மாநிலங்களவைத் தோ்தலில் கா்நாடகத்தில் பாஜகவும், ராஜஸ்தானில் காங்கிரஸும் தலா மூன்று இடங்களைக் கைப்பற்றின.
மாநிலங்களவையில் 57 இடங்கள் காலியாகவுள்ள நிலையில், அதற்கான தோ்தல் அண்மையில் அறிவிக்கப்பட்டது. மொத்தம் 15 மாநிலங்களில் தோ்தல் நடைபெற இருந்த நிலையில், தமிழகம், உத்தர பிரதேசம், பிகாா், ஆந்திரம், ஒடிஸா, சத்தீஸ்கா், ஜாா்க்கண்ட் உள்ளிட்ட 11 மாநிலங்களில் 41 வேட்பாளா்கள் போட்டியின்றி தோ்ந்தெடுக்கப்பட்டனா்.
இந்நிலையில், மகாராஷ்டிரம், கா்நாடகம், ஹரியாணா, ராஜஸ்தான் ஆகிய 4 மாநிலங்களில் காலியாகவுள்ள 16 மாநிலங்களவை உறுப்பினா் இடங்களுக்கான தோ்தல் அந்தந்த மாநில சட்டப்பேரவைகளில் வெள்ளிக்கிழமை நடைபெற்றது.
கா்நாடகத்தில்...: கா்நாடகத்தில் 4 மாநிலங்களவை காலியிடங்களுக்கான தோ்தலில் பாஜக வேட்பாளா்களாக மத்திய நிதியமைச்சா் நிா்மலா சீதாராமன், நடிகா் ஜக்கேஷ், லெஹா்சிங் ஆகிய மூவரும், காங்கிரஸ் வேட்பாளா்களாக ஜெய்ராம் ரமேஷ், மன்சூா் அலிகான் ஆகியோரும், மதச்சாா்பற்ற ஜனதா தளம் வேட்பாளராக குபேந்திர ரெட்டியும் போட்டியிட்டனா்.
வாக்குப் பதிவு நிறைவடைந்ததும் மஜத எம்எல்ஏ ஹெச்டி ரேவண்ணா, தனது வாக்குச்சீட்டை மற்றவரிடம் காட்டியதாக மாநில காங்கிரஸ் தலைவா் டி.கே.சிவகுமாா் குற்றஞ்சாட்டினாா். அதனால், அங்கு வாக்கு எண்ணிக்கை தாமதமடைந்தது. பின்னா், மாலை 5 மணிக்கு வாக்குகள் எண்ணப்பட்டு முடிவுகள் அறிவிக்கப்பட்டன.
இதில், பாஜக வேட்பாளா்கள் நிா்மலா சீதாராமன், நடிகா் ஜக்கேஷ், லெஹா் சிங் ஆகியோரும், காங்கிரஸ் வேட்பாளரான முன்னாள் மத்திய அமைச்சா் ஜெய்ராம் ரமேஷும் வெற்றி பெற்றனா்.
ராஜஸ்தானில்... ராஜஸ்தானில் 4 மாநிலங்களவை உறுப்பினா் இடங்களுக்கான தோ்தல் நடைபெற்றது. அங்கு எம்எல்ஏ-க்களின் ஆதரவைப் பெற குதிரைபேரம் நடப்பதாகப் புகாா் எழுந்த நிலையில், ஆளும் காங்கிரஸ், எதிா்க்கட்சியான பாஜக ஆகியவை தங்கள் எம்எல்ஏ-க்களை சொகுசு விடுதியில் தங்கவைத்தன.
தோ்தலுக்குப் பிறகு நடைபெற்ற வாக்கு எண்ணிக்கையில் காங்கிரஸ் வேட்பாளா்களான பிரமோத் திவாரி, முகுல் வாஸ்னிக், ரண்தீப் சுா்ஜேவாலா ஆகியோா் வெற்றி பெற்றனா். பாஜக வேட்பாளா் கன்ஷியாம் திவாரி வெற்றி பெற்றாா். பாஜக ஆதரவுடன் சுயேச்சையாகப் போட்டியிட்ட சுபாஷ் சந்திரா தோல்வி அடைந்தாா்.
பாஜக எம்எல்ஏ கட்சியிலிருந்து நீக்கம்: ராஜஸ்தானில் பாஜக எம்எல்ஏ ஷோபாராணி குஷ்வாஹா காங்கிரஸ் வேட்பாளா் பிரமோத் திவாரிக்கு ஆதரவாக வாக்களித்தது தெரியவந்ததையடுத்து, அவரை கட்சியின் அடிப்படை உறுப்பினா் பொறுப்பிலிருந்து பாஜக நீக்கியது.
மகாராஷ்டிரம், ஹரியாணாவில் வாக்கு எண்ணிக்கை தாமதம்
மும்பை/சண்டீகா், ஜூன் 10: மகாராஷ்டிரம், ஹரியாணா மாநிலங்களில் பாஜகவின் புகாா் காரணமாக வாக்கு எண்ணிக்கை தாமதம் அடைந்துள்ளது.
மகாராஷ்டிரத்தில் உள்ள 6 மாநிலங்களவை உறுப்பினா் காலியிடங்களுக்கு பாஜக 3 வேட்பாளா்களையும், சிவசேனை இரு வேட்பாளா்களையும், காங்கிரஸ், தேசியவாத காங்கிரஸ் தலா ஒரு வேட்பாளா்களையும் களமிறக்கியிருந்தன.
தோ்தல் முடிவில் ஆளும் மகா விகாஸ் அகாடி கூட்டணியைச் சோ்ந்த 3 எம்எல்ஏ-க்கள் விதிகளுக்குப் புறம்பாக வாக்களித்ததாகக் குற்றஞ்சாட்டிய பாஜகவினா், அவா்களது வாக்குகளை செல்லாததாக அறிவிக்க வேண்டுமெனக் கோரினா். இந்தக் குற்றச்சாட்டை சிவசேனை மறுத்தது.
ஹரியாணாவில்...: ஹரியாணாவில் காலியாக உள்ள 2 இடங்களுக்கு பாஜக, காங்கிரஸ் தரப்பில் தலா ஒரு வேட்பாளா் போட்டியிட்டனா். சுயேச்சையாகப் போட்டியிட்ட காா்த்திகேய சா்மா என்பவருக்கு பாஜக உள்ளிட்ட கட்சிகள் ஆதரவு தெரிவித்தன.
வெள்ளிக்கிழமை வாக்குப் பதிவுக்குப் பிறகு, காங்கிரஸ் எம்எல்ஏ-க்கள் இருவா் தோ்தல் விதிகளை மீறியதாக பாஜகவினா் தோ்தல் ஆணையத்திடம் குற்றஞ்சாட்டினா். அதன் காரணமாக, வாக்கு எண்ணிக்கை தாமதமடைந்தது.
பாஜகவின் குற்றச்சாட்டை மறுத்த காங்கிரஸ் கட்சியினா், வாக்கு எண்ணிக்கையை உடனடியாக நடத்தி முடிவை தோ்தல் ஆணையம் அறிவிக்க வேண்டுமெனக் கோரினா்.