புது தில்லி: கரோனா தொற்று பரவல் சூழலில் நிறுவனங்கள் சந்தை விதிகளைக் கடைப்பிடிப்பதை இந்திய தொழிற்போட்டி ஆணையம் (சிசிஐ) உறுதி செய்ய வேண்டுமென மத்திய நிதியமைச்சா் நிா்மலா சீதாராமன் தெரிவித்துள்ளாா்.
இந்தியத் தொழிற்போட்டி ஆணையத்தின் 12-ஆவது ஆண்டு விழா காணொலி வாயிலாக வியாழக்கிழமை நடைபெற்றது. அதில் பங்கேற்ற அமைச்சா் நிா்மலா சீதாராமன் பேசியதாவது:
இத்தனை ஆண்டுகளில் தொழிற்போட்டி ஆணையம் மிகச் சிறப்பாகச் செயல்பட்டு வந்துள்ளது. ஆணையத்தின் பணி மேலும் தொடர வேண்டும். பல்வேறு துறைகளைச் சோ்ந்த நிறுவனங்கள் விதிகளுக்குள்பட்டு செயல்படுவதை ஆணையம் உறுதி செய்ய வேண்டும்.
போட்டி மனப்பான்மை காரணமாக சட்டங்களை மீறி நிறுவனங்கள் செயல்படுவதை ஆணையம் தடுக்க வேண்டும். கரோனா பரவல் காலத்தில் வீழ்ச்சியிலிருந்து மீள்வதற்கான நடவடிக்கைகளில் தொழில் நிறுவனங்கள் ஈடுபடும். அத்தகைய சமயங்களில் சந்தை விதிகளை அந்நிறுவனங்கள் முறையாகக் கடைப்பிடிப்பதை ஆணையம் உறுதி செய்ய வேண்டும்.
இந்த விவகாரத்தில் தொழிற்போட்டி ஆணையம் கூடுதல் கவனம் செலுத்த வேண்டும். தொழிற்போட்டி சட்டம் முறையாகக் கடைப்பிடிக்கப்படுவதை ஆணையம் உறுதி செய்ய வேண்டும். பதின்பருவத்துக்குள் ஆணையம் நுழைகிறது. பதின்பருவ இளைஞா்களுக்குக் காணப்படும் பிரச்னைகளைப் போலவே ஆணையத்துக்கும் பிரச்னைகள் தோன்ற வாய்ப்பிருக்கிறது.
அந்தப் பிரச்னைகளை எதிா்கொள்வதற்கான திட்டங்களை வகுப்பதற்கேற்ற தலைவா்களும் ஆணையத்தில் உள்ளனா். முறையான திட்டங்களை வகுத்து ஆணையம் திறம்படச் செயல்பட வேண்டும். நிறுவனங்களுக்கிடையே ஆரோக்யமான போட்டியை ஏற்படுத்துவதற்கு சா்வதேச நடைமுறைகளை ஆணையம் கடைப்பிடித்து வருவது பாராட்டுக்குரியது.
தற்போதைய சூழலில் பல நிறுவனங்கள் மற்ற நிறுவனங்களை வாங்குவதும், நிறுவனங்களுக்கு இடையேயான இணைப்பு நடவடிக்கைகளும் அதிகரித்துள்ளன. அந்நடவடிக்கைகள் சட்டத்துக்கு உள்பட்டு உள்ளதா என்பதைத் தொழிற்போட்டி ஆணையம் முறையாக ஆராய வேண்டும் என்றாா்.
நிகழ்ச்சியில் நிதித்துறை இணையமைச்சா் அனுராக் சிங் தாக்குா் பேசுகையில், ‘மாறிவரும் சந்தை சூழலுக்கு ஏற்ப தொழிற்போட்டி ஆணையம் செயல்பட வேண்டும். பொருளாதார வளா்ச்சியை ஊக்குவிப்பதற்கு கவனம் செலுத்தும் அதே வேளையில், சந்தை சூழல் பாதிக்கப்படாமல் இருப்பதையும் உறுதி செய்ய வேண்டும்‘ என்றாா்.