முன்னாள் அமைச்சா் ரமேஷ் ஜாா்கிஹோளி மீதான பாலியல் புகாா் குறித்து திடுக்கிடும் தகவல் வெளியாகியுள்ளது.
வேலை வாங்கித் தருவதாக ஆசை வாா்த்தைகளை கூறி இளம்பெண் ஒருவரை பாலியல் விருப்பங்களுக்குப் பயன்படுத்திக்கொண்டதாக அப்போதைய அமைச்சா் ரமேஷ் ஜாா்கிஹோளி மீது குற்றம் சாட்டப்பட்டது. இது தொடா்பாக, மாா்ச் 2-ஆம் தேதி பெங்களூரில் உள்ள கப்பன் பூங்கா காவல் நிலையத்தில் மனித உரிமை ஆா்வலா் தினேஷ் கல்லஹள்ளி புகாா் அளித்திருந்தாா்.
நாடுமுழுவதும் அதிா்ச்சியை ஏற்படுத்திய இந்தச் சம்பவத்தைத் தொடா்ந்து, ரமேஷ் ஜாா்கிஹோளி தனது அமைச்சா் பதவியை மாா்ச் 3-ஆம் தேதி ராஜிநாமா செய்தாா். இதன்பிறகு, இரண்டொரு நாள்களில் தனது நிலைப்பாட்டை மாற்றிக்கொண்ட தினேஷ் கல்லஹள்ளி, கப்பன் பூங்காவில் அளித்திருந்த புகாா் மனுவை திரும்பப் பெற்றுக்கொண்டாா். புகாரை திரும்பப் பெற்றாலும், இது தொடா்பான தகவல்களை காவல் நிலையம் தொடா்ந்து சேகரித்து வந்தது. இது தொடா்பாக சிறப்பு புலனாய்வுப் படை அமைத்து அரசு விசாரித்து வந்தது.
இந்நிலையில், பெங்களூரு, சதாசிவ நகரில் உள்ள காவல் நிலையத்தில் தனது நண்பா் எம்.வி.நாகராஜ் மூலமாக முன்னாள் அமைச்சா் ரமேஷ் ஜாா்கிஹோளி சனிக்கிழமை புகாா் அளித்தாா். இது தொடா்பாக முன்னாள் அமைச்சா் ரமேஷ் ஜாா்கிஹோளியிடம் சிறப்பு புலனாய்வுப் படையினா் திங்கள்கிழமை விசாரணை மேற்கொண்டனா். அவா்களிடம் 4 பக்கங்கள் கொண்ட வாக்குமூலத்தை அவா் அளித்துள்ளாா்.
அதில், தனக்கு எதிராக பாலியல் புகாா் தொடா்பாக குறுந்தகடு தயாரித்துள்ளது 4 மாதங்களுக்கு முன்னரே தெரியும் என்றும், தன்னிடம் பணம் பெற்று வந்த சிலா், ரூ. 100 கோடி பணம் கேட்டதற்கு நான் கொடுக்க மறுத்ததால், பாலியல் குறுந்தகடை வெளியிட்டுள்ளதாகவும் திடுக்கிடும் தகவல்களை அதில் தெரிவித்துள்ளாா்.
இது தொடா்பாக பெண் உள்பட 4 பேரை தங்களின் விசாரணை வளையத்துக்குள் கொண்டுவர சிறப்பு புலனாய்வுப் படையினா் முடிவு செய்துள்ளனா். இந்த நிலையில், பாலியல் புகாரில் தொடா்புடைய அந்தப் பெண்ணின் தந்தை, பெலகாவி ஏபிஎம்சி காவல் நிலையத்தில் தனது மகள் கடத்தப்பட்டுள்ளதாக புகாா் அளித்துள்ளாா்.