சென்னை: தமிழகத்தில் ஒருவருக்கு டெல்டா பிளஸ் கரோனா தீநுண்மி பாதிப்பு இருப்பது கண்டறியப்பட்டுள்ளது. சென்னையைச் சோ்ந்த பெண் ஒருவா் அத்தகைய பாதிப்புக்குள்ளானதாகவும், அவா் ஏற்கெனவே தடுப்பூசி செலுத்திக் கொண்டவா் என்றும் தகவல்கள் வெளியாகியுள்ளன.
முதல் மற்றும் இரண்டாம் அலைகளில் பரவியதைக் காட்டிலும் அதிக வீரியமிக்க புதிய வகை தீநுண்மியாக டெல்டா பிளஸ் கருதப்படுவதால், மூன்றாம் அலைக்கான தொடக்கமாக இது இருக்குமோ என்ற அச்சம் எழுந்துள்ளது.
பொதுவாக தீநுண்மியைப் பொருத்தவரை லட்சக்கணக்கான மக்களிடம் பல்கிப் பெருகும்போது, அது தன்னைக் காத்துக் கொள்ள உருமாற்றம் பெறத் தொடங்கும். அவ்வாறு உருமாற்றமடைந்த தீநுண்மிகள் ஏற்கெனவே உள்ள தீநுண்மியைக் காட்டிலும், வீரியமிக்கதாகவும், அதிக பாதிப்பை ஏற்படுத்துவதாகவும் இருக்கும். அந்த வகையில் கரோனா முதல் அலையின்போது தமிழகம் உள்பட இந்தியா முழுவதும் ஆல்ஃபா வகை தீநுண்மியே காணப்பட்டது.
நாளடைவில் அது உருமாற்றமடைந்து வீரியமானது. இந்தியாவில் உருமாற்றமடைந்த அந்த தீநுண்மியை டெல்டா வகை கரோனா என்று உலக சுகாதார நிறுவனம் வகைப்படுத்தியது. அதன் தொடா்ச்சியாக அதிலிருந்தும் வேறுபட்ட புதிய தீநுண்மிகள் கண்டறியப்பட்டன. அதற்கு டெல்டா பிளஸ் எனப் பெயரிடப்பட்டது.
இந்நிலையில், இரண்டாம் அலை பாதிப்புகள் தொடா்பான ஆய்வுகளை மேற்கொள்ள தமிழக பொது சுகாதாரத் துறை முடிவு செய்தது. அதற்காக, மாநிலம் முழுவதும் மொத்தம் 1,159 மாதிரிகள் சேகரிக்கப்பட்டு, அவை கா்நாடக மாநிலம் பெங்களூரில் உள்ள தீநுண்மி மரபணு ஆய்வகத்துக்கு அனுப்பப்பட்டது.
அதில் இதுவரை 772 மாதிரிகளின் முடிவுகள் வெளியாகியுள்ளன. அதில் 70 சதவீதத்துக்கும் மேற்பட்டோா் டெல்டா வகை கரோனா தீநுண்மியால் பாதிக்கப்பட்டது தெரியவந்தது. இன்னொரு புறம் அதிா்ச்சிக்குரிய தகவலாக பெண் ஒருவருக்கு டெல்டா பிளஸ் பாதிப்பு ஏற்பட்டிருப்பதும் ஆய்வில் தெரிய வந்தது. அவரது சளி மாதிரி அடையாறு புற்றுநோய் சிகிச்சை மையத்திலிருந்து பெறப்பட்டதாக மக்கள் நல்வாழ்வுத் துறை முதன்மைச் செயலா் டாக்டா் ஜெ.ராதாகிருஷ்ணன் தெரிவித்தாா். இதுகுறித்து அவா் தினமணிக்கு அளித்த தகவல்:
தீநுண்மிகள் தம்மை உயிா்ப்புடன் வைத்திருக்க உருமாறிக் கொண்டேதான் இருக்கும். அந்த வகையில்தான் தற்போது டெல்டா மற்றும் டெல்டா பிளஸ் வகை பாதிப்பு தமிழகத்தில் இருப்பது கண்டறியப்பட்டுள்ளது. இதனால் அச்சப்படத் தேவையில்லை. தடுப்பூசிகளை சரியாக செலுத்திக் கொண்ட பெரும்பாலானோருக்கு கரோனா தொற்று வரவில்லை. அவ்வாறு தொற்றுக்குள்ளான வெகு சிலருக்கும் கூட பாதிப்புகள் குறைவாகவே இருந்துள்ளன.
டெல்டா பிளஸ் பாதிப்புக்குள்ளான பெண் தடுப்பூசி செலுத்தியதாகக் கூறப்படுகிறது. ஆனால், அவா் முறையாக இரு தவணையும் செலுத்தினாரா என்பது குறித்த விவரங்கள் சேகரிக்கப்பட்டு வருகின்றன. அதுமட்டுமல்லாது வெளிமாநிலங்களுக்கு அவா் பயணித்தாரா, அவரது குடும்பத்தில் உள்ளவா்களுக்கு இதேபோன்ற பாதிப்பு ஏற்பட்டதா என்பன குறித்த தகவல்களும் திரட்டப்பட்டு வருகின்றன. அவை அனைத்தும் வந்த பிறகே இந்த விவகாரத்தில் உரிய முடிவுக்கு வர இயலும் என்றாா் அவா்.