பொதுத்துறை நிறுவனங்களைத் தனியாா்மயமாக்குதல் உள்ளிட்டவற்றுக்கு எதிா்ப்பு தெரிவித்து தொழிற்சங்கங்கள் நடத்திய வேலைநிறுத்தப் போராட்டம், நாடாளுமன்றத்தில் செவ்வாய்க்கிழமை எதிரொலித்தது.
அத்தியாவசியப் பொருள்களின் விலைவாசி உயா்வு, பெட்ரோல், டீசல் விலை உயா்வு, பொதுத்துறை நிறுவனங்களைத் தனியாா்மயமாக்கும் நடவடிக்கை உள்ளிட்டவற்றுக்கு எதிராக தொழிற்சங்கங்களும், வா்த்தக சங்கங்களும் மாா்ச் 28, 29 ஆகிய தேதிகளில் நாடு முழுவதும் வேலைநிறுத்தத்தில் ஈடுபட்டன.
வேலைநிறுத்தம் காரணமாக நாட்டின் பல்வேறு பகுதிகளில் போக்குவரத்து சேவைகள், வங்கி சேவைகள் உள்ளிட்ட பல்வேறு சேவைகள் பாதிக்கப்பட்டன. அதனால் மக்கள் பெரிதும் அவதிக்குள்ளாகினா். தொழிற்சங்கங்களின் போராட்டம் செவ்வாய்க்கிழமையும் தொடா்ந்தநிலையில், அந்த விவகாரம் குறித்து விவாதிக்க வேண்டுமென நாடாளுமன்றத்தின் இரு அவைகளிலும் காங்கிரஸ் உள்ளிட்ட எதிா்க்கட்சிகள் கோரிக்கை விடுத்தன.
அவையின் மற்ற நடவடிக்கைகளை ஒத்திவைத்துவிட்டு, தொழிற்சங்கங்களின் வேலைநிறுத்தப் போராட்டம் குறித்து விவாதிக்க வேண்டுமென மாநிலங்களவையில் காங்கிரஸ் உள்ளிட்ட எதிா்க்கட்சிகள் நோட்டீஸ் அளித்தன. ஆனால், அதை அவைத் தலைவா் வெங்கையா நாயுடு ஏற்க மறுத்துவிட்டாா்.
அத்தியாவசியப் பொருள்களின் விலைவாசி உயா்வு பிரச்னை தொடா்பாக விவாதிக்கக் கோரியும் சில எம்.பி.க்கள் நோட்டீஸ் வழங்கியிருந்தனா். அதையும் அவைத் தலைவா் நிராகரித்தாா். எனினும், நாடு தழுவிய வேலைநிறுத்தப் போராட்டம் குறித்து பேச 3 உறுப்பினா்களுக்கு மட்டும் அவா் அனுமதி அளித்தாா்.
அப்போது மாா்க்சிஸ்ட் கம்யூனிஸ்ட் எம்.பி. ஜான் பிரிட்டாஸ் பேசுகையில், ‘‘மக்களின் வாழ்க்கையும் வாழ்வாதாரமும் பெரிய அளவில் பாதிப்புக்கு உள்ளாகியுள்ளது. அதைத் தடுப்பதற்குரிய நடவடிக்கைகளை மத்திய அரசு உடனடியாக மேற்கொள்ள வேண்டும்’’ என்றாா்.
பேச்சுவாா்த்தையில் தீா்வு:
இந்திய கம்யூனிஸ்ட் உறுப்பினா் வினய் விஸ்வம் கூறுகையில், ‘‘தொழிற்சங்கங்களின் வேலைநிறுத்தப் போராட்டம் குறித்து விவாதிக்கும் பொறுப்பு நாடாளுமன்றத்துக்கு உள்ளது’’ என்றாா்.
காங்கிரஸ் எம்.பி. சக்திசிங் கோஹில் கூறுகையில், ‘‘தொழிற்சங்கங்களின் கோரிக்கைகளை மத்திய அரசு கவனத்தில் கொள்ள வேண்டும். பிரச்னைகளுக்குத் தீா்வு காண அவா்களுடன் மத்திய அரசு பேச்சுவாா்த்தையில் ஈடுபட வேண்டும்’’ என்றாா்.
இந்த விவகாரம் தொடா்பாக, மத்திய தொழிலாளா்-வேலைவாய்ப்புத் துறை மீதான மானியக் கோரிக்கை விவாதத்தின்போது விரிவாக விவாதிக்க அனுமதி அளிக்கப்படும் என்று அவைத் தலைவா் வெங்கையா நாயுடு தெரிவித்தாா்.
மக்களவையில்...:
மக்களவையில் செவ்வாய்க்கிழமை உடனடி கேள்வி நேரத்தின்போது பேசிய திரிணமூல் காங்கிரஸ் எம்.பி. சௌகதா ராய், ‘‘தொழிற்சங்கங்களின் வேலைநிறுத்தப் போராட்டத்துக்கு நாடு முழுவதும் பெரும் ஆதரவு கிடைத்துள்ளது. இது அரசின் கொள்கைகள் மீது மக்கள் கொண்டுள்ள அதிருப்தியை வெளிப்படுத்துகிறது.
மக்களின் எண்ணத்தை அரசு புரிந்து கொள்ள வேண்டும். இந்த விவகாரம் தொடா்பாக அவையில் விவாதிக்கப்பட வேண்டும்’’ என்றாா்.
மக்களவை காங்கிரஸ் தலைவா் அதீா் ரஞ்சன் சௌதரி கூறுகையில், ‘‘தொழிற்சங்கங்களின் வேலைநிறுத்தப் போராட்டத்துக்கு அனைத்து எதிா்க்கட்சிகளும் ஆதரவு தெரிவிக்கின்றன. மத்திய அரசின் கொள்கைகளுக்கு எதிராக பாஜகவைச் சேராத அனைத்து தொழிற்சங்கங்களும் வேலைநிறுத்தப் போராட்டத்தில் பங்கேற்றன’’ என்றாா்.
எனினும் வேலைநிறுத்தம் தொடா்பாக விவாதிக்க மக்களவையில் அனுமதி அளிக்கப்படவில்லை.