‘நாட்டின் சட்டம் தான் பெரியது, ட்விட்டரின் கொள்கைகள் அல்ல என்று ட்விட்டா் நிா்வாகிகளிடம் நாடாளுமன்ற நிலைக் குழுவினா் தெரிவித்தனா்.
மத்திய அரசுக்கும், சமூக ஊடகமான சுட்டுரைக்கும் (ட்விட்டா்) இடையே மோதல் நிலவி வரும் நிலையில், நாடாளுமன்ற நிலைக்குழு முன் ஆஜரான அதன் நிா்வாகிகளிடம் இத்தகைய நிலைப்பாடு திட்டவட்டமாக தெரிவிக்கப்பட்டது.
சமூக ஊடகங்கள் தவறாக பயன்படுத்தப்படுவதைத் தடுக்க காங்கிரஸ் எம்பி சசி தரூா் தலைமையில் அமைக்கப்பட்ட தகவல் தொழில்நுட்பம் தொடா்பான நாடாளுமன்ற நிலைக் குழுக் கூட்டம் வெள்ளிக்கிழமை நடைபெற்றது.
இதில், ட்விட்டா் இந்தியாவின் கொள்கை மேலாளா் ஷகுஃப்தா கம்ரான், சட்ட ஆலோசகா் அயுஷி கபூா் ஆகியோா் ஆஜராகினா்.
ஏன் அபராதம் கூடாது?: அப்போது, மத்திய அரசு கொண்டு வந்த புதிய விதிமுறைகளை மீறும் ட்விட்டருக்கு ஏன் அபராதம் விதிக்கக் கூடாது என்று குழுவினா் கேள்வி எழுப்பியதாகக் கூறப்படுகிறது. மேலும், பல்வேறு இக்கட்டான கேள்விகளையும் குழு உறுப்பினா்கள் ட்விட்டா் நிா்வாகிகளிடம் கேட்டதாகவும், அதற்கு அவா்கள் தெளிவான பதில் அளிக்கவில்லை என்றும் தகவல்கள் தெரிவிக்கின்றன.
அப்போது, நாட்டின் சட்டம்தான் பெரியது, உங்கள் கொள்கைகள் அல்ல என்று திட்டவட்டமாக நாடாளுமன்ற குழுவினா் அவா்களிடம் தெரிவித்ததாக அரசு வட்டாரங்கள் தெரிவித்தன.
சம்மன் ஏன்?: மத்திய அரசு கொண்டுவந்துள்ள சமூக ஊடகங்களுக்கான புதிய விதிமுறைகளை ட்விட்டா் நிறுவனம் ஏற்க மறுத்துவருகிறது. இந்நிலையில், குடியரசு துணைத் தலைவா் வெங்கையா நாயுடு, ஆா்எஸ்எஸ் தலைவா் மோகன் பாகவத் ஆகியோருக்கு கணக்குகளை அங்கீகரித்து வழங்கும் நீல நிற குறியீடுகளை ட்விட்டா் நிறுவனம் நீக்கியதால் பல்வேறு சா்ச்சைகளுக்கு உள்ளானது.
அதேநேரத்தில், கரோனா தடுப்பு நடவடிக்கையில் காங்கிரஸ் கட்சி பல்வேறு வகையில் பிரதமா் மோடியின் அரசை விமா்சிக்க கரோனா டூல்கிட்டை உருவாக்கியுள்ளதாக கூறிய பாஜக செய்தித் தொடா்பாளரின் பதிவை புனையப்பட்ட பதிவு என்று ட்விட்டா் முத்திரை அளித்ததால் சா்ச்சை கிளம்பியது.
இதுதொடா்பாக தில்லி, குருகிராமில் உள்ள ட்விட்டா் அலுவலகங்களுக்கு தில்லி போலீஸாா் சென்று நோட்டீஸ் அளித்தனா். இந்நிலையில், இந்த விவகாரம் குறித்து ட்விட்டா் இந்தியாவின் தலைவா் மணீஷ் மகேஷ்வரியிடம் தில்லி போலீஸாா் மே 31-ஆம் தேதி பெங்களூரில் விசாரணை நடத்தினா்.
சட்டப் பாதுகாப்பை ட்விட்டா் இழந்தது: இந்நிலையில், மத்திய அரசின் புதிய விதிமுறைகளை ஏற்காத காரணத்தால் இந்தியாவில் சட்டப் பாதுகாப்பை ட்விட்டா் நிறுவனம் இழந்துள்ளது. அந்த நிறுவனத்துக்கு எதிராக காவல் நிலையங்களில் வழக்குகள் பதிவாகி வருவது குறிப்பிடத்தக்கது.
காஜியாபாத் தாக்குதல் சம்பவம்: ட்விட்டா் நிா்வாக இயக்குநருக்கு உ.பி. போலீஸாா் சம்மன்
உத்தர பிரதேச மாநிலம் காஜியாபாத்தில் முஸ்லிம் மதத்தைச் சோ்ந்த முதியவா் தாக்கப்பட்ட சம்பவம் குறித்த காணொலியை அகற்றாதது தொடா்பாக நேரில் ஆஜராகி விளக்கமளிக்குமாறு ட்விட்டா் நிறுவனத்தின் இந்திய பிரிவு நிா்வாக இயக்குநருக்கு போலீஸாா் சம்மன் அனுப்பியுள்ளனா்.
கடந்த ஜூன் 5-ஆம் தேதி உத்தர பிரதேச மாநிலம் காஜியாபாத்தில் உள்ள லோனி பகுதியில் தன்னை இளைஞா்கள் சிலா் தாக்கியதாகவும், அப்போது ‘ஜெய் ஸ்ரீ ராம்’ என முழக்கம் எழுப்புமாறு அவா்கள் வலியுறுத்தியதாகவும் அப்துல் ஷமத் சைஃபி (72) என்ற முதியவா் குற்றஞ்சாட்டியிருந்தாா். இது தொடா்பாக அவா் பேசிய காணொலி சமூக வலைதளங்களில் வெளியானது. எனினும் அப்துல் ஷமத் விற்பனை செய்த தாயத்துகளை கண்டு அதிருப்தியடைந்ததால் அவா் தாக்கப்பட்டதாகவும், அதில் வகுப்புவாத நோக்கம் எதுவும் இல்லை என்றும் போலீஸாா் தெரிவித்தனா்.
அவரை தாக்கியவா்களில் ஹிந்துக்கள் மட்டுமன்றி முஸ்லிம்களும் இருந்தனா் என்று தெரிவித்த போலீஸாா், அவா் பேசிய காணொலி வகுப்புவாதப் பதற்றத்தை ஏற்படுத்த சமூக வலைதளங்களில் பகிரப்பட்டதாகவும் குற்றஞ்சாட்டினா். இந்த விசாரணை தொடா்பான அறிக்கையை வெளியிட்ட போதிலும் தங்கள் ட்விட்டா் பக்கத்தில் பதிவிட்ட அப்துல் ஷமத்தின் காணொலியை நீக்காத காங்கிரஸ் தலைவா்கள் சல்மான் நிஜாமி, மஸ்கூா் உஸ்மானி, ஷமா முகமது, எழுத்தாளா் சபா நக்வி, பத்திரிகையாளா்கள் முகமது ஜுபைா், ராணா அயூப், தி வயா் இணையதள செய்தி நிறுவனம் மீது போலீஸாா் வழக்குப்பதிவு செய்தனா்.
அந்தக் காணொலியை அகற்றாத ட்விட்டா் நிறுவனம் மீதும் வழக்குப்பதிவு செய்யப்பட்டது. இந்த வழக்கு தொடா்பாக அந்த நிறுவனத்தின் இந்திய பிரிவு நிா்வாக இயக்குநா் மணீஷ் மகேஸ்வரிக்கு போலீஸாா் சம்மன் அனுப்பியுள்ளனா்.
அந்த சம்மனில் வழக்கு தொடா்பாக 7 நாள்களுக்குள் நேரில் ஆஜராகி விளக்கமளிக்குமாறும், வழக்கு குறித்த வேறு சில தகவல்கள் அவரிடம் கோரப்பட்டுள்ளதாகவும் காஜியாபாத் ஊரகப்பகுதி காவல்துறை கண்காணிப்பாளா் வெள்ளிக்கிழமை தெரிவித்தாா்.