திருப்பூரில் இறந்த முதியவரின் சடலத்தை அப்புறப்படுத்துவதில் அரசு மருத்துவக்கல்லூரி நிர்வாகம் அலட்சியம் காட்டியதாகப் புகார் எழுந்துள்ளது.
திருப்பூர் அரசு மருத்துவக் கல்லூரி வளாகத்தில் இருந்த அம்மா உணவகத்துக்கு சுமார் 70 வயது மதிக்கத்தக்க முதியவர் ஒருவர் வியாழக்கிழமை பிற்பகல் 12.30 மணி அளவில் வந்துள்ளார். இதன் பிறகு உணவு அருந்தி விட்டு வெளியே வந்த முதியவர் அரசு மருத்துவக் கல்லூரி வளாகத்திலேயே மயங்கி விழுந்துள்ளார். அப்போது அங்கு பணியில் இருந்த காவல் துறையினர் அவரது முகத்தில் தண்ணீர் தெளித்துள்ளனர்.
மேலும், இதுகுறித்து அரசு மருத்துவக் கல்லூரி அவரச சிகிச்சைப் பிரிவுக்கும் வியாழக்கிழமை பிற்பகல் 1 மணி அளவில் தகவல் தெரிவித்துள்ளனர். இதற்கிடையே மயங்கிய நிலையில் இருந்த முதியவர் வாயில் நுரை தள்ளி பரிதாபமாக உயிரிழந்தார். இதுகுறித்து அந்த வழியாகச் சென்றவர்களும் அரசு மருத்துவக்கல்லூரி மருத்துவர்களுக்குத் தகவல் தெரிவித்துள்ளனர்.
ஆனால் அதன் பிறகும் அரசு மருத்துவமனை மருத்துவர்கள், ஊழியர்கள் முதியவரின் சடலத்தை அப்புறப்படுத்தாமல் காலம் தாழ்த்தி வந்துள்ளனர். இதையடுத்து, ஒரு வழியாக 4 மணி நேரத்துக்குப் பின்னர் வியாழக்கிழமை பிற்பகல் 5 மணி அளவில் முதியவரின் சடலத்தை பிரேதப் பரிசோதனைக்காக மருத்துவக்கல்லூரி ஊழியர்கள் எடுத்துச் சென்றனர்.
திருப்பூர் அரசு மருத்துவக் கல்லூரி வளாகத்திலேயே மயங்கி விழுந்து உயிரிழந்த முதியவரின் சடலத்தை அப்புறப்படுத்துவதில் ஊழியர்கள் அலட்சியம் காட்டியதாக சமூக ஆர்வலர்கள் வேதனை தெரிவித்துள்ளனர். இதுகுறித்து திருப்பூர் மாவட்ட ஆட்சியர் க. விஜய கார்த்திகேயன் இடம் செய்தியாளர்கள் கேட்டபோது, விசாரணை நடத்தி உரிய நடவடிக்கை எடுக்கப்படும் என்றார்.