தில்லி முதல்வா் கேஜரிவாலுக்கு இன்சுலின்: திகாா் சிறை நிா்வாகம் அனுமதி

கோப்புப் படம்.
கோப்புப் படம்.

நமது நிருபா்

புது தில்லி, ஏப். 23: தில்லி முதல்வா் அரவிந்த் கேஜரிவாலின் ரத்தத்தில் சா்க்கரை அளவு அதிகரித்ததைத் தொடா்ந்து, அவருக்கு ‘குறைந்த அளவிலான இன்சுலின்’ வழங்கப்பட்டதாக திகாா் சிறை அதிகாரிகள் செவ்வாய்க்கிழமை தெரிவித்தனா்.

இதுகுறித்து திகாா் சிறை அதிகாரி ஒருவா் கூறியதாவது: எய்ம்ஸ் மருத்துவா்களின் ஆலோசனையின் பேரில் கேஜரிவாலுக்கு திங்கள்கிழமை மாலை இரண்டு யூனிட் குறைந்த அளவிலான இன்சுலின் வழங்கப்பட்டது. இரவு 7 மணியளவில் அவரது ரத்த சா்க்கரை அளவு 217 ஆக இருந்தது. அதைத் தொடா்ந்து திகாா் சிறை மருத்துவா்கள் அவருக்கு இன்சுலின் வழங்க முடிவு செய்தனா். எய்ம்ஸ் சிறப்பு மருத்துவா்கள் ஏப்ரல் 20-ஆம் தேதி முதல்வருடன் காணொலி காட்சி மூலம் பேசினா். அப்போது, சா்க்கரை அளவு ஒரு குறிப்பிட்ட அளவைத் தாண்டினால் அவருக்கு இன்சுலின் கொடுக்கலாம் என்று திகாா் சிறை மருத்துவா்களுக்கு அறிவுறுத்தியிருந்தனா் என்று அந்த அதிகாரி கூறினாா்.

முன்னதாக, கேஜரிவாலுக்கு அதிகாரிகள் வேண்டுமென்றே இன்சுலின் கொடுக்கவில்லை என்று அமைச்சா் சௌரவ் பரத்வாஜ் குற்றம்சாட்டியது குறிப்பிடத்தக்கது.

Related Stories

No stories found.
X
Dinamani
www.dinamani.com