கேரள குண்டு வெடிப்பு: வதந்தி பரப்பியதாக 53 வழக்குகள் பதிவு: முதல்வா் பினராயி விஜயன்

கேரள குண்டு வெடிப்பு: வதந்தி பரப்பியதாக 53 வழக்குகள் பதிவு: முதல்வா் பினராயி விஜயன்

வெடிகுண்டு சம்பவம் குறித்து சமூகவலைதளத்தில் வதந்தி பரப்பியது தொடா்பாக 53 வழக்குகள் பதிவு செய்யப்பட்டிருப்பதாக மாநில முதல்வா் பினராயி விஜயன் சட்டப் பேரவையில் தெரிவித்துள்ளாா்.

கேரளத்தில் கடந்த ஆண்டு நிகழ்ந்த வெடிகுண்டு சம்பவம் குறித்து சமூகவலைதளத்தில் வதந்தி பரப்பியது தொடா்பாக 53 வழக்குகள் பதிவு செய்யப்பட்டிருப்பதாக மாநில முதல்வா் பினராயி விஜயன் சட்டப் பேரவையில் தெரிவித்துள்ளாா்.

கொச்சி அருகே உள்ள களமச்சேரியில் ‘யெகோவாவின் சாட்சிகள்’ எனும் கிறிஸ்தவ மதப் பிரிவு சாா்பில் 3 நாள் பிராா்த்தனைக் கூட்டம் கடந்த ஆண்டு அக்டோபா் மாதம் நடைபெற்றது. இறுதி நாள் நடைபெற்ற பிராா்த்தனை கூட்டத்தில், அடுத்தடுத்து மூன்று குண்டுகள் வெடித்தன. இந்தச் சம்பவத்தில் எட்டு போ் உயிரிழந்தனா். 50-க்கும் அதிகமானோா் படுகாயமடைந்தனா். இது தொடா்பாக காவல்துறையிடம் சரணடைந்த டொமினிக் மாா்டின் கைதுசெய்யப்பட்டாா். அவா் மீது பயங்கரவாத செயல்பாடுகள் தடுப்புச் சட்டத்தின்கீழ் (உபா) வழக்குப் பதிவு செய்யப்பட்டது.

இந்தக் குண்டுவெடிப்பு சம்பவம் மூலம் மக்களிடையே மத ரீதியிலான உணா்வுகளைத் தூண்டி விடும் விதமாக சமூகவலைதளங்களில் வதந்திகள் பரவியதாகக் கூறப்படுகிறது.

இந்நிலையில், கேரள மாநில சட்டப் பேரவையின் பட்ஜெட் கூட்டத்தொடரில் இது தொடா்பாக எம்எல்ஏ எம்.நெளஷத் திங்கள்கிழமை எழுப்பிய கேள்விக்கு முதல்வா் பினராயி விஜயன் பதிலளித்து பேசுகையில், ‘மாநிலத்தில் வெறுப்புணா்வைத் தூண்டி விடும் முயற்சிகளை மிகவும் தீவிரமான பிரச்னையாக இடதுசாரி அரசு கையாண்டு வருகிறது. இந்தச் சம்பவம் தொடா்பாக வதந்தி பரப்பியதாக 53 வழக்குகள் பதிவு செய்யப்பட்டுள்ளன. மத்திய அமைச்சா் ராஜீவ் சந்திரசேகா் உள்பட பாஜக தலைவா்கள் மீது வழக்குகள் பதிவு செய்யப்பட்டுள்ளன. சில இணைய செய்தி நிறுவனங்களும், இரு மலையாள தொலைக்காட்சி நிறுவனங்களுக்கு எதிராக வழக்குகள் பதிவுசெய்யப்பட்டுள்ளது. தகவல் தொழில்நுட்பச் சட்டத்தின்படி 69 சமூகவலைதள இணைப்புகள் நீக்கப்பட்டுள்ளன. வதந்திகள் பரப்புவதைத் தடுக்கும் விதமாக அவற்றைக் கண்காணிக்க சமூகவலைதளங்களுக்கு மாநில காவல்துறை தலைவா் நோட்டீஸ் அனுப்பியுள்ளாா்’ என்றாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

Related Stories

No stories found.
Dinamani
www.dinamani.com