நேதாஜி சுபாஷ் சந்திர போஸின் பிறந்த தினத்தையொட்டி அந்தமான்-நிகோபாரை சோ்ந்த பெயரிடப்படாத 21 தீவுகளுக்கு ‘பரம் வீா் சக்ரா’ விருது பெற்றவா்களின் பெயரை பிரதமா் நரேந்திர மோடி சூட்டினாா்.
சுதந்திரப் போராட்ட வீரா் சுபாஷ் சந்திர போஸின் 126-ஆவது பிறந்த தினம் திங்கள்கிழமை கொண்டாடப்பட்டது. அதையொட்டி நடைபெற்ற நிகழ்ச்சியில், அந்தமான்-நிகோபாரில் சுபாஷ் சந்திர போஸுக்கு அமைக்கப்படவுள்ள நினைவிடத்தின் மாதிரியை பிரதமா் மோடி காணொலி மூலம் வெளியிட்டாா்.
மேலும், அந்தமான்-நிகோபாரை சோ்ந்த பெயரிடப்படாத 21 தீவுகளுக்கு ராணுவத்தின் மிக உயரிய விருதான ‘பரம் வீா் சக்ரா’ விருதைப் பெற்ற வீரா்களின் பெயரையும் பிரதமா் மோடி சூட்டினாா். அந்நிகழ்ச்சியில் அவா் பேசியதாவது:
இந்திய தேசியக் கொடியை சுபாஷ் சந்திர போஸ் முதன்முதலாக 1943-ஆம் ஆண்டில் அந்தமான்-நிகோபாரில்தான் ஏற்றினாா். இது அந்தத் தீவுகளில் வசிக்கும் மக்களுக்குப் பெருமைமிகு தருணமாகும்.
நாட்டின் சுதந்திரப் போராட்டத்தில் நேதாஜி வழங்கிய பங்களிப்பை மறக்கடிப்பதற்கான முயற்சிகள் மேற்கொள்ளப்பட்டன. ஆனால், தில்லி முதல் அந்தமான்-நிகோபாா் தீவுகள் வரையில் நாட்டில் உள்ள அனைத்து மக்களும் நேதாஜிக்கு தற்போது மரியாதை செலுத்தி வருகின்றனா். இதன்மூலம் அவரைச் சாா்ந்த வரலாறும் பாரம்பரியமும் காக்கப்பட்டுள்ளது.
நேதாஜி தொடா்பான ஆவணங்களைப் பொதுவெளியில் வெளியிடுமாறு பல ஆண்டுகளாகக் கோரிக்கைகள் முன்வைக்கப்பட்டன. மத்தியில் பாஜக அரசு பொறுப்பேற்ற பிறகே அந்த ஆவணங்கள் மக்கள் பாா்வைக்கு வெளியிடப்பட்டன. காலனிய ஆட்சிக்கு எதிராக மிகவும் துணிச்சலுடன் போராடிய நேதாஜி மக்கள் நினைவில் என்றும் நிலைத்திருப்பாா்.
ஊக்கமளிக்கும் நடவடிக்கை: அந்தமானில் உள்ள 21 தீவுகளுக்கு பரம்வீா் சக்ரா விருது பெற்றவா்களின் பெயா் சூட்டப்பட்டுள்ளது. புகழ்பெற்ற வீரா்களான மேஜா் சோம்நாத் சா்மா, மேஜா் தான் சிங் தாபா, சுபேதா் ஜொகிந்தா் சிங், மேஜா் ஷைதான் சிங், ஹவில்தாா் அப்துல் ஹமீது, லெப்டினென்ட் அருண் கேத்ரபால், நிா்மல்ஜித் சிங் சேகான் உள்ளிட்டோரின் பெயா் தீவுகளுக்கு சூட்டப்பட்டுள்ளது. இது வருங்கால தலைமுறையினருக்குப் பெரும் ஊக்கமளிப்பதாக அமையும்.
‘ஒரே இந்தியா, உன்னத இந்தியா’ என்ற கொள்கையை வலுப்படுத்தும் நோக்கில் இந்தப் பெயா்கள் சூட்டப்பட்டுள்ளன. நேதாஜிக்கான நினைவிடம் மக்களிடையே நாட்டுப்பற்றை வலுப்படுத்தும்.
சுற்றுலா மேம்பாடு: கடந்த 8 ஆண்டுகளில் அந்தமான்-நிகோபாா் தீவுகளின் சுற்றுலாத் திறனை மத்திய அரசு வலுப்படுத்தி வருகிறது. தீவுகளுடனான இணையத் தொடா்பை வலுப்படுத்துவதற்காக கண்ணாடி ஒளியிழை வடங்கள் பதிக்கப்பட்டுள்ளன. எதிா்காலத்திலும் பல மேம்பாட்டு நடவடிக்கைகள் மேற்கொள்ளப்படவுள்ளன. அழகிய கடற்கரைகளுக்காக மட்டுமல்லாமல், வரலாற்றைத் தெரிந்து கொள்ளவும் அந்தமான் தீவுகளுக்கு சுற்றுலாப் பயணிகள் தற்போது வருகை தருகின்றனா். அந்தமான்-நிகோபாா் தீவுகளைப் பெரும் சுற்றுலாத் தலமாக மாற்றுவதற்கான நடவடிக்கைகள் தொடா்ந்து மேற்கொள்ளப்படும் என்றாா் பிரதமா் மோடி.
நேதாஜி நினைவிடம்: அந்தமான்-நிகோபாரை சோ்ந்த ராஸ் தீவுக்கு நேதாஜி சுபாஷ் சந்திர போஸின் பெயா் கடந்த 2018-ஆம் ஆண்டில் சூட்டப்பட்டது. அந்தத் தீவில் நேதாஜிக்கு நினைவிடம் அமைக்கப்படவுள்ளது. அந்த நினைவிடத்தில் வரலாற்று நிகழ்வுகளை நினைவுகூரும் பல்வேறு ஏற்பாடுகள் செய்யப்படவுள்ளதாக அதிகாரிகள் தெரிவித்தனா்.
‘நேதாஜி என்றும் நினைவில் நிற்பாா்’
நேதாஜி சுபாஷ் சந்திர போஸின் பிறந்த தினத்தையொட்டி பிரதமா் மோடி ட்விட்டரில் திங்கள்கிழமை வெளியிட்ட பதிவில், ‘நேதாஜியின் பிறந்த தினம் ‘தைரிய தினமாக’ கொண்டாடப்பட்டு வரும் வேளையில் அவருக்கு மரியாதை செலுத்துகிறேன். நாட்டின் வரலாற்றுக்கு அவா் அளித்துள்ள ஈடு இணையற்ற பங்களிப்பை இத்தருணத்தில் நினைவுகூா்கிறேன்.
காலனிய ஆட்சிக்கு எதிராக துணிச்சலுடன் போராடியதற்காக மக்களால் நேதாஜி என்றும் நினைவுகூரப்படுவாா். அவரின் கொள்கைகளால் ஈா்க்கப்பட்டுள்ள மத்திய அரசு, நாட்டுக்கான அவரது கனவுகளை நனவாக்க செயல்பட்டு வருகிறது’ என்று குறிப்பிட்டுள்ளாா்.