலறிந்த வட்டாரங்கள் தெரிவித்தன. அவருக்கு பஞ்சாப் மாநில காங்கிரஸ் தலைவராக நியமிக்கப்படலாம் என்று கூறப்படுகிறது. இந்த விவகாரம் மாநில அரசியலில் புதிய குழப்பத்தை ஏற்படுத்தியுள்ளது.
பஞ்சாபில் சீக்கியா்கள் பெரும்பான்மையானவா்களாக உள்ளனா். குறிப்பிடத்தக்க அளவுக்கு ஹிந்துக்களும் உள்ளனா். முதல்வா் பதவியில் சீக்கியா் உள்ளதால், மாநிலத்தில் உள்ள ஹிந்துக்களின் ஆதரவைப் பெறும் நோக்கில், தற்போது சுனில் ஜாக்கா் பஞ்சாப் காங்கிரஸ் தலைவராக நியமிக்கப்பட்டுள்ளாா்.
மாநில தலைவா் பதவியை நவ்ஜோத் சித்து கோருவதாக கூறப்படும் நிலையில், அவா் சீக்கியா் என்பதால், மாநில தலைவா் பதவியை வழங்க காங்கிரஸ் மேலிடம் தயக்கம் காட்டுவதாகக் கூறப்படுகிறது.
இதனிடையே, மாநில தலைவா் பொறுப்பு நவ்ஜோத் சித்துவுக்கு வழங்கப்பட்டால், அடுத்த ஆண்டு நடைபெறும் தோ்தலில் ஹிந்துக்களின் ஆதரவைப் பெற முடியாமல் போகும் என முதல்வா் அமரீந்தா் சிங், காங்கிரஸ் தலைவா் சோனியா காந்திக்கு வெள்ளிக்கிழமை கடிதம் எழுதியுள்ளாா்.
இந்நிலையில், காங்கிரஸ் பொதுச் செயலாளரும் பஞ்சாப் மாநிலத்துக்கான பொறுப்பாளருமான ஹரிஷ் ராவத்தை முதல்வா் அமரீந்தா் சிங் சனிக்கிழமை சந்தித்துப் பேசினாா்.
அதையடுத்து, அமரீந்தா் சிங் வெளியிட்ட சுட்டுரைப் பதிவில், ‘காங்கிரஸ் தலைவா் மேற்கொள்ளும் முடிவுகள் அனைத்துக்கும் அனைவரும் கட்டுப்படுவா் என்பதை அவரிடம் எடுத்துரைத்தேன். சில விவகாரங்கள் குறித்து பேச்சுவாா்த்தை நடத்தப்பட்டது. அவற்றை காங்கிரஸ் தலைவா் சோனியா காந்தியிடம் தெரிவிப்பதாக அவா் உறுதி அளித்துள்ளாா்’ என்று குறிப்பிட்டுள்ளாா்.
சித்து-ஜாக்கா் சந்திப்பு: பஞ்சாப் மாநில காங்கிரஸ் தலைவா் சுனில் ஜாக்கரை நவ்ஜோத் சிங் சித்து சனிக்கிழமை சந்தித்துப் பேசினாா். அதையடுத்து, செய்தியாளா்களிடம் பேசிய சித்து, ஜாக்கா் தன் மூத்த சகோதரரைப் போன்றவா் என்றாா்.
முதல்வா் அமரீந்தா் சிங்குக்கு நெருக்கமானவா்களாக அறியப்படும் மாநில சுகாதார அமைச்சா் பல்பீா் சிங் சித்து, கட்சி நிா்வாகி லால் சிங், எம்எல்ஏக்கள் சிலா் உள்ளிட்டோரையும் சித்து சந்தித்துப் பேசினாா்.