திரையுலகில் எம்.ஜி.ஆர்., என்.டி.ஆர் மற்றும் சிவாஜி கணேசனின் பங்களிப்பு அளப்பரியது என்று மத்திய இணையமைச்சர் எல்.முருகன் தெரிவித்துள்ளார்.
கோவாவில் நடைபெறும் 52-வது இந்திய சர்வதேச திரைப்பட விழாவின் தொடக்க நிகழ்ச்சியில், மத்திய தகவல் ஒலிபரப்பு, மீன்வளம், கால்நடை பராமரிப்பு & பால்வளத்துறை இணையமைச்சர் எல்.முருகன் ஆற்றிய உரை, கோவாவில் நடைபெறும் 52-வது இந்திய சர்வதேச திரைப்பட விழாவில் உங்களுடன் பங்கேற்பதில் நான் மிகுந்த மகிழ்ச்சியடைகிறேன்.
முதலில், சத்தியஜித் ரே வாழ்நாள் சாதனையாளர் விருது பெறும் இஸ்த்வான் ஸ்சாபோ மற்றும் மார்ட்டின் ஸ்கோர்ஸ்செஸ் ஆகியோருக்கு எனது வாழ்த்துகளைத் தெரிவித்துக் கொள்கிறேன். திரையுலகிற்கு நீங்கள் ஆற்றிய அளப்பரிய பங்களிப்பை நாங்கள் அங்கீகரிக்கிறோம். இங்கு விருது பெறும் ஹேமமாலினி மற்றும் பிரசூன் ஜோஷி ஆகியோருக்கும் எனது வாழ்த்துகளைத் தெரிவித்துக் கொள்கிறேன்.
இதையும் படிக்க- டிக்டாக் செயலிக்கான தடையை நீக்கியது பாகிஸ்தான்
இந்திய சர்வதேச திரைப்பட விழா, மிகவும் பிரசித்தி பெற்ற திரைப்பட விழாக்களில் ஒன்றாகும். உலகெங்கிலும் உள்ள திரைப்பட தயாரிப்பாளர்கள் தங்களது படைப்பாற்றலை வெளிப்படுத்துவதற்கான பொது மேடையை இந்த விழா வழங்குகிறது. திரைப்படக் கலாச்சாரங்களை ஒருங்கிணைப்பதோடு, பல்வேறு சமூகம் மற்றும் கலாச்சாரப் பண்புகளை புரிந்து கொள்ளவும் வழிவகுப்பதுடன், உலகத் திரைப்படங்களை அறிந்து கொள்வதற்கும் ஒரு வாய்ப்பை அளிக்கிறது.
எம்ஜிஆர், என்டிஆர் மற்றும் சிவாஜி கணேசன் போன்றோர் திரையுலகிற்கு ஆற்றியுள்ள அளப்பரிய பங்களிப்பையும் நான் இங்கு சுட்டிக்காட்ட விரும்புகிறேன். தலைசிறந்த நடிகர்களான திலீப் குமார், புனித் ராஜ்குமார், சுமித்ரா பவே மற்றும் பிற ஜாம்பவான்களையும் நான் இங்கு நினைவுகூர விரும்புகிறேன். திரையுலகம் உங்களுக்கு எப்போதும் நன்றிக்கடன் பட்டுள்ளது என்றார்.