பிரதமா் நரேந்திர மோடி ஜனநாயகரீதியில் செயல்படும் தலைவா்; மற்றவா்களின் கருத்துகளையும் பொறுமையாக கேட்டு ஆட்சி நடத்தி வருகிறாா் என்று உள்துறை அமைச்சா் அமித் ஷா புகழாரம் சூட்டியுள்ளாா்.
சன்சத் தொலைக்காட்சிக்கு ஞாயிற்றுக்கிழமை அளித்த பேட்டியில், பிரதமா் மோடி எதேச்சாதிகாரப் போக்குடன் செயல்படுகிறாா் என்று எதிா்க்கட்சியினா் கூறி வரும் குற்றச்சாட்டை அமித் ஷா மறுத்தாா். அவா் மேலும் கூறியதாவது:
மற்றவா்களின் கருத்துகளைப் பொறுமையாகக் கேட்டபவா்களில் பிரதமா் நரேந்திர மோடியைப் போல எவரையும் நான் பாா்த்தது இல்லை. கட்சியிலும், ஆட்சியிலும் ஒருவா் எந்தப் பதவியில் இருந்தாலும், அவா் தெரிவிக்கும் கருத்து சிறப்பானதாக இருந்தால் அதற்கு மோடி உரிய முக்கியத்துவம் கொடுப்பாா்.
நாட்டின் நலன் கருதி அரசியல் ரீதியாக துணிவான முடிவுகளை எடுக்க அவா் தயங்கியதே கிடையாது. மக்களின் நலனுக்காக அவா் சில கசப்பான முடிவுகளையும் எடுத்துள்ளாா். அவா் பணியாற்றும் முறையை மிகவும் அருகில் இருந்து பல ஆண்டுகளாகப் பாா்த்து வருபவன் என்ற முறையில் இதைக் கூறுகிறேன். அவா் தனது எந்த முடிவையும் மற்றவா்கள் மீது திணித்ததில்லை.
நமது பிரதமருடன் இணைந்து பணியாற்றியவா்களில் சிலா் பின்னா் அவா் மீது குறையும் கூறியுள்ளனா். ஆனால், மத்திய அமைச்சரவைக் கூட்டம் இந்த அளவுக்கு ஜனநாயகமாக நடந்ததை பாா்த்ததில்லை என்பதே அவா்களின் கருத்தாக உள்ளது. மோடி பிரதமரான பிறகுதான் அமைச்சரவைக் கூட்டம் ஜனநாயக முறைப்படி நடக்கிறது. அவரது தலைமையில் நடைபெறும் அனைத்துக் கூட்டங்களிலும் அனைவரது கருத்துகளும் கேட்கப்பட்டு விவாதிக்கப்பட்டுதான் முடிவுகள் எடுக்கப்படும். இந்த வகையில் மோடி ஜனநாயக ரீதியில் செயல்படும் சிறந்த தலைவா்.
தேசத்தின் நலன் கருதியும் மக்கள் நலன் கருதியும் கட்சியில் உள்ளவா்களுக்கு எதிராகவும் அவா் கடுமையான நடவடிக்கைகளை எடுத்துள்ளாா். நாட்டின் நலனே அனைத்தையும்விட முக்கியம் என்ற நோக்கில் அவா் அளவுக்கு வேறு யாரும் கடினமான முடிவுகளை எடுத்ததில்லை.
கருப்புப் பண ஒழிப்பு, பொருளாதார சீா்திருத்த நடவடிக்கைகள், வரி ஏய்ப்பு தடுப்பு ஆகிய நடவடிக்கைகளின்போது எங்கள் கட்சிக்குப் பல ஆண்டுகளாக வாக்களித்து வந்தவா்கள் பலரும் பாதிக்கப்பட்டனா். ஆனால், தேச நலனுக்காகவே மோடி இந்த நடவடிக்கையை எடுத்தாா் என்பதை அவா்கள் புரிந்து கொண்டனா். அவா்கள் இப்போதும் மோடியின் ஆதரவாளா்களாகவே உள்ளனா்.
எதிா்க்கட்சிகளில் இருக்கும் சிலா், ஆட்சி அதிகாரத்தில் இருப்பது தங்களுடைய பிறப்புரிமை என்பதுபோல செயல்பட்டனா். ஆனால், இந்தப் போக்கை மோடி மாற்றினாா். மக்களையும் தேச நலனையும் முன்னிலைப்படுத்திய ஆட்சி அமைப்பை அவா் உருவாக்கியுள்ளாா்.
எங்கள் ஆட்சியைக் குறை கூறும் எதிா்க்கட்சி நண்பா்களிடம் ஒன்றை மட்டும் கேட்டுக் கொள்கிறேன். அரசின் கொள்கைகளை விமா்சிக்கும் அவா்களால், எங்கள் மீது ஏதாவது ஊழல் குற்றச்சாட்டைக் கூற முடியுமா? எங்கள் ஆட்சியில் ஏதேனும் குறைகள் இருந்தால் அதனை மக்களிடம் அம்பலப்படுத்த எதிா்க்கட்சியினா் தாராளமாக முயற்சிக்கலாம். ஆனால், தரக்குறைவான அரசியல் நிலைப்பாட்டுக்கு வருவதும், தனிப்பட்ட முறையில் விமா்சிப்பதும் கூடாது என்றாா் அமித் ஷா.