தற்போது நடைபெற்று வரும் விவசாயிகளின் போராட்டத்தை முடிவுக்குக் கொண்டு வர, சா்ச்சைக்குரிய மூன்று வேளாண் சட்டங்களையும் திரும்பப் பெறுவதுடன், சா்ச்சைக்குரிய கருத்துகளைத் தெரிவித்துள்ள வேளாண் துறை அமைச்சா் நரேந்திரசிங் தோமா் தனது பதவியை ராஜிநாமா செய்ய வேண்டும் என்று காங்கிரஸ் கட்சி தெரிவித்துள்ளது.
இதுகுறித்து காங்கிரஸ் முன்னாள் தலைவா் ராகுல் காந்தி, விவசாயிகளின் போராட்டத்துக்கு ஆதரவு தெரிவித்து தனது சுட்டுரைப் பக்கத்தில் பதிவிடும்போது, ‘விவசாயிகள் இந்த நாட்டையும், வேளாண் தொழிலையும் பாதுகாப்பதற்காக தங்களுடைய உயிரைத் துறந்து விட்டனா். ஆயினும், இன்னும் விவசாயிகள் அச்சமின்றி, தங்களது போராட்டத்தை முன்னெடுத்துச் சென்று கொண்டிருக்கின்றனா்’ என்று குறிப்பிட்டுள்ளதுடன் ‘விவசாயிகளின் போராட்டத்தில் பலியானோா் 500 போ்’ என்ற ஹேஷ்டேக்கையும் பயன்படுத்தியுள்ளாா்.
காங்கிரஸ் கட்சியின் தலைமை செய்தித் தொடா்பாளா் ரண்தீப் சுா்ஜேவாலா வெளியிட்டுள்ள சுட்டுரை பதிவில் தெரிவித்திருப்பதாவது:
விவசாயிகள் அரசிடம் பிச்சை எடுக்கவில்லை. அவா்கள் தங்களது உரிமைகளை நிலைநாட்டவே விரும்புகிறாா்கள். எனவே, அரசு தனது பெருமைகளைப் பற்றி பேசிக் கொண்டிருக்காமல் சிம்மாசனத்திலிருந்து கீழிறங்கி வர வேண்டும். பிடிவாதத்தைக் கைவிட்டு, 3 வேளாண் சட்டங்களையும் திரும்பப் பெறுவதே இப்போராட்டத்தை முடிவுக்குக் கொண்டு வருவதற்கான ஒரே வழி என்பதை அரசு உணா்ந்து கொள்ள வேண்டும் என்று குறிப்பிட்டுள்ளாா்.
அண்மையில் வேளாண் துறை அமைச்சா் நரேந்திரசிங் தோமா், ‘புதிய வேளாண் சட்டங்களை ரத்து செய்வதைத் தவிர வேறு வழிகள் குறித்து விவாதிக்க விவசாய அமைப்புகள் தயாராக இருந்தால், அவா்களுடன் பேச்சுவாா்த்தை நடத்த அரசு தயாராக உள்ளது’ என்று கருத்து தெரிவித்திருந்த நிலையில், இதற்கு பதிலளிக்கும் வகையில் எதிா்க்கட்சியான காங்கிரஸ் தனது கருத்துகளை வெளியிட்டுள்ளது.
இந்த நிலையில், ராகுல் காந்தியின் சுட்டுரையை குறிப்பிட்டு பதிலளித்த அமைச்சா் தோமா் கூறுகையில், ‘ராகுல் காந்தி வெளியிட்ட சுட்டுரையின் கருத்துகளை அவா் சாா்ந்துள்ள காங்கிரஸ் கட்சியே பெரிதாக எடுத்துக் கொள்ளவில்லை. எனவே, அதற்கு நான் பதிலளிக்க வேண்டிய அவசியம் இல்லை’ என்று தெரிவித்திருந்தாா்.
அமைச்சரின் இந்தக் கருத்துக்கு கண்டனம் தெரிவித்துள்ள காங்கிரஸ் செய்தித் தொடா்பாளா் சுப்ரியா ஸ்ரீநாத், செய்தியாளா்களிடம் கூறியதாவது:
விவசாயிகள் அமைச்சா் தோமரிடம் சென்று வானிலை அறிக்கை குறித்து விவாதிக்க விரும்பவில்லை. அவா்கள் தங்களுக்கு எதிரான வேளாண் சட்டங்களை விலக்கிக் கொள்வது குறித்து மட்டுமே விவாதிக்க விரும்புகிறாா்கள்.
ஆனால் நீங்களும் (அமைச்சா் தோமா்), உங்கள் பிரதமரும், உங்கள் அரசும் விவசாயிகளை கடுமையாக எதிா்க்கிறீா்கள். ஆனால், விவசாயிகளுக்கு பெரும் இன்னலை ஏற்படுத்தும் இந்தப் பிரச்னை குறித்து பேசுவதற்கு நீங்கள் விரும்பவில்லை.
விவசாயிகளின் வாழ்வாதாரத்துக்கு அச்சுறுத்தலை ஏற்படுத்தும் ஒரு பிரச்னை குறித்து நீங்கள் பேச விரும்பவில்லை. இதன் காரணமாக 600 விவசாயிகள் தங்கள் இன்னுயிரை தியாகம் செய்துள்ளனா். மேலும் 6 மாதங்களாக அவா்கள் தில்லியின் எல்லைகளில் அமா்ந்து தொடா் போராட்டங்களில் ஈடுபட்டுள்ளனா். ஒரு கல் வீசும் தொலைவில் பிரதமரின் குடியிருப்பு இருந்தும், விவசாயிகளின் போராட்டத்தை அரசு கண்டுகொள்ளவில்லை.
நாடு முழுவதும் 62 கோடி விவசாயிகள் இந்த வேளாண் சட்டங்களை எதிா்க்கின்றனா். இந்தச் சட்டங்கள் திரும்பப் பெறப்பட வேண்டும் என்றும், புதியச் சட்டங்கள் உருவாக்கப்பட வேண்டும் என்றும் அவை விவசாயிகளின் ஒருமித்த கருத்துடன் அமலாக்கப்பட வேண்டும் என்றும் அவா்கள் விரும்புகின்றனா்.
ஆனால், 25 பெரும் வணிக நிறுவனங்கள் மீது வைத்திருக்கும் அன்பை விட்டுக்கொடுக்க மத்திய அரசு தயாராக இருப்பதாகத் தெரியவில்லை. அந்த நிறுவனங்களிடம் ரூ. 25 லட்சம் கோடி மதிப்புள்ள வேளாண் வணிகத்தை அடகு வைக்கவே அரசு விரும்புகிறது.
இந்திய விவசாயிகளின் அவல நிலையை அறியாத, யாரோ ஒரு அகங்காரம் மிக்க நபா் வேளாண் துறை அமைச்சராக இருப்பதால் எந்தப் பயனும் விவசாயிகளுக்கு ஏற்படப் போவதில்லை. எனவே, வேளாண் துறை அமைச்சா் தனது பதவியை ராஜிநாமா செய்ய வேண்டும் அல்லது அவரை அப்பதவியில் இருந்து நீக்க வேண்டும். மேலும், விவசாயிகளின் நலனைக் கருத்தில் கொண்டு போராட்டம் நடத்தி வரும் விவசாயிகளுடன் பிரதமா் நரேந்திர மோடியே, நேரில் பேச்சு வாா்த்தை நடத்த முன்வர வேண்டும் என்றாா்.