பாட்னா: பிகாரில் கடந்த 2013-இல் நிகழ்த்தப்பட்ட தொடா் குண்டுவெடிப்பு சம்பவம் தொடா்பான வழக்கில் 9 போ் குற்றவாளிகள் என்று தேசிய புலனாய்வு அமைப்பின்(என்ஐஏ) சிறப்பு நீதிமன்றம் புதன்கிழமை தீா்ப்பளித்தது. வழக்கில் இருந்து ஒருவா் விடுவிக்கப்பட்டாா்.
பிகாா் தலைநகா் பாட்னாவில் உள்ள காந்தி மைதானத்தில் கடந்த 2013-ஆம் ஆண்டு அக்டோபா் 27-ஆம் தேதி அப்போதைய குஜராத் முதல்வரும் பிரதமா் வேட்பாளருமான நரேந்திர மோடி பங்கேற்ற பொதுக்கூட்டத்துக்கு பாஜக ஏற்பாடு செய்திருந்தது. 2014-ஆம் ஆண்டின் மக்களவைத் தோ்தலையொட்டி அந்தப் பொதுக்கூட்டம் நடத்தப்பட்டது. கூட்டம் நடந்த இடத்துக்கு அருகே பல இடங்களில் குண்டு வெடித்தது. இதில், 6 போ் உயிரிழந்தனா். அப்போது ஏற்பட்ட கூட்ட நெரிசலில் சிக்கி பலா் காயமடைந்தனா்.
இந்த சம்பவம் தொடா்பாக என்ஐஏ வழக்குப் பதிவு செய்து விசாரணை நடத்தி11 போ் மீது சிறப்பு நீதிமன்றத்தில் குற்றப்பத்திரிகை தாக்கல் செய்தது.
அவா்களில் ஒருவா் 18 வயதுக்கு உள்பட்டவா் என்பதால், அவா் மீதான விசாரணை சிறாா் நீதிமன்றத்துக்கு மாற்றப்பட்டது. மற்ற 10 போ் மீதான வழக்கை விசாரித்த சிறப்பு நீதிமன்றம் புதன்கிழமை தீா்ப்பளித்தது. இதுகுறித்து என்ஐஏ தரப்பு சிறப்பு வழக்குரைஞா் லலன் பிரசாத் கூறுகையில், ‘வழக்கில் 9 பேரை குற்றவாளிகள் என நீதிபதி குா்வீந்தா் மெஹரோத்ரா தீா்ப்பளித்தாா். இவா்களுக்கான தண்டனை நவம்பா் 1-ஆம் தேதி அறிவிக்கப்படும். போதிய ஆதாரங்கள் இல்லாததால் குற்றம்சாட்டப்பட்டிருந்த ஒருவா் வழக்கில் இருந்து விடுவிக்கப்பட்டாா்’ என்றாா்.