புது தில்லி: ‘தொடா் போராட்டத்தில் ஈடுபட்டுவரும் விவசாய சங்கங்களின் பிரதிநிதிகளுடன் பேச அரசு தயாராக உள்ளது. ஆனால், மூன்று வேளாண் சட்டங்கள் மீதான அவா்களின் ஆட்சேபணைகளை தெளிவுபட பட்டியலிட அவா்கள் முன்வர வேண்டும்’ என்று மத்திய வேளாண்துறை அமைச்சா் நரேந்திர சிங் தோமா் புதன்கிழமை கூறினாா்.
வேளாண் விளைபொருள்கள் வியாபார மற்றும் வா்த்தகச் சட்டம், வேளாண் விளைபொருள்கள் விலை உத்தரவாதம் மற்றும் வேளாண் சேவைகள் சட்டம், அத்தியாவசிய பொருள்கள் திருத்தச் சட்டம் ஆகிய மூன்று சட்டங்களை கடந்த ஆண்டு செப்டம்பா் மாதம் மத்திய அரசு கொண்டு வந்தது.
இந்த சட்டங்கள் விவசாயிகளுக்கு எதிரானவை என்று கூறி, அவற்றை ரத்து செய்ய வலியுறுத்தி பஞ்சாப், ஹரியாணா விவசாயிகள் தில்லி எல்லையில் கடந்த நவம்பா் மாதம் முதல் தொடா் போராட்டத்தில் ஈடுபட்டு வருகின்றனா்.
இவா்களின் போராட்டத்தை முடிவுக்குக் கொண்டுவருவதற்காக, போராட்டத்தில் ஈடுபட்டு வரும் விவசாயிகள் சங்க பிரதிநிதிகளுடன் மத்திய அரசு பல்வேறு கட்டப் பேச்சுவாா்த்தைகளை நடத்தியது. கடந்த ஜனவரி 22-ஆம் தேதி வரை 11 சுற்று பேச்சுவாா்த்தைகள் நிறைவுற்றிருந்தன.
இந்த நிலையில், குடியரசு தினமான ஜனவரி 26-ஆம் தேதி விவசாயிகள் நடத்திய டிராக்டா் பேரணியில் வன்முறை வெடித்தது. விவசாயிகள் தில்லி செங்கோட்டைக்குள் புகுந்தும் வன்முறையில் ஈடுபட்டனா். இந்த வன்முறை சம்பவத்துக்குப் பிறகு, இரு தரப்பு பேச்சுவாா்த்தை நின்றுபோனது. இதனால், விவசாயிகளும் போராட்டத்தைத் தொடா்ந்து வருகின்றனா்.
விவசாயிகளுடன் அரசு மீண்டும் எப்போது பேச்சுவாா்த்தை நடத்தும் என்று தில்லியில் செய்தியாளா்கள் எழுப்பிய கேள்விக்கு மத்திய அமைச்சா் தோமா் புதன்கிழமை கூறியதாவது:
நாட்டிலுள்ள அனைத்து அரசியல் கட்சிகளும் வேளாண் சட்டங்களை நடைமுறைப்படுத்தவே விரும்புகின்றன. ஆனால், அந்த சட்டங்களை நடைமுறைப்படுத்துவதற்கான தைரியத்தை அவா்களால் ஒன்றுதிரட்ட முடியவில்லை. இருந்தபோதும், விவசாயிகளின் நலன் கருதி இந்த மிகப் பெரிய நடவடிக்கையை, சீா்திருத்தத்தை மோடி அரசு மேற்கொண்டது. நாட்டின் பல்வேறு பகுதிகளில் உள்ள விவசாயிகள் இதன் மூலம் பலனடைந்து வருகின்றனா். ஆனால், சில விவசாயிகள் இதற்கு எதிராக போராட்டம் நடத்தி வருகின்றனா்.
போராட்டத்தில் ஈடுபட்டு வரும் விவசாயிகள் சங்க பிரதிநிதிகளுடன் அரசு இதுவரை 11 சுற்று பேச்சுவாா்த்தைகளை நடத்தியுள்ளது. அந்தப் பேச்சுவாா்த்தைகளின்போது, வேளாண் சட்டங்களில் விவசாயிகளுக்கு எதிரான அம்சங்கள் எவை, ஆட்சேபணைக்குரிய பகுதிகள் எவை என்பதை தெரிவிக்குமாறு அரசு சாா்பில் கேட்டுக்கொள்ளப்பட்டது.
ஆனால், அதை விவசாய சங்கத் தலைவா்களும் தெரிவிக்கவில்லை, எதிா்க்கட்சிகளும் அதற்கான கேள்விகளுக்கு நாடாளுமன்றத்தில் பதிலளிக்கவில்லை.
மத்திய அரசு விவசாயிகள் நலனை காக்கும். விவசாயிகளுடன் பேச்சுவாா்த்தை நடத்த மத்திய அரசு எப்போதும் தயாராக உள்ளது. ஆனால், மூன்று வேளாண் சட்டங்களில் அவா்கள் குறிப்பிடும் ஆட்சேபணைக்குரிய பகுதிகளை தெளிவுபட குறிப்பிட வேண்டும். அதை அரசு உரிய முறையில் பரிசீலித்து தீா்வு காணும் என்று தோமா் கூறினாா்.