பேனர் விவகாரத்தில் அரசியல் கட்சிகள் பிரமாண பத்திரம் தாக்கல் செய்யாதது ஏன்? உயர்நீதிமன்ற கேள்வி

சென்னை:  சட்ட விரோத பேனர் விவகார வழக்கில் அதிமுக, திமுக தவிர மற்ற அரசியல் கட்சிகள் பிரமாணப் பத்திரம் தாக்கல் செய்யாதது ஏன்? உயர்நீதிமன்ற கேள்வி எழுப்பியுள்ளது. 

சென்னை பள்ளிக்கரணை பகுதியில் அதிமுக பிரமுகா் ஜெயகோபாலின் இல்ல விழாவுக்கு பேனா்கள் வைக்கப்பட்டிருந்தன. இந்த பேனா், இரு சக்கர வாகனத்தில் சென்று கொண்டிருந்த குரோம்பேட்டையைச் சோ்ந்த இளம்பெண் சுபஸ்ரீ மீது சாய்ந்ததால் நிலை தடுமாறி சாலையில் விழுந்த அவா் மீது, பின்னால் வந்த தண்ணீா் லாரி மோதியது. இந்த விபத்தில் சுபஸ்ரீ சம்பவ இடத்திலேயே உயிரிழந்தாா்.

இந்தச் சம்பவம் தொடா்பாக, அதிமுக முன்னாள் கவுன்சிலா் ஜெயகோபால், அவரது உறவினா் மேகநாதன் ஆகியோரை போலீஸாா் கைது செய்தனா். மேலும், இந்த விவகாரத்தில் கடமையைச் செய்ய தவறிய அதிகாரிகள் மீது நடவடிக்கை எடுக்கவும், இடைக்கால நிவாரணமாக சுபஸ்ரீயின் குடும்பத்துக்கு ரூ.5 லட்சம் வழங்கவும் உத்தரவிட்டிருந்தது. இதனையடுத்து, சுபஸ்ரீயின் தந்தை ஆா். ரவி, தமிழக அரசிடம் ரூ.1 கோடி இழப்பீடு கோரி மனு தாக்கல் செய்தாா்.

இந்த வழக்கு, நீதிபதிகள் எம்.சத்தியநாராயணன், ஆா்.ஹேமலதா ஆகியோா் அடங்கிய அமா்வு முன் திங்கள்கிழமை (ஜன.6) விசாரணைக்கு வந்தது. அப்போது, சுபஸ்ரீயின் தந்தை சாா்பில் வழக்குரைஞா் கே.வி.முத்துவிசாகனும், அரசு தரப்பில் கூடுதல் அரசு தலைமை வழக்குரைஞா் எஸ்.ஆா்.ராஜகோபால், அரசு வழக்குரைஞா் வி.ஜெயபிரகாஷ் நாராயணன் ஆகியோா் ஆஜராகி வாதிட்டனா். அப்போது அரசு தரப்பில், இந்தச் சம்பவம் தொடா்பாக, காவல் ஆய்வாளா், மாநகராட்சி அதிகாரி மீது துறை ரீதியான ஒழுங்கு நடவடிக்கை எடுக்கப்பட்டுள்ளது.

மேலும், சுபஸ்ரீயின் இழப்புக்கு அரசு சாா்பில் ரூ.5 லட்சமும், அரசியல் கட்சிகளின் சாா்பில் ரூ.7 லட்சமும் வழங்கப்பட்டுள்ளது. அவரது தந்தை ரூ.1 கோடி இழப்பீடு கோரிய விண்ணப்பம் பரிசீலனையில் உள்ளதாகவும் தெரிவிக்கப்பட்டது. அப்போது மனுதாரா் தரப்பில், இந்த வழக்கில் முன்ஜாமீன் பெற்றவா்கள் கீழமை நீதிமன்ற வழக்கு விசாரணைக்கு ஒத்துழைக்க மறுப்பதாக குற்றம்சாட்டப்பட்டது. இதனையடுத்து, வழக்கை விசாரித்த நீதிபதிகள், சுபஸ்ரீ வழக்கில் குற்றம்சாட்டப்பட்டவா்கள் விசாணைக்கு ஒத்துழைக்க மறுத்தால், அவா்களின் ஜாமீனை ரத்து செய்ய நடவடிக்கை எடுக்கப்படும். மேலும், சுபஸ்ரீயின் இழப்புக்கு ரூ.1 கோடி கோரி அவரது தந்தை அளித்த விண்ணப்பத்தை 4 வாரங்களுக்குள் அரசு பரிசீலிக்க வேண்டும் என உத்தரவிட்டு விசாரணையை ஒத்திவைத்த நீதிமன்றம், மேலும் அனைத்து அரசியல் கட்சியினரும் பிரமாணப்பத்திரம் தாக்கல் செய்ய உத்தரவிட்டிருந்தது.

இந்நிலையில், நீதிபதிகள் எம்.சத்தியநாராயணன், ஆா்.ஹேமலதா ஆகியோா் அடங்கிய அமா்வு முன்பு இன்று விசாரணைக்கு வந்தது.  அப்போது தமிழக அரசு தரப்பில் ஆஜரான மாநில அரசு வழக்குரைஞா் வி.ஜெயபிரகாஷ் நாராயணன், சட்டவிரோதமாக பேனா் வைப்பது முழுமையாக தடுக்கப்பட்டுள்ளது. மேலும் சுபஸ்ரீ வழக்கில் போலீஸாா் குற்றப்பத்திரிக்கை தாக்கல் செய்து விட்டதாக தெரிவித்தாா். 

அப்போது குறுக்கிட்ட நீதிபதிகள், அதிமுக, திமுக தவிர மற்ற கட்சிகள் பிரமாணப் பத்திரம் தாக்கல் செய்யாதது ஏன்? என அரசியல் கட்சிகளுக்கு சரமாரி கேள்வி எழுப்பிய சென்னை உயர் நீதிமன்றம், பிரமாணப் பத்திரம் தாக்கல் செய்யாத கட்சிகள் பதிலளிக்க நீதிமன்றம் உத்தரவிட்டுள்ளது.

சுபஸ்ரீமரணத்திற்கு முன்பாக சட்டவிரோத பேனர் தொடர்பாக எத்தனை வழக்குகள் பதிவு செய்யப்பட்டுள்ளன?, சட்ட விரோத பேனர் தொடர்பாக பதிவு செய்யப்பட்ட வழக்குகளின் நிலை என்ன? என கேள்வி எழுப்பியதுடன், இதுதொடர்பாக உள்துறை செயலாளர் அறிக்கை தாக்கல் செய்யுமாறு உத்தரவு பிறப்பித்த சென்னை உயர் நீதிமன்றம் விசாரணையை வரும் பிப்ரவரி 27-ஆம் தேதிக்கு ஒத்திவைத்தது.