குஜராத் பேரவைத் தோ்தலில் ஆம் ஆத்மி சாா்பில் போட்டியிடும் வேட்பாளா்களை பாஜகவே தீா்மானித்து வருவதாகக் காங்கிரஸ் குற்றஞ்சாட்டியுள்ளது.
குஜராத் சட்டப் பேரவைத் தோ்தல் டிசம்பா் 1, 5 ஆகிய தேதிகளில் இருகட்டங்களாக நடைபெறுகிறது. தோ்தல் முடிவுகள் டிசம்பா் 8-ஆம் தேதி வெளியிடப்படவுள்ளன. மாநிலத்தை ஆளும் பாஜக, எதிா்க்கட்சியான காங்கிரஸ், புதுவரவான ஆம் ஆத்மி ஆகிய கட்சிகளிடையே மும்முனைப்போட்டி நிலவுகிறது.
இந்நிலையில், காங்கிரஸில் இருந்து கடந்த ஏப்ரலில் ஆம் ஆத்மி கட்சிக்குத் தாவிய முன்னாள் எம்எல்ஏ இந்திரணில் ராஜ்குரு, மீண்டும் காங்கிரஸ் கட்சியிலேயே ஐக்கியமாகியுள்ளாா். அப்போது அவா் கூறுகையில், ‘‘பாஜகவைத் தோற்கடிக்க வேண்டும் என்ற நோக்கிலேயே காங்கிரஸில் இருந்து விலகி ஆம் ஆத்மி கட்சியில் இணைந்தேன்.
தோ்தலில் வெற்றி பெற வாய்ப்புள்ள 15 பேரை வேட்பாளா்களாக அறிவிக்க வேண்டுமென ஆம் ஆத்மி தலைமையிடம் கோரிக்கை விடுத்தேன். ஆனால், அவா்களுக்கு வாய்ப்பு வழங்காமல், பாஜகவுக்கு வலுசோ்க்கும் வகையிலான நபா்களுக்கு ஆம் ஆத்மி வாய்ப்பு வழங்கியுள்ளது.
பாஜகவுடன் இணைந்தே ஆம் ஆத்மி கட்சி செயல்பட்டு வருகிறது. ஆம் ஆத்மி கட்சிக்கான வேட்பாளா்களை பாஜகவே முடிவு செய்து வருகிறது. பாஜகவை வீழ்த்துவதற்கான ஒரே சக்தி காங்கிரஸ்தான் என்பதால், தற்போது அக்கட்சியில் மீண்டும் இணைந்துள்ளேன்’’ என்றாா்.
ஆம் ஆத்மி ஒருங்கிணைப்பாளா் அரவிந்த் கேஜரிவாலும் பஞ்சாப் முதல்வா் பகவந்த் மானும் கடந்த அக்டோபரில் குஜராத் வந்தபோது பெருந்தொகையைக் கொண்ட பையை விமானத்தில் எடுத்து வந்ததாக இந்திரணில் ராஜ்குரு குற்றஞ்சாட்டினாா். இக்குற்றச்சாட்டு தொடா்பாக ஆம் ஆத்மியும் அவா்களை அடக்கி ஆளும் பாஜகவும் விளக்கமளிக்க வேண்டுமென காங்கிரஸ் ஊடகப் பிரிவுத் தலைவா் பவன் கேரா தெரிவித்துள்ளாா்.
