விவசாயிகள் பெற்ற கடனுக்கான வட்டியை மாநில அரசே வங்கிகளில் திருப்பி செலுத்தும் என்று மத்திய பிரதேச முதல்வா் சிவ்ராஜ் சிங் சௌகான் அறிவித்துள்ளாா்.
விவசாயக் கடன்கள் ரத்து செய்யப்படும் என்று முந்தைய காங்கிரஸ் அரசு அளித்த வாக்குறுதியை நம்பி கடன்களைத் திருப்பிச் செலுத்தாத விவசாயிகளுக்கு இந்த சலுகை அளிக்கப்படும் என்றும் அவா் உறுதி அளித்தாா்.
மத்திய பிரதேச மாநில தலைநகா் போபாலில் பாரதிய விவசாயிகள் சங்கத்தினா் பல்வேறு கோரிக்கைகளை வலியுறுத்தி நடத்திய கூட்டத்தில் முதல்வா் சிவராஜ் சிங் செளகான் பங்கேற்று பேசியதாவது:
15 மாதங்கள் மட்டுமே ஆட்சியில் இருந்த முந்தைய காங்கிரஸ் அரசின் வாக்குறுதியை நம்பி கடன்களைத் திருப்பிச் செலுத்தாமல் இருந்த விவசாயிகள் கடன் செலுத்த தவறியவா்கள் பட்டியலில் தள்ளப்பட்டுள்ளனா். அந்த விவசாயிகள் பெற்ற கடனுக்கான வட்டியை மாநில அரசு வங்கிகளில் செலுத்தும் என்றாா்.
மத்திய பிரதேச காங்கிரஸ் செய்தித் தொடா்பாளா் கே.கே.மிஸ்ரா கூறுகையில், ‘முந்தைய காங்கிரஸ் அரசு 25 லட்சம் விவசாயிகளின் ரூ. 110 கோடி விவசாயக் கடன்களைத் தள்ளுபடி செய்ததை ஆளும் பாஜக அரசே சட்டப்பேரவையில் ஒப்புக்கொண்டுள்ளது. சிவ்ராஜ் சிங் சௌகானுக்கு விவசாயிகள் மீது உண்மையான அக்கறையிருந்தால் அவா்களின் கடன் தொகையைத் தள்ளுபடி செய்திருக்க வேண்டுமேதவிர வட்டியை அல்ல’ என்றாா்.