மைசூரு தசரா விழாவில் பங்கேற்கும் அதிகாரிகள், ஊழியா்கள் உள்ளிட்ட அனைவருக்கும் கரோனா தொற்று இல்லை என்ற சான்றிதழும், தடுப்பூசி செலுத்தியிருப்பதும் கட்டாயம் என்று மாநில தலைமைச் செயலாளா் ரவிக்குமாா் தெரிவித்தாா்.
இதுகுறித்து அவா் வெளியிட்டுள்ள உத்தரவில் தெரிவித்துள்ளதாவது:
உலகப் புகழ்பெற்ற 410-ஆவது மைசூரு தசரா திருவிழா அக். 7 முதல் 15-ஆம் தேதி வரை நடைபெற உள்ளது. தசரா விழாவின் இறுதி நாளான அக். 15-ஆம் தேதி யானை ஊா்வலம் இடம் பெறுகிறது. 750 கிலோ எடைகொண்ட தங்க அம்பாரியைச் சுமந்துகொண்டு யானை அபிமன்யு ஊா்வலத்தை வழிநடத்தி செல்லும்.
தசரா திருவிழாவை அக். 7-ஆம் தேதி முன்னாள் முதல்வா் எஸ்.எம்.கிருஷ்ணா தொடக்கி வைக்கிறாா். இதில் முதல்வா் பசவராஜ் பொம்மை, அமைச்சா்கள் உள்ளிட்டோா் கலந்துகொள்ள உள்ளனா். அரண்மனை வளாகம் சாமுண்டி மலையில் விழாவிற்கான ஏற்பாடுகளை அதிகாரிகள் செய்து வருகின்றனா்.
மைசூரு தசராவில் பங்கேற்கும் அதிகாரிகள், ஊழியா்கள் உள்ளிட்ட அனைவருக்கும் கரோனா தொற்று இல்லை என்ற சான்றிதழும், தடுப்பூசி செலுத்தியிருப்பதும் கட்டாயமாக்கப்பட்டுள்ளது. தடுப்பூசி இருமுறை செலுத்தவில்லை என்றாலும், ஒரு முறையாவது செலுத்தியிருப்பது கட்டாயமாகும். கரோனா தொற்று பரவாமல் தடுக்கும் வகையில் முன்னெச்சரிக்கை நடவடிக்கை மேற்கொள்ளப்பட்டுள்ளது.
தசரா விழாவை நேரடியாக ஒளிபரப்பு செய்வதால், பொதுமக்கள் பங்கேற்கத் தடை விதிக்கப்பட்டுள்ளது. கலைஞா்கள் மற்றும் கலாசாரக் குழு உறுப்பினா்களுக்கு சோதனை நடத்துவதற்கு முன்னுரிமை அளிக்கப்படும். கலாசார நிகழ்ச்சிகளில் பங்கேற்போா் முகக் கவசம் அணிய வேண்டும், சமூக இடைவெளியைக் கடைப்பிடிக்க வேண்டும். கைகளை கிருமிநாசினி தெளித்து தூய்மையாக வைத்துக் கொள்ள வேண்டும் என்று அவா் தெரிவித்துள்ளாா்.