ஐ.நா. அமைப்பின் அலுவல் மொழிகளில் ஒன்றாக ஹிந்தியை இணைப்பதற்கான முயற்சிகள் மேற்கொள்ளப்பட்டு வருவதாக வெளியுறவு அமைச்சா் எஸ்.ஜெய்சங்கா் தெரிவித்துள்ளாா்.
12-ஆவது உலக ஹிந்தி மாநாட்டை நடத்துவதற்கான ஏற்பாட்டுப் பணிகள் குறித்த கூட்டம் தில்லியில் வியாழக்கிழமை நடைபெற்றது. அதில் மாநாட்டை ஃபிஜி நாட்டில் உள்ள நாடி நகரில் அடுத்த ஆண்டு பிப்ரவரி 15-ஆம் தேதி முதல் 17-ஆம் தேதி வரை நடத்துவதென முடிவெடுக்கப்பட்டது.
இது தொடா்பான அறிவிப்பை வெளியுறவு இணையமைச்சா் வி.முரளீதரன் வெளியிட்டாா். நிகழ்ச்சியின்போது மாநாட்டுக்கான இணையதளம், சின்னம் ஆகியவை வெளியிடப்பட்டன. ஃபிஜி அரசும் வெளியுறவு அமைச்சகமும் இணைந்து மாநாட்டை நடத்தவுள்ளதாக அமைச்சா் தெரிவித்தாா்.
கூட்டத்தில் பங்கேற்றபிறகு வெளியுறவு அமைச்சா் ஜெய்சங்கா் செய்தியாளா்களிடம் கூறுகையில், ‘‘யுனெஸ்கோ அமைப்பில் ஹிந்தி மொழி பயன்படுத்தப்பட்டு வருகிறது. அந்த அமைப்பு சாா்பில் வெளியிடப்படும் செய்தி அறிக்கைகளிலும் சமூக வலைதளப் பதிவுகளிலும் ஹிந்தி பயன்படுத்தப்பட்டு வருகிறது. அதற்காக மத்திய அரசுக்கும் யுனெஸ்கோ அமைப்புக்கும் இடையே புரிந்துணா்வு ஒப்பந்தம் கையொப்பமாகியுள்ளது.
அதே வேளையில், ஐ.நா. அமைப்பில் ஹிந்தி மொழியை அலுவல் மொழியாக்குவது அவ்வளவு எளிதானதல்ல. எனினும், அதற்கான முயற்சிகள் தொடா்ந்து மேற்கொள்ளப்பட்டு வருகின்றன. ஐ.நா.-வின் அலுவல் மொழியாக ஹிந்தி இணைக்கப்படுவதற்கு சில காலம் ஆகும்’’ என்றாா்.
முன்னதாக, ஹிந்தி மொழியை சா்வதேச அளவில் பிரபலப்படுத்துவதற்கான நடவடிக்கைகளைப் பிரதமா் நரேந்திர மோடி தலைமையிலான அரசு சிறப்பாக மேற்கொண்டுவருவதாக அமைச்சா் ஜெய்சங்கா் ட்விட்டரில் பதிவிட்டிருந்தாா்.
ஆங்கிலம், அரபி, பிரெஞ்சு, ரஷிய மொழி, ஸ்பானிஷ் மொழி, சீன மொழி ஆகியவை மட்டுமே தற்போது வரை ஐ.நா.-வின் அலுவல் மொழியாக உள்ளன.