தில்லி சட்டப்பேரவையில் ரூ. 75,800 கோடி மதிப்பிலான பட்ஜெட்டை துணை முதல்வர் மணீஷ் சிசோடியா இன்று (சனிக்கிழமை) தாக்கல் செய்தார்.
பட்ஜெட் உரையின்போது மணீஷ் சிசோடியா கூறியதாவது:
"தில்லியில் கடந்த 7 ஆண்டுகளில் 1.78 லட்சத்துக்கும் மேலான இளைஞர்களுக்கு வேலைவாய்ப்பு கிடைத்துள்ளது. 51,307 பேருக்கு அரசு வேலை கிடைத்துள்ளது. கரோனா பெருந்தொற்றுக்குப் பிறகு தில்லியிலுள்ள தனியார் துறையில் 10 லட்சத்துக்கும் மேற்பட்ட வேலைவாய்ப்புகள் உருவாக்கப்பட்டுள்ளன.
அடுத்த 5 ஆண்டுகளில் 20 லட்சம் புதிய வேலைவாய்ப்புகள் உருவாக்கப்படும். கரோனா தாக்கத்திலிருந்து தில்லியின் பொருளாதாரம் படிப்படியாக மீண்டு வருகிறது. 2011-12இல் நாட்டின் மொத்த உள்நாடு உற்பத்தியில் தில்லியின் பங்கு 3.94 சதவிகிதமாக இருந்தது. 2021-22இல் இது 4.21 சதவிகிதமாக உயர்ந்துள்ளது.
இதையும் படிக்க | ஐரோப்பிய நாடுகளுக்கு நிகராக மாறப் போகும் தில்லி சாலைகள்..
2021-22 நிதியாண்டு பட்ஜெட்டின் அளவு ரூ. 69,000 கோடி. 2022-23 பட்ஜெட்டுக்கு ரூ. 75,800 கோடி ஒதுக்கப்பட்டுள்ளது. 2022-23 பட்ஜெட்டில் உள்ளாட்சி அமைப்புகளுக்கு ரூ. 6,154 கோடி ஒதுக்கப்பட்டுள்ளது.
தில்லி தனிநபர் வருமானத்தின் சராசரி நாட்டின் சராசரியைவிட 2.7 சதவிகிதம் அதிகமாக உள்ளது. தில்லியில் உழைக்கும் மக்களின் எண்ணிக்கை 33 சதவிகிதத்திலிருந்து 45 சதவிகிதமாக அதிகரிக்கப்படவுள்ளது.
தில்லியில் பிரபலமான 5 சந்தைகள் மேம்படுத்தப்பட்டு 1.5 லட்சம் வேலைவாய்ப்புகள் உருவாக்கப்படும். இதற்கென ரூ. 100 கோடி ஒதுக்கப்பட்டுள்ளது."
ஆம் ஆத்மி தாக்கல் செய்யும் தொடர்ச்சியாக 8-வது பட்ஜெட் இது. கடந்த பட்ஜெட்டை காட்டிலும் இந்த பட்ஜெட்டில் 9.86 சதவிகிதம் கூடுதலாக நிதி ஒதுக்கப்பட்டுள்ளது.