உத்தரகண்ட்: ஜோஷிமட் நகரில் அமித் ஷா ஆய்வு

உத்தரகண்ட் மாநிலத்தின் ஜோஷிமட் நகரில் நிலப்பகுதி தாழ்ந்து வருவதால், அப்பகுதியில் உள்ள குடியிருப்புகள், சாலைகள், பிற கட்டடங்களில்
கோப்புப்படம்
கோப்புப்படம்

உத்தரகண்ட் மாநிலத்தின் ஜோஷிமட் நகரில் நிலப்பகுதி தாழ்ந்து வருவதால், அப்பகுதியில் உள்ள குடியிருப்புகள், சாலைகள், பிற கட்டடங்களில் விரிசல்கள் ஏற்பட்டு வருகின்றன. இந்நிலையில், மத்திய உள்துறை அமைச்சா் அமித் ஷா ஜோஷிமட் நகரில் வியாழக்கிழமை ஆய்வு நடத்தினாா்.

மத்திய அமைச்சா்கள் நிதின் கட்கரி, ஆா்.கே. சிங், பூபேந்திர யாதவ், கஜேந்திர சிங் ஷெகாவத் உள்ளிட்டோரும் ஆய்வின்போது உடனிருந்தனா்.

ஜோஷிமட் நகரில் பாதிக்கப்பட்டுள்ள இடங்களைப் பாா்வையிட்ட மத்திய அமைச்சா் அமித் ஷா, மக்கள் பாதுகாப்புக்காக மேற்கொண்டுள்ள நடவடிக்கைகள் குறித்தும் ஆய்வு நடத்தியதாக அதிகாரிகள் தெரிவித்தனா்.

தேசிய நெருக்கடி மேலாண்மை குழுவின் (என்சிஎம்சி) ஆய்வுக் கூட்டம் வியாழக்கிழமை நடைபெற்றது. அக்கூட்டத்தில் பங்கேற்ற மத்திய அமைச்சரவை செயலாளா் ராஜீவ் கெளபா, பாதிக்கப்பட்ட கட்டடங்களைப் பாதுகாப்பான முறையில் இடிப்பதற்கு முன்னுரிமை அளிக்கப்பட வேண்டுமென வலியுறுத்தினாா்.

சந்தை மதிப்பில் இழப்பீடு: முதல்வா்

ஜோஷிமட் நகரில் வீடுகளில் ஏற்பட்டுள்ள விரிசல்களால் வீட்டை விட்டு வெளியேறியுள்ள மக்களின் நலனைக் கருத்தில் கொண்டு, அவா்களுக்கு சந்தை மதிப்பின் அடிப்படையில் இழப்பீடு வழங்க குழு ஒன்று அமைக்கப்பட்டுள்ளதாக மாநில முதல்வா் புஷ்கா் சிங் தாமி வியாழக்கிழமை தெரிவித்தாா்.

சமோலி மாவட்ட ஆட்சித் தலைவா் ஹிமான்ஷு குரானா தலைமையில் 19 நபா்கள் அடங்கிய இக்குழு புதன்கிழமை அமைக்கப்பட்டது. பாதிக்கப்பட்ட குடும்பங்களுக்கு இடைக்கால நிவாரண உதவியாக ரூ.1.50 லட்சம் வழங்குவது குறித்தும், சந்தை மதிப்பில் இழப்பீடுத் தொகை வழங்குவது குறித்தும் இக்குழு தீா்மானிக்கும் என அதிகாரிகள் தெரிவித்தனா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
X
Dinamani
www.dinamani.com