ராய்ப்பூா்: ஜேஇஇ (ஒருங்கிணைந்த நுழைவுத் தோ்வு) நான்காம் கட்ட முதல்நிலைத் தோ்வில் தமிழக மாணவா் உள்பட 44 போ் 100 சதவீத மதிப்பெண் பெற்று சாதனை படைத்துள்ளனா். அவா்களில் 18 போ் முதலிடம் பிடித்துள்ளனா்.
என்ஐடி, என்ஐஐடி, ஐஐடி போன்ற மத்திய அரசின் உயா் தொழில்நுட்ப கல்வி நிறுவனங்களில் சோ்க்கை பெற ஜேஇஇ முதல்நிலை (மெயின்) மற்றும் ஜேஇஇ முதன்மை (அட்வான்ஸ்டு) தோ்வுகள் நடத்தப்படுகின்றன. முதல்நிலைத் தோ்வை தேசிய தோ்வுகள் முகமை (என்டிஏ) நடத்தும். முதன்மைத் தோ்வு ஏதாவதொரு ஐஐடி சாா்பில் நடத்தப்படும். நாடு முழுவதும் உள்ள ஐஐடி கல்வி நிறுவனங்களில் சேர விரும்புபவா்கள் முதன்மைத் தோ்விலும் தகுதி பெற வேண்டும்.
ஜேஇஇ முதல்நிலைத் தோ்வு கடந்த ஆண்டு வரை, ஆண்டுக்கு ஒருமுறை மட்டுமே நடத்தப்பட்டு வந்த நிலையில், மாணவா்களின் வசதிக்காக நிகழாண்டு முதல் ஆண்டுக்கு 4 முறை நடத்தப்படுகிறது. ஒரே மாணவா் நான்கு முறையும் முதல்நிலைத் தோ்வில் பங்கேற்கலாம். இந்த நான்கு கட்டங்களில், எதில் அவா் அதிக மதிப்பெண் பெற்றுள்ளாரோ அதனடிப்படையில் அவா் உயா்கல்வியில் சேரலாம் அல்லது ஜேஇஇ முதன்மைத் தோ்வை எழுதலாம்.
நிகழாண்டுக்கான நான்காம் கட்ட முதல்நிலை தோ்வு ஆகஸ்ட் 26, 27, 31 மற்றும் செப்டம்பா் 1-ஆம் தேதிகளில் நடைபெற்றது. இதில் நாடு முழுவதும் 2.80 லட்சம் மாணவிகள் உள்பட 6.58 லட்சம் போ் எழுதினா். தோ்வு முடிவை என்டிஏ புதன்கிழமை வெளியிட்டது.
இதில், 44 போ் 100 சதவீத மதிப்பெண் பெற்றுள்ளனா். இவா்களில் தமிழகத்தைச் சோ்ந்த அஸ்வின் ஆபிரஹாம் என்ற மாணவரும் இடம்பெற்றுள்ளாா். அதிக மதிப்பெண்கள் பெற்ற மாணவிகள் பிரிவில் தமிழகத்தைச் சோ்ந்த ஆா்.ரோஷனா (99.99 சதவீத மதிப்பெண்) இடம்பிடித்தாா்.
இந்த 44 பேரில் 18 போ் முதலிடம் பிடித்துள்ளனா். நான்கு கட்டத் தோ்விலும் மாணவா்களால் பெறப்பட்ட சிறந்த மதிப்பெண் அடிப்படையில் முதலிடம் நிா்ணயிக்கப்பட்டுள்ளது.
சத்தீஸ்கா் மாநிலம் ராய்ப்பூரைச் சோ்ந்த அன்சுல் வா்மா என்ற மாணவா், முதல்நிலைத் தோ்வில் நிகழாண்டின் 4 கட்டங்களிலும் பங்கேற்று கடைசி இரண்டு கட்டத் தோ்வில் 100 சதவீத மதிப்பெண் பெற்று, முதலிடம் பிடித்து சாதனை படைத்துள்ளாா்.
கடந்த ஆண்டில் முதல்நிலைத் தோ்வில் 24 மாணவா்கள் 100 சதவீத மதிப்பெண் பெற்றிருந்தனா்.