குழந்தைகளை ஆரோக்கியமான உணவை எடுத்துக்கொள்ள வைப்பது பெற்றோர்களுக்கு மிகப்பெரும் வேலையாக இருக்கிறது. துரித உணவுகள், நொறுக்குத் தீனிகளை விரும்பி சாப்பிடும் குழந்தைகள் ஆரோக்கியமான உணவுகளை எடுத்துக்கொள்ள அடம்பிடிக்கின்றனர்.
இந்நிலையில், குழந்தைகளே ஆரோக்கியமான உணவுகளை தேர்வு செய்து சாப்பிட வேண்டுமெனில், உணவைத் தேர்வு செய்யும் வேலையை அவர்களிடமே விட்டுவிட வேண்டும் என்றும் உங்கள் குழந்தையின் விருப்பத்தை ஏற்றுக்கொள்வது அவர்களது உடல்நலத்திற்கு நன்மை பயக்கும் என்றும் ஆய்வாளர்கள் கூறுகின்றனர்.
கனடாவின் ஆல்பர்ட்டா பல்கலைக்கழகத்தைச் சேர்ந்த ஆராய்ச்சியாளர்கள் மேற்கொண்ட இதுதொடர்பான ஆய்வின் முடிவுகள் அப்பீடைட் என்ற இதழில் வெளியிடப்பட்டுள்ளன. இதில் பெற்றோர்கள் தேர்வு செய்து கொடுத்த உணவுகளில் குழந்தைகள் எதனைத் தேர்வு செய்கின்றனர் என்பதை அடிப்படையாக வைத்து ஆய்வு செய்யப்பட்டுள்ளது. மேலும், சூழ்நிலைகளைப் பொறுத்தும், உடல்நிலையைப் பொறுத்தும் குழந்தைகள் உணவைத் தேர்வு செய்கின்றனர்.
அதே நேரத்தில் கட்டாயப்படுத்தி ஒரு உணவை குழந்தை சாப்பிடும்போது, அதனை விருப்பமில்லாமலே குழந்தை சாப்பிடுவதால் அந்த நேரத்தில் குழந்தையின் மனநிலை மோசமானதாக இருக்கும். சிறிது காலம் உணவுத் தேர்வை குழந்தைகளின் விருப்பத்திற்கே விட்டுவிட்டால், அவர்கள் சில ஆண்டுகளில் ஆரோக்கியமான உணவைத் தேர்வு செய்வார்கள் என்று கூறப்படுகிறது.
அதேபோன்று பெற்றோர்கள் குழந்தைகளுடன் அமர்ந்து ஆரோக்கியமான உணவுகளை உண்ண வேண்டும். அவ்வாறு நீங்கள் செய்யும்பட்சத்தில் குழந்தைகளும் அதைப்பார்த்து ஆரோக்கியமான உணவுகளைத் தேர்வு செய்யும். குழந்தைகளின் மனநிலைக்கு ஏற்ப இவ்வாறான எளிய முறைகளை கையாள வேண்டும் என்றும் ஆய்வாளர்கள் அறிவுறுத்துகின்றனர்.