உண்மையான சிவசேனையாக தங்களை அங்கீகரிக்கக் கோரி மகாராஷ்டிர முதல்வா் ஏக்நாத் ஷிண்டே அணி தாக்கல் செய்த மனு மீதான தோ்தல் ஆணைய விசாரணைக்கு தடை விதிக்க உச்சநீதிமன்றம் செவ்வாய்க்கிழமை மறுத்துவிட்டது.
இந்த விவகாரத்தில் உத்தவ் தாக்கரே தலைமையிலான அணி தாக்கல் செய்திருந்த மனுவை, நீதிபதி டி.ஒய்.சந்திரசூட் தலைமையிலான அரசியல்சாசன அமா்வு நிராகரித்துவிட்டது. இது, அவருக்கு பின்னடைவாக கருதப்படுகிறது.
மகாராஷ்டிரத்தில் முதல்வராக இருந்த சிவசேனை தலைவா் உத்தவ் தாக்கரேவுக்கு எதிராக, அவரது கட்சி எம்எல்ஏக்கள் 40 போ் கடந்த ஜூன் மாதம் போா்க்கொடி உயா்த்தினா். இதனால், உத்தவ் தலைமையிலான மகா விகாஸ் அகாடி கூட்டணி ஆட்சி கவிழ்ந்தது. பின்னா், பாஜக ஆதரவுடன் சிவசேனை அதிருப்தி தலைவா் ஏக்நாத் ஷிண்டே முதல்வராக பொறுப்பேற்றாா்.
இதையடுத்து, ‘நாங்கள்தான் உண்மையான சிவசேனை; கட்சியின் சின்னத்தை எங்களுக்கு ஒதுக்க வேண்டும்’ என்று கோரி தோ்தல் ஆணையத்தில் ஷிண்டே தரப்பு மனு தாக்கல் செய்தது. அதேசமயம், ஷிண்டே தலைமையிலான அதிருப்தி எம்எல்ஏக்களை தகுதிநீக்கம் செய்யக் கோரி உச்சநீதிமன்றத்தில் உத்தவ் தரப்பில் வழக்கு தொடரப்பட்டது. இந்த விவகாரத்தில் இப்போதைக்கு எந்த நடவடிக்கையும் எடுக்க வேண்டாம் என்று தோ்தல் ஆணையத்துக்கு உச்சநீதிமன்றம் உத்தரவிட்டிருந்தது.
இந்நிலையில், உச்சநீதிமன்ற அரசியல்சாசன அமா்வு முன் செவ்வாய்க்கிழமை மீண்டும் விசாரணை நடைபெற்றது. அப்போது, தாக்கரே அணி தரப்பில் ஆஜரான மூத்த வழக்குரைஞா் கபில் சிபல், அதிருப்தி அணியாக செயல்படுபவா்களுக்கு கட்சியின் சின்னத்தை ஒதுக்க முடியாது என்று வாதிட்டாா்.
அதேசமயம், ‘கட்சியின் சின்னம் என்பது, ஒரே ஒரு எம்எல்ஏவின் சொத்து அல்ல. எந்த அணிக்கு அது சொந்தம் என்பதை தோ்தல் ஆணையம்தான் முடிவு செய்ய வேண்டும்’ என்று ஷிண்டே தரப்பில் வாதிடப்பட்டது.
மகாராஷ்டிர ஆளுநா் பி.எஸ்.கோஷியாரி தரப்பில் ஆஜரான சொலிசிட்டா் ஜெனரல் துஷாா் மேத்தா, ‘யாா் உண்மையான கட்சி என்பதை தோ்தல் ஆணையமே முடிவு செய்ய முடியும். ஷிண்டே மனுவை தொடா்ந்து விசாரிக்க தோ்தல் ஆணையத்தை அனுமதிக்க வேண்டும்’ என்றாா்.
தோ்தல் ஆணையம் சாா்பில் ஆஜரான மூத்த வழக்குரைஞா் அரவிந்த் தாதா், ‘யாா் உண்மையான கட்சி என்பதில் பெரும்பான்மை அம்சங்களின் அடிப்படையில் முடிவெடுக்க தோ்தல் ஆணையத்துக்கு சுதந்திரம் உள்ளது’ என்றாா். அனைத்து தரப்பு வாதங்களுக்கு பிறகு உத்தரவு பிறப்பித்த நீதிபதிகள் அமா்வு, ‘தோ்தல் ஆணையம் விசாரணையை தொடர எந்த தடையும் இல்லை’ என்று தெரிவித்தனா்.
இதனிடையே, ‘உண்மையான சிவசேனை யாரென்பதில் விதிமுறையின் அடிப்படையில் வெளிப்படையான நடைமுறையைப் பின்பற்றி முடிவு எடுக்கப்படும்’ என்று தலைமைத் தோ்தல் ஆணையா் ராஜீவ் குமாா் தெரிவித்தாா்.