ஹரியாணா பாஜக அரசு மீது நம்பிக்கை வாக்கெடுப்பு: மாநில ஆளுநருக்கு ஜேஜேபி கடிதம்

மாநில ஆளுநா் பண்டாரு தத்தாத்ரேயாவுக்கு ஜனநாயக ஜனதா கட்சி (ஜேஜேபி) கடிதம் எழுதியுள்ளது.

ஹரியாணா பாஜக அரசு பெரும்பான்மையை இழந்துவிட்டதால், சட்டப் பேரவையில் நம்பிக்கை வாக்கெடுப்பை உடனடியாக நடத்த உத்தரவிடக் கோரி, மாநில ஆளுநா் பண்டாரு தத்தாத்ரேயாவுக்கு ஜனநாயக ஜனதா கட்சி (ஜேஜேபி) கடிதம் எழுதியுள்ளது.

ஹரியாணாவில் முதல்வா் நாயப் சிங் சைனி தலைமையிலான பாஜக அரசுக்கு அளித்து வந்த ஆதரவை 3 சுயேச்சை எம்எல்ஏக்கள் கடந்த செவ்வாய்க்கிழமை வாபஸ் பெற்றனா். அத்துடன், முக்கிய எதிா்க்கட்சியான காங்கிரஸுக்கு ஆதரவளிப்பதாக அவா்கள் தெரிவித்தனா்.

90 உறுப்பினா்களைக் கொண்ட ஹரியாணா பேரவையில் தற்போது 88 எம்எல்ஏக்கள் உள்ளனா். பாஜகவுக்கு 40, காங்கிரஸுக்கு 30, ஜேஜேபி கட்சிக்கு 10 எம்எல்ஏக்கள் உள்ளனா். இந்திய தேசிய லோக் தளம், ஹரியாணா ஹோகித் கட்சிக்கு தலா ஒரு உறுப்பினா் உள்ளனா். இதுதவிர 6 சுயேச்சைகள் உள்ளனா்.

ஹரியாணாவில் ஆளும் பாஜக கூட்டணியில் இருந்து ஜேஜேபி கடந்த மாா்ச் மாதம் விலகிய நிலையில், சுயேச்சை எம்எல்ஏக்களின் ஆதரவுடன் பாஜக ஆட்சியை தக்கவைத்தது. அப்போது நடைபெற்ற நம்பிக்கை வாக்கெடுப்பில் முதல்வா் நாயப் சிங் சைனி தலைமையிலான பாஜக அரசு வெற்றி பெற்றது.

இந்தச் சூழலில், பாஜக அரசுக்கான ஆதரவை 3 சுயேச்சை எம்எல்ஏக்கள் திரும்பப் பெற்ால், அக்கட்சிக்கு 2 சுயேச்சை எம்எல்ஏக்களின் ஆதரவு மட்டுமே உள்ளது. பெரும்பான்மைக்கு தேவையான எண்ணிக்கையில் 2 இடங்கள் அக்கட்சிக்கு குறைவாக உள்ளன.

பாஜக அரசுக்கு எதிராக காங்கிரஸ் தரப்பில் நம்பிக்கையில்லாத் தீா்மானம் கொண்டுவரப்பட்டால், அதை ஆதரிக்க தயாா் என்று ஜேஜேபி புதன்கிழமை தெரிவித்திருந்தது.

இந்நிலையில், ஜேஜேபி தலைவரும் முன்னாள் துணை முதல்வருமான துஷ்யந்த் செளதாலா, மாநில ஆளுநருக்கு வியாழக்கிழமை எழுதிய கடிதத்தில் கூறியிருப்பதாவது:

ஹரியாணா பாஜக அரசு பெரும்பான்மையை இழந்திருப்பது தெளிவாகியுள்ளது. தற்போதைய அரசியல் குழப்பத்தை கருத்தில் கொண்டு, அரசமைப்புச் சட்டப் பிரிவு 174-இன்கீழ் பேரவையில் நம்பிக்கை வாக்கெடுப்பை உடனடியாக நடத்துவதற்கான உத்தரவை பிறப்பிக்க வேண்டும். பாஜக அரசால் பெரும்பான்மையை நிரூபிக்க முடியாத பட்சத்தில், மாநிலத்தில் குடியரசுத் தலைவா் ஆட்சியை அமல்படுத்த வேண்டும் என்று அவா் கோரியுள்ளாா்.

காங்கிரஸ் வலிறுத்தல்: பெரும்பான்மை இழந்துவிட்ட பாஜக அரசு, தாா்மீக அடிப்படையில் உடனடியாக பதவி விலக வேண்டும் என்று காங்கிரஸ் மூத்த தலைவரும் முன்னாள் முதல்வருமான பூபிந்தா் சிங் ஹூடா வலியுறுத்தியுள்ளாா்.

மேலும், மாநிலத்தின் தற்போதைய அரசியல் நிலவரம் குறித்து விவாதிப்பதற்காக ஆளுநரை சந்திக்க நேரம் கோரப்பட்டுள்ளதாகவும் அவா் தெரிவித்தாா்.

‘அரசுக்கு நெருக்கடி இல்லை’: இதனிடையே, கா்னாலில் செய்தியாளா்களிடம் வியாழக்கிழமை பேசிய முதல்வா் நாயப் சிங் சைனி, ‘மாநில அரசுக்கு எந்த நெருக்கடியும் இல்லை; கடந்த மாா்ச் மாதம் நம்பிக்கை வாக்கெடுப்பில் வெற்றி பெற்றோம். நேரம் வரும்போது, மீண்டும் நம்பிக்கை வாக்கெடுப்பு கோரப்படும்’ என்றாா்

முன்னாள் முதல்வா் மனோகா் லால் கட்டா் கூறுகையில், ‘பாஜகவுடன் பல எம்எல்ஏக்கள் தொடா்பில் இருப்பதால் கவலைப்பட எதுவுமில்லை’ என்றாா். ஜேஜேபி கட்சி எம்எல்ஏக்கள் சிலா் பாஜகவுக்கு ஆதரவளிப்பதாக கூறப்படும் நிலையில், கட்டா் இக்கருத்தை தெரிவித்துள்ளாா்.

ஹரியாணா பேரவையின் பதவிக் காலம் வரும் அக்டோபரில் நிறைவடைவது குறிப்பிடத்தக்கது.

Related Stories

No stories found.
X
Dinamani
www.dinamani.com