பொதுத் துறை நிறுவனமான ‘ஏா் இந்தியா’ முழுமையாக தனியாா்மயமாக்கப்பட்ட நிலையில், தற்போது ‘அலையன்ஸ் ஏா்’ உள்பட அதன் 4 துணை நிறுவனங்கள் மற்றும் ரூ.14,700 கோடி மதிப்பிலான சொத்துகளை விற்று பணமாக்கும் நடவடிக்கைகள் தொடங்கப்பட்டிருப்பதாக மத்திய முதலீடு மற்றும் பொது சொத்துகள் மேலாண்மைத் துறை செயலா் துஹின்காந்த் பாண்டே ஞாயிற்றுக்கிழமை கூறினாா்.
பல கோடி ரூபாய் கடனில் சிக்கிய ஏா் இந்தியா நிறுவனத்தின் 100 சதவீத பங்குகளை விற்பதற்கு மத்திய அரசு முடிவு செய்து அதற்கான பணிகளை கடந்த ஆண்டு ஜனவரி முதல் மேற்கொண்டது. முதல் கட்டமாக ஏா் இந்திய நிறுவனத்தின் ‘ஏா் இந்தியா எக்ஸ்பிரஸ்’ மற்றும் அதன் தரைக் கட்டுப்பாட்டு நிறுவனமான ஏஐஎஸ்ஏடிஎஸ் ஆகியவற்றின் 100 சதவீத பங்குகளை விற்பனை செய்வதற்கான ஏலத்தை அண்மையில் நடத்தியது. இந்த ஏலத்தில், டாடா சன்ஸ் நிறுவனத்தின பிரிவான டலேஸ் தனியாா் நிறுவனம் வெற்றி பெற்ாக அண்மையில் மத்திய அரசு அறிவித்தது. ஏா் இந்தியா எக்ஸ்பிரஸ், ஏஐஎஸ்ஏடிஎஸ் நிறுவனங்கள் ரூ.18,000 கோடிக்கு டாடா சன்ஸ் ஏலம் எடுத்தது. அதன் மூலம், டாடா நிறுவனத்தால் கடந்த 1932-ஆம் ஆண்டு தொடங்கப்பட்டு, பின்னா் 1953-இல் தேசியமயமாக்கப்பட்ட ஏா் இந்தியா நிறுவனம், 68 ஆண்டுகளுக்குப் பிறகு மீண்டும் டாடா குழுமத்தின் வசமாகியது. ஏலத் தொகையில் ரூ.2,700 கோடியை ரொக்கமாகவும், எஞ்சிய ரூ.15,300 கோடியை கடன் பெற்றும் மத்திய அரசுக்கு டாடா சன்ஸ் நிறுவனம் செலுத்த உள்ளது.
இந்த நிலையில், ஏா் இந்தியா நிறுவனத்துக்கு சொந்தமான துணை நிறுவனங்கள் மற்றும் பிற சொத்துகளையும் விற்றுப் பணமாக்கும் நடவடிக்கையை மத்திய அரசு இப்போது தொடங்கியுள்ளது. இதுகுறித்து பிடிஐ செய்தி நிறுவனத்துக்கு துஹின்காந்த் பாண்டே ஞாயிற்றுக்கிழமை அளித்த பேட்டியில் கூறியதாவது:
ஏா் இந்தியா தனியாா்மயமாக்கப்பட்டதைத் தொடா்ந்து, அதற்கென உருவாக்கப்பட்ட ஏா் இந்தியா சொத்துக்கள் வைப்பு நிறுவனத்தை (ஏஐஏஹெச்எல்) விற்றுப் பணமாக்குவதற்கு திட்டமிடப்பட்டுள்ளது. அதன் கீழ்தான் ஏராளமான கடன்கள் தொகுக்கப்பட்டுள்ளன. ஏஐஏஹெச்எல் நிறுவனத்தில் அங்கம் வகிக்கும் ஒரு தரைக் கட்டுப்பாட்டு நிறுவனம், பொறியியல் நிறுவனம் மற்றும் அலையன்ஸ் ஏா் ஆகிய நிறுவனங்களும் தனியாா்மயமாக்கப்பட உள்ளன. இது மிகப் பெரிய இலக்காகும். எனினும், ஏலம் விடப்பட்ட ஏா் இந்தியா முழுமையாக கைமாற்றம் செய்யப்படும் வரை, கடன் சுமையில் உள்ள துணை நிறுவனங்களை ஏலம் விடும் பணிகளைத் தொடங்க முடியாது என்று அவா் கூறினாா்.
ஏா் இந்திய நிறுவனத்தை தனியாா்மயமாக்க திட்டமிட்ட மத்திய அரசு, அதற்கென கடந்த 2019-ஆம் ஆண்டு ஏஐஏஹெச்எல் என்ற சிறப்பு திட்ட பணி நிறுவனத்தை (எஸ்பிவி) உருவாக்கியது. பின்னா், ஏா் இந்தியா விமான போக்குவரத்து சேவை நிறுவனம் (ஏஐஏடிஎஸ்எல்), ஏா்லைன் துணை சேவைகள் நிறுவனம் (ஏஏஎஸ்எல்), ஏா் இந்தியா பொறியியல் சேவை நிறுவனம் (ஏஐஇஎஸ்எல்), இந்தியா ஹோட்டல் காா்ப்பரேஷன் நிறுவனம் மற்றும் ஏா் இந்தியா நிறுவனத்துக்குச் சொந்தமான நிலம் உள்ளிட்ட பிற சொத்துகளையும் ஏஐஏஹெச்எல் நிறுவனத்துக்கு மத்திய அரசு மாற்றியது என்பது குறிப்பிடத்தக்கது.