கோப்புப் படம்
கோப்புப் படம்

அகமதாபாத்: 16 பள்ளிகளுக்கு வெடிகுண்டு மிரட்டல் புரளி

குஜராத்தில் மக்களவைத் தோ்தலுக்கு முந்தைய நாளான திங்கள்கிழமையன்று அகமதாபாத் நகரிலுள்ள 16 பள்ளிகளுக்கு மின்னஞ்சல் மூலம் வெடிகுண்டு மிரட்டல் விடுக்கப்பட்டது.

குஜராத்தில் மக்களவைத் தோ்தலுக்கு முந்தைய நாளான திங்கள்கிழமையன்று அகமதாபாத் நகரிலுள்ள 16 பள்ளிகளுக்கு மின்னஞ்சல் மூலம் வெடிகுண்டு மிரட்டல் விடுக்கப்பட்டது. இதில் 11 பள்ளிகளில் மக்களவைத் தோ்தலுக்கான வாக்குச்சாவடி அமைக்கப்பட்டிருந்தன.

வெடிகுண்டு தடுப்புப் பிரிவு காவல்துறையினரின் சோதனைக்குப் பிறகு, அந்த மிரட்டல் புரளி என உறுதிப்படுத்தப்பட்டது.

மக்களவைத் தோ்தலின் 2 கட்டங்கள் ஏற்கெனவே நடந்து முடிந்துள்ள சூழலில், குஜராத்தின் 26 தொகுதிகளுக்கு 3-ஆம் கட்டமாக செவ்வாய்க்கிழமை (மே 7) வாக்குப்பதிவு நடைபெறகிறது.

இந்த நிலையில், அகமதாபாத் நகரில் வாக்குச்சாவடிகள் அமைந்த 11 பள்ளிகள் உள்பட 16 பள்ளிகளுக்கு திங்கள்கிழமையன்று மின்னஞ்சல் மூலம் வெடிகுண்டு மிரட்டல் விடுக்கப்பட்டது. காவல்துறையினா், வெடிகுண்டு தடுப்புப் பிரிவினா், பள்ளி வளாகங்களில் தீவிர சோதனையில் ஈடுபட்டதில் எதுவும் கண்டறியப்படவில்லை.

மக்களவைத் தோ்தல் சூழலில் வாக்காளா்களிடையே பதற்றத்தை ஏற்படுத்தும் நோக்கில் இத்தகைய போலி மிரட்டல் விடுக்கப்பட்டிருக்கலாம் என்று காவல்துறையினா் முடிவுக்கு வந்தனா். இந்த மிரட்டலைக் கருத்தில் கொள்ளாமல், மக்கள் அனைவரும் தவறாமல் வாக்களிக்க வேண்டும் என காவல்துறை அதிகாரிகள் கேட்டுக்கொண்டனா்.

இதுதொடா்பாக அகமதாபாத் நகர காவல்துறை துணை ஆணையா்(சைபா் குற்றப்பிரிவு) லவினா சின்ஹா கூறுகையில், ‘கடந்த சில நாள்களுக்கு முன்பு தில்லி பள்ளிகளுக்கு இதேபோன்ற வெடிகுண்டு மிரட்டல் மின்னஞ்சலில் அனுப்பப்பட்டது. வெளிநாட்டிலிருந்து வெளிநாட்டு மின்னஞ்சல் கொண்டு இந்த மிரட்டல் விடுக்கப்பட்டுள்ளது’ என்றாா். இதுகுறித்து காவல்துறையினா் வழக்குப்பதிவு செய்து விசாரித்து வருகின்றனா்.

X
Dinamani
www.dinamani.com