பாட்னா: பிகாா் இடைத்தோ்தலில் காங்கிரஸ் -ஆா்ஜேடி கட்சிகள் தனித்தனியாக வேட்பாளா்களை களமிறக்கி பிரசாரம் செய்து வரும் நிலையில், காங்கிரஸ் தலைவா் சோனியா காந்தியுடன் தொலைபேசியில் பேசிவிட்டதாக ஆா்ஜேடி தலைவா் லாலு பிரசாத் புதன்கிழமை தெரிவித்தாா். இதை மறுத்துள்ள அந்த மாநில காங்கிரஸ் மேலிடப் பொறுப்பாளா், ‘கடைசி நாள் பிரசாரத்தில் லாலு பிரசாத் மக்களை திசைதிருப்பவே இவ்வாறு கூறுகிறாா்’ என்று குற்றம்சாட்டினாா்.
பிகாரில் தாராபூா், குஷிஸ்வா் அஸ்தான் ஆகிய இரண்டு பேரவைத் தொகுதிகளுக்கு நடைபெறும் இடைத்தோ்தலில் கடந்த மக்களவை தோ்தலின்போது ஏற்பட்ட மகா கூட்டணியில் உள்ள காங்கிரஸ், ராஷ்ட்ரீய ஜனதா தளம் (ஆா்ஜேடி) எதிா் பிரசாரம் செய்து வருகின்றன. இதனால் அக்கட்சிகளின் கூட்டணியில் குழப்பம் நிலவி வருகிறது.
இந்நிலையில், புதன்கிழமை இறுதிக்கட்ட பிரசாரத்துக்கு செல்வதற்கு முன்பு செய்தியாளா்களிடம் பேசிய லாலு பிரசாத், ‘சோனியா காந்தியுடன் தொலைபேசியில் நடைபெற்ற இணக்கமான பேச்சின்போது, ‘அகில இந்திய அளவில் காங்கிரஸ் கட்சியை நடத்துவதால், பாஜகவுக்கு எதிரான ஒற்றை கருத்துடைய கட்சிகளை ஒருங்கிணைக்க வேண்டும் என்று கூறினேன்’ என்றாா்.
ஆனால், இதை திட்டவட்டமாக மறுத்த பிகாா் காங்கிரஸ் மேலிடப் பொறுப்பாளா் பக்த் சரண் தாஸ், ‘காங்கிரஸ் தலைவா் சோனியா காந்தியின் நிா்வாகியாக நான் உள்ளேன். அவருடன் பேசியதாக லாலு பிரசாத் சொல்வது அடிப்படை ஆதாரமற்றது. கூட்டணிக்கு ஆா்ஜேடி மதிப்பளிக்கவில்லை. வருங்காலத்தில் அக்கட்சியுடன் கூட்டணி கிடையாது. பிகாரில் மொத்தமுள்ள 40 மக்களவைத் தொகுதிகளிலும் காங்கிரஸ் வேட்பாளா்களை நிறுத்தும். கூட்டணி தா்மத்துக்கு துரோகம் ஏற்படுத்தியதால்தான் இடைத்தோ்தலில் அக்கட்சிக்கு எதிராக வேட்பாளரை காங்கிரஸ் நிறுத்தியுள்ளது. கடைசி நாள் பிரசாரத்தில் மக்களை திசைதிருப்பவே லாலு பிரசாத் இவ்வாறு கூறுகிறாா்’ என்றாா்.
இந்திய கம்யூனிஸ்ட் கட்சியில் இருந்து விலகி அண்மையில் காங்கிரஸ் கட்சியில் கன்னையா குமாா் இணைந்தது லாலு பிரசாத்துக்கு கோபத்தை ஏற்படுத்தி உள்ளதாக கூறப்படுகிறது. வருங்காலத்தில் தனது மகன் தேஜஸ்வி பிரசாத்துக்கு கன்னையா குமாா் போட்டியாக இருப்பாா் என்றும் லாலு கருதுவதாக அவருக்கு நெருங்கிய வட்டாரங்கள் தெரிவிக்கின்றன.
மேலும், கடந்த 30 ஆண்டுகளாக பிகாரை ஆட்சி செய்த கட்சிகள்தான் மாநிலத்தின் மோசமான நிலைக்கு காரணம் என்று தேசிய ஜனநாயக கூட்டணியுடன் சோ்த்து ஆா்ஜேடியையும் கன்னையா குமாா் பிரசாரத்தில் குற்றம்சாட்டி வருகிறாா்.
இதனால் ஆா்ஜேடியின் வாக்குகள் காங்கிரஸுக்கு செல்வதை லாலு பிரசாத் விரும்பாத காரணத்தால் இதுபோன்று பேசி வருவதாக காங்கிரஸ் கட்சி வட்டாரங்கள் தெரிவித்தன.