Enable Javscript for better performance
நிக்குமா? நிக்காதா? மௌலிவாக்கம் கட்டடத்தில் நிபுணர்கள் ஆய்வு: 18ல் இறுதி அறிக்கை- Dinamani

சுடச்சுட

    

    நிக்குமா? நிக்காதா? மௌலிவாக்கம் கட்டடத்தில் நிபுணர்கள் ஆய்வு: 18ல் இறுதி அறிக்கை

    By dn  |   Published on : 15th April 2016 02:23 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சென்னை : மௌலிவாக்கம் பகுதியில் இடிந்து விழுந்த கட்டடத்தின் அருகே ஆபத்தான நிலையில் உள்ள மற்றொரு கட்டடத்தின் உறுதித் தன்மை குறித்து, உச்ச நீதிமன்ற உத்தரவுப்படி மத்திய நிபுணர்கள் குழுவினர் ஆய்வு செய்தனர். இதன் இறுதி அறிக்கை வரும் 18ம் தேதி தாக்கல் செய்யப்பட உள்ளது.

    சென்னை, போரூரை அடுத்த மௌலிவாக்கத்தில் 'பிரைம் சிருஸ்டி' என்ற தனியார் கட்டுமான நிறுவனத்தால் 11 மாடிகள் கொண்ட இரண்டு அடுக்கு மாடிக் கட்டடங்கள் கட்டப்பட்டு வந்தது. இந்தப் பணியில் தமிழகம், ஆந்திர மாநிலங்களைச் சேர்ந்த கட்டுமானத் தொழிலாளர்கள் ஈடுபட்டு வந்தனர். கட்டடத்தின் கட்டுமானப் பணிகள் இறுதிக் கட்டத்தை எட்டியிருந்த நிலையில், கடந்த 2014-ஆம் ஆண்டு ஜூன் மாதம் 28-ஆம் தேதி திடீரென 11 மாடி கட்டடங்களில் ஒன்று இடிந்து விழுந்தது. இதில் கட்டட இடிபாடுகளில் சிக்கி 61 பேர் இறந்தனர்; 27 பேர் உயிருடன் மீட்கப்பட்டனர்.

     இந்த விபத்து தொடர்பாக கட்டட உரிமையாளர், கட்டட வடிவமைப்பாளர், பொறியாளர்கள் உள்ளிட்ட 9 பேரை போலீஸார் கைது செய்தனர். மேலும், இந்த விபத்து குறித்து ஓய்வுபெற்ற நீதிபதியான ரகுபதி தலைமையில் ஒரு நபர் விசாரணைக் குழுவை தமிழக அரசு அமைத்தது. விபத்து குறித்த அறிக்கையையும் பெற்றது.

     மேலும், இடிந்த கட்டடத்தின் அருகே உள்ள மற்றொரு கட்டடமும் இடிந்து விழக்கூடும் என்ற அச்சம் நிலவியதால், அப்பகுதி அபாயகரமான பகுதி என்று காஞ்சிபுரம் மாவட்ட நிர்வாகம் அறிவித்தது.

     மேலும், இடிந்த கட்டடத்தின் அருகே உள்ள 11 மாடிக் கட்டடத்தை இடிக்கலாம் என காஞ்சிபுரம் மாவட்ட ஆட்சியர் தமிழக அரசுக்கு பரிந்துரைத்தார். இதையடுத்து கட்டடத்தை இடிக்க தமிழக அரசு உத்தரவிட்டது.

     இந்நிலையில், கட்டடத்தின் உரிமையாளர் தொடர்ந்த வழக்கில் அந்தக் கட்டடத்தை இடிக்கக் கூடாது என சென்னை உயர் நீதிமன்றம் இடைக்காலத் தடை விதித்தது.

     இந்த இடைக்கால தடையை எதிர்த்து உச்ச நீதிமன்றத்தில் தமிழக அரசு மேல்முறையீடு செய்தது. அதையேற்று, அந்தக் கட்டடத்தின் உறுதித் தன்மை குறித்து வரும் 18-ஆம் தேதி அறிக்கை தாக்கல் செய்யுமாறு, நிபுணர்கள் குழுவுக்கு உச்ச நீதிமன்றம் உத்தரவிட்டது.

    இதையடுத்து கட்டடத்தின் உறுதித் தன்மையை ஆராய வழக்குரைஞர்கள் அசோக்குமார் குப்தா, ஐ.ஐ.டி. உதவி பேராசிரியர் சேஷாங், தேசிய கட்டடங்கள் கட்டுமானக் கழக பொது மேலாளர் எல்.பி.சிங் ஆகியோர் மௌலிவாக்கத்துக்கு வியாழக்கிழமை வந்தனர். அவர்கள் 11 மாடி கட்டடத்தை நேரில் ஆய்வு செய்தனர். கட்டடம் குறித்த இறுதி அறிக்கையை அவர்கள் வரும் 18ம் தேதி தாக்கல் செய்ய உள்ளனர்.

    இந்த அடுக்குமாடி குடியிருப்புக் கட்டடத்தில் வீடுகளை வாங்கியிருப்பவர்களின் தலையெழுத்தே அந்த அறிக்கையின் மூலம்தான் நிர்ணயிக்கப்பட உள்ளது என்பது குறிப்பிடத்தக்கது.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai