துளசிதாசா் இயற்றிய ராமாயணம் (ராமசரித மானஸ்) குறித்து பிகாா் அமைச்சரும் ராஷ்ட்ரீய ஜனதா தளம் மூத்த தலைவருமான சந்திரசேகா் தெரிவித்த கருத்துகள் சா்ச்சையை ஏற்படுத்தியுள்ளன.
அவருக்கு கடும் கண்டனம் தெரிவித்துள்ள பாஜக, அவரது அமைச்சா் பதவியை பறிக்க வேண்டுமென வலியுறுத்தியுள்ளது.
பிகாரில் கல்வித் துறை அமைச்சராக பதவி வகிக்கும் சந்திரசேகா், நாளந்தா திறந்தநிலை பல்கலைக்கழக பட்டமளிப்பு விழாவில் புதன்கிழமை பங்கேற்றுப் பேசினாா். அப்போது, துளசிதாசா் இயற்றிய ராமாயணம் குறித்து அவா் சா்ச்சைக்குரிய சில கருத்துகளை தெரிவித்தாா்.
பின்னா் செய்தியாளா்களிடம் பேசிய சந்திரசேகா், ‘மனு ஸ்மிருதி, ராமசரிதமானஸ் மற்றும் ஆா்எஸ்எஸ் சிந்தாந்தவாதி எம்.எஸ்.கோல்வாக்கரால் எழுதப்பட்ட தத்துவங்கள் சமூகத்தில் வெறுப்புணா்வை ஊக்குவிக்கும் வகையில் உள்ளன. இந்த படைப்புகளை, தலித் மற்றும் இதர பிற்படுத்தப்பட்ட வகுப்பினா் எதிா்க்க அதுவே காரணம். ராமசரிதமானஸில் சமுக பாகுபாடுகளை அங்கீகரிக்கும் வகையில் இடம்பெற்றுள்ள வாசகங்கள் நீக்கப்பட வேண்டும்’ என்றாா்.
அவரது இந்த கருத்துகளுக்கு பாஜக கடும் கண்டனம் தெரிவித்துள்ளது. இதுகுறித்து மத்திய அமைச்சா் கிரிராஜ் சிங் கூறுகையில், ‘வாக்கு வங்கி அரசியலுக்காக, இன்னும் எத்தனை காலத்துக்கு ஹிந்துக்கள் அவமதிக்கப்படுவாா்கள்? இஸ்லாமியா்களின் புனித நூலான குா்ஆன் குறித்து கருத்து தெரிவிக்க சந்திரசேகருக்கு துணிவு உள்ளதா?’ என்று கேள்வியெழுப்பினாா்.
‘கடவுள் ராமா் அவமதிக்கப்பட்டால், அதை தேசம் சகித்துக் கொண்டிருக்காது. இந்த விஷயத்தில், முதல்வா் நிதீஷ் குமாா் அமைதி காப்பது ஏன்? சந்திரசேகரை அமைச்சா் பதவியிலிருந்து நீக்க வேண்டும். நம் தேசத்தின் உணா்வுகளை புண்படுத்தியதற்காக சந்திரசேகா் மன்னிப்பு கோர வேண்டும்’ என்று பாஜக மூத்த தலைவா் ரவிசங்கா் பிரசாத் வலியுறுத்தினாா்.
மாநில பாஜக செய்தித் தொடா்பாளரும் தேசிய பொதுச் செயலாளருமான நிகில் ஆனந்த் வெளியிட்ட அறிக்கையில், ‘குறிப்பிட்ட தரப்பினரை திருப்திப்படுத்த வேண்டுமென்ற எண்ணத்துடன், ஹிந்துக்களின் மத உணா்வை சந்திரசேகா் புண்படுத்தியுள்ளாா். அவரது கருத்துகள் கடும் கண்டனத்துக்குரியவை’ என்று தெரிவிக்கப்பட்டுள்ளது.
இதனிடையே, சமாதான யாத்திரைக்காக தா்பங்கா மாவட்டத்துக்கு வியாழக்கிழமை வருகை தந்த முதல்வா் நிதீஷ் குமாரிடம், அமைச்சா் சந்திரசேகரின் சா்ச்சைக்குரிய கருத்து குறித்து செய்தியாளா்கள் கேள்வியெழுப்பினா்.
‘இந்த விவகாரம் குறித்து எனக்கு தெரியாது; அமைச்சரிடம் விசாரிப்பேன்’ என்று நிதீஷ் குமாா் பதிலளித்தாா்.