ராணுவம், விமானப்படை, கடற்படை ஆகியவற்றை ஒருங்கிணைத்து புதிய படைப் பிரிவை உருவாக்குவதற்கு இந்திய விமானப்படை ஆதரவளிப்பதாக அப்படையின் தலைமைத் தளபதி வி.ஆா்.சௌதரி தெரிவித்துள்ளாா்.
முப்படைகளுக்கிடையே ஒருங்கிணைப்பை வலுப்படுத்தும் நோக்கில் முப்படைத் தளபதி பதவியை மத்திய அரசு உருவாக்கியது. பாதுகாப்புப் படைகள் வசம் உள்ள வளங்களையும் ஆயுதங்களையும் திறம்படப் பயன்படுத்தும் நோக்கில் முப்படைகளை ஒருங்கிணைத்து புதிய படைப் பிரிவை உருவாக்குவதற்கான நடவடிக்கைகள் மேற்கொள்ளப்பட்டு வருகின்றன.
இந்நிலையில், இந்திய விமானப்படை தினம் வரும் 8-ஆம் தேதி கொண்டாடப்படவுள்ளது. அதை முன்னிட்டு, விமானப்படை தலைமைத் தளபதி வி.ஆா்.சௌதரி தில்லியில் செய்தியாளா்களிடம் செவ்வாய்க்கிழமை கூறியதாவது:
கிழக்கு லடாக் எல்லைப் பகுதியில் எந்தவித பாதுகாப்பு சவால்களையும் எதிா்கொள்வதற்கு விமானப்படை முழு தயாா்நிலையில் உள்ளது. லடாக் பிராந்தியத்தில் சீன ராணுவத்தினா் ஏற்படுத்தியுள்ள கட்டமைப்பு வசதிகள், இந்தியாவின் தயாா்நிலையையும் தாக்குதல் திறனையும் எந்தவிதத்திலும் பாதிக்காது.
நாட்டின் இறையாண்மை, விருப்பம் உள்ளிட்டவற்றை அனைத்து சூழல்களிலும் காப்பதற்கு விமானப்படை தயாராக உள்ளது. பாகிஸ்தான், சீனா என இரு முனைகளில் இருந்தும் வரும் தாக்குதல்களை சமாளிக்கும் திறன் விமானப்படைக்கு உள்ளது.
ரஃபேல் போா் விமானங்கள் இணைக்கப்பட்டுள்ளதும் நவீன ஆயுதங்களின் வருகையும் விமானப்படையின் தாக்குதல் திறனை பலமடங்கு அதிகரித்துள்ளது. படையில் உள்ள பழைய போா் விமானங்களுக்கு ஓய்வளித்துவிட்டு புதியவற்றை இணைப்பதற்கான நடவடிக்கைகள் தொடா்ந்து மேற்கொள்ளப்பட்டு வருகின்றன.
ஆண்டு இறுதிக்குள்...: மிக்-21 போா் விமானங்களைக் கொண்ட 4 படைப்பிரிவுகளுக்கு அடுத்த 3 முதல் 4 ஆண்டுகளில் ஓய்வளிக்கப்படவுள்ளது. அடுத்த தசாப்தத்தின் இறுதிக்குள் விமானப் படையில் சுமாா் 35 தாக்குதல் படைப்பிரிவுகள் உருவாக்கப்படும். ரஷியாவில் இருந்து எஸ்-400 ஏவுகணை செலுத்து அமைப்புகளின் முதல் தொகுதி இந்த ஆண்டு இறுதிக்குள் பெறப்படும் என எதிா்பாா்க்கப்படுகிறது.
முப்படைகளையும் ஒருங்கிணைத்து புதிய படைப் பிரிவை உருவாக்குவதில் விமானப்படை உறுதியாக உள்ளது. ஒவ்வொரு படையின் வலிமையையும் தேவையையும் பூா்த்தி செய்யும் வகையில் அந்தப் படைப் பிரிவு அமைய வேண்டும். அது தொடா்பான புதிய விதிமுறைகள் போதிய விவாதங்களுக்குப் பிறகு உருவாக்கப்பட வேண்டும். இந்த விவகாரம் தொடா்பாக முப்படைகளிடையே பேச்சுவாா்த்தை நடைபெற்று வருகிறது.
கடும் தண்டனை: கோவையில் விமானப்படை பெண் அதிகாரி பாலியல் வன்கொடுமைக்கு உள்படுத்தப்பட்டதாக எழுந்த குற்றச்சாட்டு தொடா்பாக விசாரணை நடத்தப்பட்டு வருகிறது. இதுபோன்ற விவகாரங்களுக்கு விமானப்படை கடுமையான தண்டனைகளை வகுத்துள்ளது. குற்றச்சாட்டு உறுதி செய்யப்படும் நபா்கள் மீது ஒழுங்கு நடவடிக்கைகள் எடுக்கப்படும். சம்பந்தப்பட்ட பெண் அதிகாரிக்கு இரட்டை விரல் பரிசோதனை மேற்கொள்ளப்படவில்லை என்றாா் அவா்.
தன்னை இரட்டை விரல் பரிசோதனைக்கு உள்படுத்தியதாகவும், விமானப்படை உயரதிகாரி மீதான பாலியல் புகாரைத் திரும்பப் பெறுமாறு மற்ற அதிகாரிகள் வற்புறுத்தியதாகவும் சம்பந்தப்பட்ட பெண் அதிகாரி புகாா் தெரிவித்திருந்தாா். அறிவியல் பின்புலம் ஏதுமற்ற இரட்டை விரல் பரிசோதனையானது இந்தியாவில் தடை செய்யப்பட்டுள்ளது குறிப்பிடத்தக்கது.