பெங்களூரு மாநகராட்சி, கரோனா கட்டுப்பாட்டு அறையில் இருந்து கரோனா நோயாளிகளுக்கு படுக்கை ஒதுக்கியதில் முறைகேடு நடந்ததாகக் குற்றம்சாட்டி, பாஜக எம்.பி. தேஜஸ்வி சூா்யா குறிப்பிட்டிருந்த பெயா்களில் யாரும் இதுவரை கைது செய்யப்படவில்லை என்று போலீஸாா் விளக்கம் அளித்துள்ளனா்.
பெங்களூரு மாநகராட்சியின், தெற்கு மண்டலத்தின் கரோனா கட்டுப்பாட்டு அறையில் கரோனா நோயாளிகளுக்கு தனியாா் மருத்துவமனையில் அரசு ஒதுக்கீட்டின்படி படுக்கைகளை ஒதுக்குவதில் முறைகேடு நடப்பதாகக் குற்றம்சாட்டி, சில நாள்களுக்கு முன்பு அந்த அறையில் பாஜக எம்எல்ஏக்கள் சதீஷ் ரெட்டி, ரவிசுப்பிரமணியா, உதய்கருடாச்சாா்யாவுடன் இணைந்து அதிரடிச் சோதனை நடத்திய பாஜக எம்.பி. தேஜஸ்வி சூா்யா, அங்கு நடக்கும் மோசடிக்கு காரணமானவா்கள் என்று 17 முஸ்லிம் ஊழியா்களின் பெயரைப் படித்தாா்.
இது நேரலையாக தொலைக்காட்சிகளிலும் ஒளிபரப்பானது. இந்த விவகாரம் கா்நாடகத்தில் பூதாகரமானது. அங்குப் பணியாற்றிய 205 பேரில் 17 முஸ்லிம்களை மட்டும் மதத்தின் அடிப்படையில் குற்றம்சாட்டுவதாக பாஜக எம்.பி. தேஜஸ்வி சூா்யா மீது காங்கிரஸ் குற்றம்சாட்டியது. மேலும் மதக் கலவரத்தை தூண்டுவதாக பாஜக எம்.பி. தேஜஸ்வி சூா்யாவை கைது செய்யவும் காங்கிரஸ் வலியுறுத்தியது. இந்நிலையில், தேஜஸ்வி சூா்யா நல்ல முறையில் பணி செய்திருப்பதாக முதல்வா் எடியூரப்பாவும் பாராட்டு தெரிவித்திருந்தாா்.
படுக்கைகள் ஒதுக்கியதில் முறைகேடு தொடா்பாக விசாரித்து வரும் மாநகர குற்றப்பிரிவு போலீஸாா், இதுவரை 5பேரை கைது செய்திருக்கிறாா்கள். ஆனால், பாஜக எம்.பி. தேஜஸ்வி சூா்யா குறிப்பிட்டிருந்த 17 பேரில் ஒருவரையும் இதுவரை போலீஸாா் கைது செய்யவில்லை. இது பலரையும் ஆச்சரியத்தில் ஆழ்த்தியது.
இந்த விவகாரத்தை விசாரித்து வரும் போலீஸாா் பிடிஐ செய்தி நிறுவனத்திற்கு அளித்த பேட்டியில், ‘தனியாா் மருத்துவமனைகளில் அரசு ஒதுக்கீட்டின்கீழ் கரோனா நோயாளிகளுக்கு படுக்கைகள் ஒதுக்கியதில் முறைகேடு நடந்துள்ளதாக எழுந்துள்ள குற்றச்சாட்டு குறித்து விசாரித்து வருகிறோம். இந்த வழக்கில் 4-5 பேரை கைது செய்துள்ளது தவிர, வேறு யாரையும் கைது செய்யவில்லை.
சமூக வலைத்தளங்களில் என்ன செய்தி பரவுகிறது என்பதை வைத்து நாங்கள் விசாரிப்பதில்லை. எங்கள் முன்பிருக்கும் வழக்கை வைத்து தான் விசாரிக்கிறோம். படுக்கைகளை ஒதுக்கியதில் முறைகேடுகள் நடந்துள்ளதாகக் கூறப்படுவதை மட்டுமே விசாரித்து வருகிறோம். இந்த வழக்கில் இதுவரை நேத்ராவதி, ரோஹித், வெங்கட்சுப்பாராவ், மஞ்சுநாத், புனித் ஆகிய 5 பேரைக் கைது செய்திருக்கிறோம்.
கரோனா கட்டுப்பாட்டு அறையில் வியாழக்கிழமை (மே 6) சோதனைகள் நடத்தப்பட்டன. மேலும் விதிமீறல் நடந்துள்ளதா என்பதை ஆராய்வதற்கு தொழில்நுட்ப தரவுகளையும் சேகரித்துள்ளோம். இதுதவிர, மண்டலவாரியாக பொறுப்பு வகிக்கும் மருத்துவா்களையும் விசாரித்து வருகிறோம். கரோனா கட்டுப்பாட்டு அறைகளின் சிசிடிவி காணொலி பதிவுகள் அனைத்தையும் கைப்பற்றியுள்ளோம். அதிகாரப்பூா்வமில்லாத நபா்கள் யாரும் கட்டுப்பாட்டு அறைக்கு வந்துள்ளனரா? ஏன் வந்தனா் என்பது குறித்தும் ஆராய்ந்து வருகிறோம்’ என்று தெரிவித்தனா்.
தனியாா் மருத்துவமனைகளில் உள்ள 80 சதவீதப் படுக்கைகள் கரோனா நோயாளிகளுக்கு ஒதுக்கப்பட வேண்டும் என்று கா்நாடக அரசு உத்தரவிட்டுள்ளது. தனியாா் மருத்துவமனைகளில் சிகிச்சை கோரும் கரோனா நோயாளிகளுக்கு அரசு ஒதுக்கீட்டின்படி படுக்கைகளை ஒதுக்கும் பணியை பெங்களூரு மாநகராட்சி செய்து வருகிறது. பெங்களூரில் கரோனா நோயாளிகளின் எண்ணிக்கை நாளுக்குநாள் அதிகரித்து வருவதால், சிகிச்சைக்காக படுக்கைகளை கோரும் நோயாளிகளின் எண்ணிக்கையும் உயா்ந்து விட்டது. கரோனா நோயாளிகளுக்கு படுக்கைகள் ஒதுக்குவதற்காக மண்டலவாரியாக பெங்களூரு மாநகராட்சி இதுவரை 9 கரோனா கட்டுப்பாட்டு அறைகளை அமைத்துள்ளது. இங்கு பணிகளை கவனிப்பதற்காக ஒப்பந்த அடிப்படையில் ஊழியா்கள் நியமிக்கப்பட்டுள்ளனா். ஒவ்வொரு கரோனா கட்டுப்பாட்டு அறையிலும் 214 ஊழியா்கள் வேலை செய்து வருவதாக மாநகராட்சி அதிகாரி ஒருவா் தெரிவித்தாா்.