எலுமிச்சை சில துளி தேவைப்படும்போது முழுப் பழத்தையும் அரிந்து வீணாக்காமல் சிறிய துளையிட்டுத் தேவையான அளவு சாறுபிழிந்து கொள்ளலாம்.
காபி மேக்கரைத் கழுவும் போது நீருடன் எலுமிச்சைச்சாறு அல்லது வினிகரை விட்டு பின்பு ஸ்விட்சை ஆன் செய்யுங்கள் போதும். படுசுத்தமாகிவிடும்.
கண்ணாடிப் பாத்திரங்களின் அடியில் கறைகள் இருந்தால் சில சொட்டு எலுமிச்சம் பழச்சாறு, சிறிதளவு தண்ணீர் கலந்து குலுக்கினால் கறைகள் நீங்கிவிடும்.
தோசைக் கல், வாணலி இவைகளில் எண்ணெய் பிசுபிசுவென்று பிடித்திருக்கும். சூட்டுடன் இருக்கும் போதே சிறிது எலுமிச்சைச்சாறு விட்டு தேங்காய் நாரினால் அழுத்தித் தேய்த்துக் கழுவினால் பிசுபிசுப்பு சட்டெனப் போய்விடும்.
- ஆர்.ராமலட்சுமி, திருநெல்வேலி.
தோலால் செய்யப்பட்ட சூட்கேஸை உபயோகிக்காமல் வைத்திருந்தால் அதனுள்ளே பூச்சி வரும். உபயோகமில்லாத சூட்கேஸில் ஒரு சோப்புத் துண்டை போட்டு வைக்கவும். பூச்சி வராது. நாற்றமும் வராது.
ரப்பர் பேண்ட் வைத்திருக்கும் டப்பாவில் சிறிது டால்கம் பவுடரைத் தூவி வைத்தால் அவை ஒன்றொடொன்று ஒட்டிக் கொள்ளாது.
மிளகாய்த் தூள், கோதுமை மாவு போன்றவை மிஷினில் அரைத்தவுடன் சூடாக இருக்கும். இதனால் வீட்டிற்கு வந்ததும் காகிதத்தில் கொட்டிப் பரப்பி ஆறச் செய்து, பிறகு, டப்பாவில் நிரப்பி வைக்க வேண்டும்.
சமையல் செய்யும் போது மேலே எண்ணெய் தெறித்து சுட்டுவிட்டால், அந்த இடத்தில் உருளைக் கிழங்கை அரைத்துப் பூசினால் எரியாது, கொப்பளிக்காது.
புது துடைப்பம் வாங்கியதும், அதை உப்பு கலந்த நீரில் சிறிது நேரம் ஊற வைத்து விட்டுப் பின் உலர வைத்துப் பயன்படுத்தினால் நீண்ட நாள் பயன்படுத்தலாம்.
- அமுதா சரவணன், அம்பத்தூர்.
வாழை இலையைப் பின்பக்கம் தணலில் சிறிது காட்டி, பிறகு பார்சலில் கட்டினால் கிழியாது.
கீரையை மசிக்கும் போது அதனுடன் உருளைக் கிழங்கு ஒன்றை தோல் சீவி, சிறு துண்டுகளாக வேக விட்டு மசித்தால் ருசியாக இருக்கும்.
ரவா லட்டு பிடிக்கும்போது சிறிது ரோஸ் எஸன்ஸ் விட்டுச் செய்தால் மணமும் சுவையும் கூடும்.
தோசை சூடும்போது கல்லில் மாவை ஊற்றி விட்டு, மேல் பகுதியில் தேங்காயைத் துருவி தூவினால் தோசை சூப்பராக இருக்கும்.
பிரட்டில் தடவ ஜாம் இல்லாவிட்டால், நெய் தடவி, அதன் மீது கொஞ்சம் தேனைத் தடவினால் சூப்பராக இருக்கும்.
கொஞ்சம் அரிசி, கொஞ்சம் உளுந்தை மெஷினில் கொடுத்து மாவாக அரைத்து வைத்துக் கொண்டால், திடீர் என்று விருந்தினர் வந்து விட்டால் அதைக் கரைத்து திடீர் தோசை சுட்டு அசத்தலாம்.
பழைய சாதத்தை வெள்ளைத் துணியில் கட்டி, இட்லி தட்டில் வைத்து சூடு படுத்தினால் சாதம் உதிர் உதிராக புதிதாக வடித்த சாதம் போல் இருக்கும்.
வெண்டைக்காயை வதக்கும் போது சிறிது எலுமிச்சைச்சாறு விட்டு வதக்கினால் மொறு மொறுப்புடன் இருக்கும்.