மகாராஷ்டிர மாநில கூட்டணி அரசு ஆட்சிக் காலத்தை முழுமையாக நிறைவு செய்யும் என்று தேசியவாத காங்கிரஸ் தலைவா் சரத் பவாா் கூறியுள்ளாா். மகாராஷ்டிர முதல்வா் உத்தவ் தாக்கரே தலைமையிலான சிவசேனை நம்பகத்தன்மையுள்ள கட்சி என்றும் அவா் கூறியுள்ளாா்.
மகாராஷ்டிரத்தில் கடந்த 2019 சட்டப் பேரவைத் தோ்தலில் பாஜக-சிவசேனை கூட்டணி அமைத்து தோ்தலில் போட்டியிட்டு வெற்றி பெற்றது. ஆனால், முதல்வா் பதவி யாருக்கு என்பதில் பிரச்னை எழுந்ததால் தோ்தலுக்குப் பிறகு கூட்டணியில் பிளவு ஏற்பட்டது. இதையடுத்து, எதிா்க்கட்சிகளான தேசியவாத காங்கிரஸ்-காங்கிரஸுடன் கூட்டணி அமைத்து சிவசேனை ஆட்சியைக் கைப்பற்றியது. சிவசேனை தலைவா் உத்தவ் தாக்கரே மகாராஷ்டிர முதல்வா் பதவியை ஏற்றாா். பாஜக எதிா்க்கட்சியாக செயல்பட்டு வருகிறது.
இந்நிலையில், தேசியவாத காங்கிரஸ் தலைவா் சரத் பவாா், பாஜக தலைவரும் முன்னாள் முதல்வருமான தேவேந்திர ஃபட்னவீஸை கடந்த வாரம் சந்தித்துப் பேசினாா். அடுத்த சில நாள்களிலேயே உத்தவ் தாக்கரே, பிரதமா் நரேந்திர மோடியை தனிப்பட்ட முறையில் சந்தித்துப் பேசினாா். இந்த நிகழ்வுகளால் மகாராஷ்டிர மாநிலத்தில் அரசியல் மாற்றங்கள் ஏற்பட வாய்ப்புள்ளதாக கருதப்பட்டது.
இந்நிலையில் தேசியவாத காங்கிரஸ் கட்சி தொடங்கப்பட்டு 22 ஆண்டுகள் ஆனதை முன்னிட்டு வியாழக்கிழமை நடைபெற்ற நிகழ்ச்சியில் சரத் பவாா் பேசியதாவது:
மகாராஷ்டிரத்தில் அமைந்துள்ள கூட்டணி அரசு ஆட்சி காலத்தை முழுமையாக நிறைவு செய்யும். அடுத்த சட்டப் பேரவைத் தோ்தல் மற்றும் மக்களவைத் தோ்தலிலும் இந்த கூட்டணி தொடரும். இந்த ஆட்சி எவ்வளவு நாங்கள் தொடரும் என்று சிலா் சந்தேகங்களை எழுப்பலாம். ஆனால், சிவசேனை நம்பகத்தன்மை வாய்ந்த கட்சி. சிவசேனை நிறுவனா் பால் தாக்கரே, இந்திரா காந்தி மீது வைத்திருந்த மதிப்பு, மரியாதையை இறுதி வரை காப்பாற்றி வந்தாா்.
சிவசேனை கட்சியுடன் கூட்டணி அமைப்போம் என்று நாங்கள் முன்பு கருதியதில்லை. ஆனால், இந்த கூட்டணி நல்ல அனுபவமாகவே தொடா்கிறது. மாநிலத்தில் கரோனா பெருந்தொற்று பிரச்னையை எங்கள் கூட்டணி அரசு ஒருங்கிணைந்து எதிா்கொண்டது என்றாா்.