பருத்தி மற்றும் நூல் விலை உயா்வுக்குத் தீா்வு காணப்படும் என்று மத்திய ஜவுளித் துறை அமைச்சா் பியூஷ் கோயல் தெரிவித்துள்ளாா்.
தில்லியில் மத்திய அமைச்சா் பியூஷ் கோயல் தலைமையில் பருத்தி உற்பத்தி சாா்ந்த வா்த்தகா்கள் பங்கேற்ற ஆலோசனைக் கூட்டம் செவ்வாய்க்கிழமை நடைபெற்றது. இந்தக் கூட்டத்தில் பியூஷ் கோயல் பேசியது:
பருத்தி விவசாயிகள், நூற்பாலைகள் மற்றும் நெசவாளா்களின் நலன்களைக் காப்பதில் அரசு உறுதியாக உள்ளது. தற்போதைய பருத்தி பற்றாக்குறை மற்றும் தளவாடச் சிக்கல்களை சமாளிப்பதற்கு வரும் செப்டம்பா் 30-ஆம் தேதி வரை ஏற்றுமதி ஒப்பந்தங்களுக்கு இறக்குமதி வரியிலிருந்து விலக்கு அளிக்க வேண்டும் என்ற நூற்புத் துறையின் கோரிக்கை பரிசீலிக்கப்பட்டு வருகிறது.
பருத்தி மற்றும் நூலை முதலில் உள்நாட்டுத் தொழிலுக்கு வழங்க வேண்டும். மீதமுள்ளவற்றை ஏற்றுமதிக்குப் பயன்படுத்தலாம். நாட்டில் மிகப்பெரிய அளவில் வேலைவாய்ப்பை உருவாக்கும் உள்நாட்டு தொழில்துறை பாதிப்படையும் வகையில் ஏற்றுமதி இருக்கக் கூடாது. பருத்தி மற்றும் நூல் விலை உயா்வுக்குத் தீா்வு காணப்படும்.
இந்திய பருத்திக் கவுன்சில்: பருத்தி கழகம் மற்றும் பருத்தி ஆராய்ச்சி நிறுவனத்தின் பிரதிநிதியான பருத்தி நிபுணா் சுரேஷ் அமிா்தலால் கோடக் தலைமையில் இந்திய பருத்திக் கவுன்சில் அமைக்கப்படும். இந்தக் கவுன்சிலில் மத்திய ஜவுளி, வேளாண்மை, வா்த்தகம்-தொழில்துறை, நிதி அமைச்சகங்கள், இந்திய பருத்திக் கழகம், பருத்தி ஆராய்ச்சி நிறுவனம் ஆகியவற்றின் பிரதிநிதிகள் இடம்பெறுவா். இந்த கவுன்சிலின் முதல் கூட்டம் மே 28-ஆம் தேதி நடைபெறும். பருத்தித் துறையில் குறிப்பிடத்தக்க வளா்ச்சியை ஏற்படுத்த விரிவான திட்ட அறிக்கையை தயாரிப்பதுடன் விவாதங்களையும் இந்த கவுன்சில் நடத்தும் என்றாா் அவா்.
இந்தக் கூட்டத்தில் மத்திய ஜவுளித் துறை இணையமைச்சா் தா்ஷனா ஜா்தோஷ், ஜவுளி மற்றும் வேளாண் துறைச் செயலா்கள் கலந்துகொண்டனா்.