திமுக ஆட்சி ஓராண்டை நிறைவு செய்து, இரண்டாவது ஆண்டில் அடியெடுத்து வைக்கும் நிலையில், முன்னாள் முதல்வா்களின் நினைவிடங்களில் முதல்வா் மு.க.ஸ்டாலின் சனிக்கிழமை மரியாதை செலுத்தினாா்.
இரண்டாவது ஆண்டில் தி.மு.க. ஆட்சி அடியெடுத்து வைப்பதால் முதல்வா் மு.க.ஸ்டாலின் சனிக்கிழமை காலையில் தனது வீட்டில் உள்ள முன்னாள் முதல்வா் கருணாநிதியின் படத்திற்கு மாலை அணிவித்து வணங்கினாா். அதன் பிறகு கோபாலபுரத்தில் உள்ள கருணாநிதியின் வீட்டுக்குச் சென்றாா். அங்கு அவரை வீட்டு வாசலில் திமுக நிா்வாகிகள் வரவேற்றனா்.
முதல்வருடன் மனைவி துா்கா ஸ்டாலின் சென்றிருந்தாா். வீட்டுக்குள் சென்றதும் அங்கும் கருணாநிதியின் உருவப்படத்துக்கு மாலை அணிவித்து வணங்கினாா். தாயாா் தயாளு அம்மாளிடம் ஆசி பெற்றாா். அப்போது குடும்ப உறுப்பினா்களும் உடன் இருந்தனா். அதன் பிறகு அங்கிருந்து புறப்பட்டு மெரீனா கடற்கரையில் உள்ள முன்னாள் முதல்வா்கள் அண்ணா, கருணாநிதி நினைவிடங்களில் முதல்வா் மு.க.ஸ்டாலின் மலா் தூவி மரியாதை செலுத்தினாா். கருணாநிதியின் நினைவிடத்தில் ஒவ்வொரு நாளும் ஒவ்வொரு மாடலில் பூக்கள் அலங்காரம் செய்யப்பட்டிருக்கும். ஆட்சிக்கு வந்து ஓராண்டு நிறைவு செய்வதையொட்டி சட்டப்பேரவை வடிவத்தில் பூ அலங்காரம் செய்யப்பட்டிருந்தது.
‘முதல்வராய் ஓராண்டு, முதன்மையாய் நூறாண்டு காப்போம்’ என்ற வாசகமும் அலங்காரத்தில் இடம் பெற்றிருந்தது. முதல்வா் மு.க.ஸ்டாலின் மரியாதை செலுத்திய போது கட்சியின் பொருளாளா் டி.ஆா்.பாலு, துரைமுருகன், பொன்முடி, கே.என்.நேரு, எ.வ.வேலு, சேகா்பாபு உள்ளிட்ட முக்கிய அமைச்சா்கள், கட்சி நிா்வாகிகளும் உடனிருந்தனா்.
சட்டப்பேரவையில் பூ அலங்காரம்: ஓராண்டு கொண்டாட்டத்தை ஒட்டி, தலைமைச் செயலகத்தின் நுழைவு வாயில்களில் வாழை மரங்கள் கட்டப்பட்டிருந்தன. சட்டப் பேரவை மண்டபத்தில் மலா் அலங்காரம் செய்யப்பட்டிருந்தது. அங்கு வைக்கப்பட்டுள்ள அனைத்து தலைவா்களின் படங்கள், வாயில்களின் நிலைகள் ஆகியவற்றுக்கு மலா் மாலைகள் அணிவிக்கப்பட்டிருந்தன. பேரவைக்கு காலை 9.54 மணிக்கு முதல்வா் மு.க.ஸ்டாலின் வந்த போது ஆளும் கட்சி, காங்கிரஸ் உள்ளிட்ட கூட்டணி கட்சிகளைச் சோ்ந்த உறுப்பினா்கள் மேசையைத் தட்டி வரவேற்பு அளித்தனா். முன்னதாக, பேரவைக்கு வந்த சேப்பாக்கம்-திருவல்லிக்கேணி தொகுதி எம்.எல்.ஏ., உதயநிதி ஸ்டாலினுக்கும் மேசையைத் தட்டி வரவேற்பு அளிக்கப்பட்டதுடன், அமைச்சா்கள், உறுப்பினா்கள் பலரும் சால்வைகள், புத்தகங்களை பரிசாக அளித்தனா்.
சுதா்சன் பட்நாயக்கின் மணற்சிற்பம்: ஆட்சியின் ஓராண்டு நிறைவை ஒட்டி, சென்னை மெரீனாவில் ஒடிஸாவின் பிரபல மணற் சிற்பக்கலைஞா் சுதா்சன் பட்நாயக் வடித்தெடுத்த ஓவியம் பாா்வையாளா்களை வெகுவாக ஈா்த்தது. உதித்தெழுந்த சூரியனின் மையத்தில் முதல்வரின் உருவமும், அதன் கதிரொளிகளில் அரசின் திட்டங்களைக் குறிக்கும் வகையிலான அடையாளங்களும், திராவிட மாடல், ஓராண்டு ஆட்சி என்பன போன்ற வாசகங்கள் இடம்பெற்றிருந்தன.
மணற்சிற்பத்தை வடித்தெடுத்த சுதா்சன் பட்நாயக்கை, மெரீனாவில் முதல்வா் மு.க.ஸ்டாலின் நேரில் சந்தித்து வாழ்த்துத் தெரிவித்தாா்.
இதன்பின்பு, திமுக தலைமை அலுவலகமான அண்ணா அறிவாலயம் சென்று கட்சி நிா்வாகிகள், தொண்டா்களின் வாழ்த்துகளைப் பெற்றுக் கொண்டாா்.