Enable Javscript for better performance
ISRO Chandrayaan-2 launch Live Updates | lift-off at 2.43 pm | Chandrayaan -2 mission Live launch- Dinamani

சுடச்சுட

    

    சந்திரயான்-2: உலக நாடுகள் மிகுந்த ஆர்வத்துடன் கவனித்து வருகின்றன - இஸ்ரோ தலைவர் சிவன்

    By DIN  |   Published on : 22nd July 2019 11:25 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    chandrayaan 2


    சென்னை: சந்திரயான்-1 நீர் மூலக்கூறு இருப்பதைக் கண்டறிந்தது போல் சந்திரயான்-2 விண்ணில் செலுத்தப்படுவதை உலக நாடுகள் மிகுந்த ஆர்வத்துடன் கவனித்து வருவதாக இஸ்ரோ தலைவர் சிவன் தெரிவித்தார்.

    கடந்த 15-ஆம் தேதி அதிகாலை 2.51 மணிக்கு விண்ணுக்கு அனுப்பப்பட இருந்த இந்த விண்கலம், ராக்கெட்டில் ஏற்பட்ட தொழில்நுட்பக் கோளாறு காரணமாக கடைசி 56 நிமிடங்கள் இருக்கும்போது கவுன்ட்-டவுன் நிறுத்தப்பட்டு ராக்கெட் ஏவுவது நிறுத்திவைக்கப்பட்டது. 

    தொழில்நுட்பக் கோளாறை விஞ்ஞானிகள் கண்டறிந்து சரிசெய்ததைத் தொடர்ந்து, மீண்டும் இன்று திங்கள்கிழமை பிற்பகல் 2.43 மணிக்கு விண்ணுக்கு அனுப்பப்படுகிறது.

    இதற்கான இறுதிக்கட்ட பணிகள் அனைத்தையும் முடித்துள்ள இஸ்ரோ விஞ்ஞானிகள், ராக்கெட் ஏவுவதற்கான கவுன்ட்-டவுனை நேற்று ஞாயிற்றுக்கிழமை இரவு தொடங்கினர்.

    இதுவரை எந்தவொரு உலக நாடும் அனுப்பாத நிலவின் தென்துருவப் பகுதிக்கு இந்தியாவின் சந்திரயான்-2 விண்கலம் ஆய்வுக்காக அனுப்பப்படுகிறது. 

    இந்நிலையில், சென்னை விமான நிலையத்தில் இஸ்ரோ தலைவர் சிவன் செய்தியாளர்களிடம் பேசுகையில், சந்திரயான்-2 விண்கலத்தை ஏவும் ஜிஎஸ்எல்வி-மார்க் 3 ராக்கெட்டில் ஏற்பட்ட கோளாறு சரிசெய்யப்பட்டுள்ளது. இனிமேல் தொழில்நுட்பக் கோளாறு நடப்பதற்கான சாத்தியமே இல்லை. சந்திரயான்- 2 விண்கலம் இன்று திங்கள்கிழமை வெற்றிகரமாக விண்ணில் ஏவப்படும்.  

    இதற்காக நேற்று ஞாயிற்றுக்கிழமை மாலை 6.43 மணிக்கு கவுன்ட்டவுன் தொடங்கி உள்ளது. விண்ணில் ஏவிய பிறகு 48 நாள் 15 கட்டங்களைக் கடந்து நிலவின் தென்துருவத்தில் சந்திரயான்-2 இறங்கும். சந்திரயான்-1 நீர் மூலக்கூறு இருப்பதைக் கண்டறிந்தது போல் சந்திரயான்-2 விண்ணில் செலுத்தப்படுவதை உலக நாடுகள் மிகுந்த ஆர்வத்துடன் கவனித்து வருகின்றன என்றார்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai