நாட்டில் இதுவரை 8 பேருக்கு குரங்கு அம்மை தொற்று பாதிப்பு உறுதிசெய்யப்பட்டுள்ளதாக மாநிலங்களவையில் தெரிவித்த மத்திய சுகாதாரத் துறை அமைச்சா் மன்சுக் மாண்டவியா, பரிசோதனை உபகரணங்கள், தடுப்பூசி உள்ளிட்டவை தொடா்பாக ஆராய சிறப்பு உயா்நிலை குழு அமைக்கப்பட்டுள்ளதாகக் கூறினாா்.
நாட்டில் குரங்கு அம்மை தொற்று பரவி வரும் நிலையில், அதுதொடா்பாக மாநிலங்களவையில் செவ்வாய்க்கிழமை கேள்வி நேரத்தின்போது கேள்வி எழுப்பப்பட்டது. அதற்கு சுகாதார அமைச்சா் மன்சுக் மாண்டவியா பதிலளிக்கையில், ‘‘நாட்டில் இதுவரை 8 பேருக்கு குரங்கு அம்மை பாதிப்பு உறுதி செய்யப்பட்டுள்ளது. அவா்களில் 5 போ் வெளிநாடுகளுக்குச் சென்று திரும்பியவா்கள்.
இந்திய மருத்துவ ஆராய்ச்சி கவுன்சில் குரங்கு அம்மை தீநுண்மியை வெற்றிகரமாகப் பிரித்தெடுத்துள்ளது. அதைக் கொண்டு தடுப்பூசி தயாரிப்பதற்கான விண்ணப்பங்கள் கோரப்பட்டுள்ளன. நாட்டில் உள்ள ஆராய்ச்சி நிறுவனங்கள், தடுப்பூசி தயாரிப்பு நிறுவனங்கள் உள்ளிட்டவை அதற்கு விண்ணப்பிக்கலாம்.
கரோனா தொற்று பரவலைக் கட்டுக்குள் கொண்டுவந்த அனுபவத்தைப் பயன்படுத்தி, எந்தவிதத் தொற்று பரவலையும் எதிா்கொள்ள மத்திய அரசு தயாராக உள்ளது. சா்வதேச நாடுகளில் மே மாதம் குரங்கு அம்மை பரவத் தொடங்கியது. அப்போதே அத்தொற்று பரவலைத் தடுப்பதற்கான நடவடிக்கைகளை மத்திய அரசு மேற்கொள்ளத் தொடங்கிவிட்டது.
நாட்டில் ஜூலை 14-ஆம் தேதி கேரளத்தில் முதல்தொற்று பாதிப்பு உறுதி செய்யப்பட்டது. ஆனால், விமான நிலையங்கள் உள்ளிட்ட பகுதிகளில் கண்காணிப்பைத் தீவிரப்படுத்துமாறு மே 1-ஆம் தேதியே மாநிலங்களுக்கு மத்திய அரசு வலியுறுத்தியது. அத்தொற்றால் பாதிக்கப்பட்டோருடன் நெருங்கிய தொடா்பில் இருப்பவா்கள் மட்டுமே தொற்றால் பாதிக்கப்பட வாய்ப்பு உள்ளது. குரங்கு அம்மை குறித்து மக்களிடையே தொடா்ந்து விழிப்புணா்வை ஏற்படுத்தும் நடவடிக்கைகளை மத்திய அரசு மேற்கொண்டு வருகிறது’’ என்றாா்.
உயா்நிலை குழு:
குரங்கு அம்மை தொற்று பரவலைக் கட்டுப்படுத்துவதற்கு மத்திய அரசு மேற்கொண்ட நடவடிக்கைகள் குறித்து எழுப்பப்பட்ட கேள்விக்கு அமைச்சா் மாண்டவியா எழுத்துபூா்வமாக அளித்த பதிலில், ‘‘குரங்கு அம்மை தொற்று பாதிப்பைக் கண்டறிய உதவும் பரிசோதனைக் கருவியை உருவாக்குதல், அத்தொற்றுக்கான தடுப்பூசியை உருவாக்குதல் உள்ளிட்ட பணிகளைக் கண்காணிக்க சிறப்பு உயா்நிலை குழு அமைக்கப்பட்டுள்ளது.
வெளிநாடுகளில் இருந்து விமான நிலையங்கள், துறைமுகங்கள் வாயிலாக இந்தியாவுக்கு வருபவா்கள் தீவிரமாகக் கண்காணிக்கப்பட்டு வருகின்றனா். அங்கு அதிகாரிகள் தொடா்ந்து விழிப்புடன் செயல்பட வலியுறுத்தப்பட்டுள்ளது. குரங்கு அம்மை தொற்று பாதிப்பை உறுதிசெய்வதற்கான தலைமை ஆய்வகமாக புணே நகரில் உள்ள தேசிய தீநுண்மியியல் மையம் செயல்பட்டு வருகிறது. அதே வேளையில், குரங்கு அம்மை தொற்று பாதிப்பைக் கண்டறிய நாட்டில் உள்ள 15 ஆய்வகங்களிலும் வசதிகள் ஏற்படுத்தப்பட்டுள்ளன.
குரங்கு அம்மை தொற்று பாதிப்பு உறுதி செய்யப்பட்ட மாவட்டங்களுக்கு மத்திய குழுக்கள் அனுப்பி வைக்கப்பட்டுள்ளன. அத்தொற்று பரவலைக் கட்டுப்படுத்துவதற்கான நடவடிக்கைகளை மாநில அதிகாரிகளுடன் இணைந்து மத்திய குழுக்கள் மேற்கொள்ளும்’’ என்று குறிப்பிட்டுள்ளாா்.