தோ்தல் ஆணைய உத்தரவு எதிரொலி: பாஜகவின் ‘எக்ஸ்’ பதிவு நீக்கம்

தோ்தல் ஆணைய உத்தரவு எதிரொலி: பாஜகவின் ‘எக்ஸ்’ பதிவு நீக்கம்

புது தில்லி, மே 8: முஸ்லிம்களுக்கு இடஒதுக்கீடு வழங்குவது குறித்து கா்நாடக பாஜக வெளியிட்ட சா்ச்சைக்குரிய ‘எக்ஸ்’ வலைதள பதிவை அந்த நிறுவனம் புதன்கிழமை நீக்கியது. முன்னதாக, அந்தப் பதிவை உடனடியாக நீக்குமாறு இந்திய தோ்தல் ஆணையம் செவ்வாய்க்கிழமை அறிவுறுத்தியது.

‘பழங்குடியினா், பட்டியலினத்தவா், ஓபிசி பிரிவினரிடமிருந்து இடஒதுக்கீட்டைப் பறித்து முஸ்லிம் சமூகத்தினருக்கு காங்கிரஸ் வழங்குகிறது. இதனை ராகுல் காந்தியும், கா்நாடக முதல்வா் சித்தராமைய்யாவும் முன்னின்று நடத்துகின்றனா்’ என்று சித்தரிக்கப்பட்ட விடியோ ஒன்று கா்நாடக பாஜகவின் எக்ஸ் சமூக ஊடகப் பக்கத்தில் வெளியானது.

இந்தப் பதிவு குறித்து நடவடிக்கை கோரி கா்நாடக மாநிலத் தலைமைத் தோ்தல் அதிகாரியிடம் காங்கிரஸ் புகாரளித்தது. பட்டியலினத்தவா் மற்றும் முஸ்லிம்கள் இடையே பகையை ஏற்படுத்தும் வகையில் பாஜகவின் பதிவு இருப்பதாக காங்கிரஸ் தனது புகாரில் கூறியிருந்தது.

அதன்படி, விடியோவை நீக்க கோரிய கா்நாடக தோ்தல் அதிகாரியின் உத்தரவை எக்ஸ் வலைதளம் செயல்படுத்தாமல் இருந்தது.

இதையடுத்து, எக்ஸ் வலைதளத்துக்கு தோ்தல் ஆணையம் செவ்வாய்க்கிழமை அறிவுறுத்தல் கடிதம் அனுப்பியது. அதில் சா்ச்சைக்குரிய பதிவை எக்ஸ் வலைதளத்திலிருந்து உடனடியாக நீக்க வேண்டும்’ என வலியுறுத்தப்பட்டது. இதையடுத்து ‘எக்ஸ்’ வலைதளம் அந்த பதிவை நீக்கிவிட்டது.

Related Stories

No stories found.
X
Dinamani
www.dinamani.com