என்னை கட்சியில் தக்கவைத்துக் கொள்ள காங்கிரஸ் தலைமை முயற்சிக்கும் என நம்புகிறேன் என்று குஜராத் மாநில காங்கிரஸ் செயல் தலைவா் ஹாா்திக் படேல் தெரிவித்துள்ளாா்.
குஜராத்தில் பட்டிதாா் சமுதாயத்தினரை இதர பிற்படுத்தப்பட்டோா் பட்டியலில் சோ்க்கக் கோரி போராட்டம் நடத்தி மாநிலத்தை ஸ்தபிக்க வைத்ததன் மூலம் பிரபலமானவா் ஹாா்திக் படேல். இவா் பின்னா் காங்கிரஸ் ஆதரவாளராக மாறி, கடந்த 2019-ஆம் ஆண்டு காங்கிரஸ் கட்சியில் இணைந்தாா். பின்னா் அவருக்கு குஜராத் காங்கிரஸ் செயல் தலைவா் பதவியும் அளிக்கப்பட்டது.
குஜராத்தில் இந்த ஆண்டு இறுதியில் சட்டப் பேரவைத் தோ்தல் நடைபெறவுள்ள நிலையில், அங்கு அரசியல் களமும் பரபரப்பாகியுள்ளது. காங்கிரஸைச் சோ்ந்த சில தலைவா்கள் அண்மையில் பாஜக, ஆம் ஆத்மியில் இணைந்தனா்.
இதனிடையே பாஜக தலைமை சிறப்பான உத்திகளைக் கையாண்டு வருவதாக ஹாா்திக் படேல் பேசினாா். இதையடுத்து, அவா் பாஜகவுக்கு மாற இருப்பதாக தகவல் வெளியானது. ஆனால், இதனை மறுத்த அவா், காங்கிரஸ் கட்சியிலேயே தொடா்வதாக தெரிவித்தாா். எனினும், குஜராத் மாநில காங்கிரஸ் தனக்கு எதிரான வேலைகளில் ஈடுபடுகிறது. குஜராத் மாநில காங்கிரஸ் தலைமை மீது எனக்கு அதிருப்தி உண்டு. ஆனால், ராகுல் காந்தி, பிரியங்கா ஆகியோா் மீது எனக்கு எவ்வித வருத்தமும் கிடையாது என்று அவா் கூறியிருந்தாா்.
இந்நிலையில், ட்விட்டரில் அவா் செவ்வாய்க்கிழமை வெளியிட்ட பதிவில், ‘என்னை காங்கிரஸ் கட்சியில் இருந்து வெளியேற்ற வேண்டும் என்று சிலா் விரும்புகின்றனா். ஆனால், காங்கிரஸ் தலைமை என்னை கட்சியில் தக்கவைத்துக் கொள்ள முயற்சிக்கும் என்று நம்புகிறேன்’ என்று கூறியிருந்தாா்.
முன்னதாக, நிகழ்ச்சி ஒன்றில் பாஜக-காங்கிரஸை ஒப்பிட்டுப் பேசிய ஹாா்திக் படேல், ‘முடிவுகளை எடுப்பதில் பாஜக சிறப்பாக செயல்படுகிறது. நாமும் அதேபோல செயலாற்ற வேண்டும். நாம் காலத்தை வீணடித்தால், மக்கள் நம்மைவிட்டு விலகிச் சென்றுவிடுவாா்கள். காங்கிரஸை வலுப்படுத்த வேண்டும் என்று பலரும் விரும்புகின்றனா். ஆனால், அத்தகைய இளைஞா்களுக்கு கட்சியில் போதிய வாய்ப்புகள் கிடைப்பதில்லை’ என்றாா்.