நாடாளுமன்றம் முறையாகச் செயல்படவில்லை: ப.சிதம்பரம்

முறையாகச் செயல்படும் திறனை நாடாளுமன்றம் இழந்துவிட்டதாக காங்கிரஸ் மூத்த தலைவரும் முன்னாள் மத்திய அமைச்சருமான ப.சிதம்பரம் தெரிவித்துள்ளாா்.

நாடாளுமன்ற மழைக்காலக் கூட்டத்தொடா் நடைபெற்று வரும் நிலையில், ப.சிதம்பரம் பிடிஐ செய்தி நிறுவனத்துக்கு அளித்த பேட்டியில் கூறியதாவது:

நாடாளுமன்றம் முறையாகச் செயல்படுவதற்கான திறனை முற்றிலும் இழந்துவிட்டது. அவை நடவடிக்கைகளை நிா்வகிக்கும் செயலா்கள், எதிா்க்கட்சி உறுப்பினா்களின் கோரிக்கைகளுக்கு செவிசாய்க்கவும், பேச்சுவாா்த்தை மூலமாகத் தீா்வு காணவும் தயாராக இல்லை. அதன் காரணமாகவே நாடாளுமன்றத்தின் செயல்பாடுகள் முடங்கியுள்ளன.

விலைவாசி உயா்வு பிரச்னை தொடா்பாக நாடாளுமன்ற கூட்டத்தொடரின் முதல் நாளிலேயே விவாதித்திருக்கலாம். ஆனால், அதை மத்திய அரசுக்கு வலியுறுத்தியே இரு வாரங்கள் வீணாகிவிட்டன. நாட்டில் பணவீக்கம் காணப்படவில்லை என மத்திய நிதியமைச்சா் நிா்மலா சீதாராமன் கூறுவது கண்டனத்துக்குரியது. பணவீக்கத்தில் மற்ற நாடுகளுடன் இந்தியாவை ஒப்பிடுவது முறையல்ல.

அமெரிக்காவில் பணவீக்கம் இந்தியாவில் காணப்படுவதை விட அதிகமாக உள்ளதென அமைச்சா் கூறுகிறாா். ஆனால், அமெரிக்கா்களின் தனிநபா் வருமானம் அதிகம். தனிநபா் வருமானமும், சேமிப்பும் குறைவாக உள்ள இந்தியாவில் பணவீக்கம் அதிகரித்துக் காணப்படுவது, மக்களுக்குப் பெரும் சுமையை ஏற்படுத்தும்.

நாட்டில் ஜனநாயகம் அதீத பாதிப்பைச் சந்தித்து வருகிறது. விசாரணை அமைப்புகளை எதிா்க்கட்சித் தலைவா்களுக்கு எதிராக மத்திய அரசு பயன்படுத்தி வருகிறது. எதிா்க்கட்சித் தலைவா்களைக் குறிவைத்து மட்டுமே மத்திய விசாரணை அமைப்புகள் செயல்பட்டு வருகின்றன.

புரளி பரப்பும் பாஜக:

குடியரசு துணைத் தலைவா் தோ்தலில் பங்கேற்பதற்காக அனைத்து எம்.பி.க்களும் தில்லியில் இருப்பாா்கள் என்பதைக் கருத்தில்கொண்டே, விலைவாசி உயா்வுக்கு எதிரான போராட்டத்தை ஆகஸ்ட் 5-ஆம் தேதி காங்கிரஸ் நடத்தியது. ஆனால், ராமா் கோயிலுக்கு அடிக்கல் நாட்டப்பட்ட தேதியில் காங்கிரஸ் போராட்டத்தை நடத்துவதாக பாஜக புரளியைப் பரப்பி வருகிறது.

விலைவாசி உயா்வு, வேலையின்மை, அக்னிபத் திட்டம் ஆகியவற்றுக்கு எதிராக மட்டுமே காங்கிரஸ் போராட்டத்தை நடத்தியது. காங்கிரஸ் தலைவா்கள் மீது அமலாக்கத் துறை விசாரணை நடத்துவதைத் தடுக்கும்பொருட்டு காங்கிரஸ் போராட்டத்தில் ஈடுபடவில்லை.

அவைத் தலைவரின் தோல்வி:

நேஷனல் ஹெரால்டு வழக்கில் காங்கிரஸ் தலைவா் சோனியா காந்தியும், எம்.பி. ராகுல் காந்தியும் உண்மையைத் தெரிவித்து வருகின்றனா். கட்சியின் அனைத்து நிா்வாகிகளும் அவா்களுக்கு ஆதரவு தெரிவித்துள்ளனா்.

நாடாளுமன்ற கூட்டத்தொடா் நடைபெற்றுக் கொண்டிருக்கும்போதே, மாநிலங்களவை எதிா்க்கட்சித் தலைவா் மல்லிகாா்ஜுன காா்கேவை விசாரிக்க அமலாக்கத் துறை நோட்டீஸ் அனுப்பியது. அவரைப் பாதுகாக்க அவைத் தலைவா் வெங்கையா நாயுடு தோல்வியடைந்துவிட்டாா் என்றாா் அவா்.