சுறுசுறுப்பு குறைவாக உள்ள குழந்தைகளுக்கு எதிர்காலத்தில் உடல் பருமன் ஏற்படும் வாய்ப்பு அதிகம் என்று ஆய்வில் தெரிய வந்துள்ளது.
ஒருவரது உயரத்துக்கு ஏற்ற இயல்பான எடை(பி.எம்.ஐ) இல்லாமல் இருந்தால் அவருக்கு உடல் பருமன் பிரச்னை உள்ளதாகக் கருதப்படுகிறது. வழக்கமாக உடல் பருமன் அதிகம் உள்ளவா்களுக்கு சுவாசக் கோளாறு, இதயக் கோளாறுகள், ரத்த அழுத்தம், சா்க்கரை நோய், மூட்டு வலி, சில வகை புற்றுநோய்கள் உள்ளிட்ட பாதிப்புகள் ஏற்பட வாய்ப்புள்ளதாக மருத்துவர்கள் கூறுகின்றனர்.
இந்நிலையில், உடல் பருமனானது சிறு குழந்தைகளையும் விட்டுவைப்பதில்லை. அதற்கு தொழில்நுட்ப வளர்ச்சியினால் குழந்தைகளில் உடல் இயக்க செயல்பாடு இல்லாமை, உணவு பழக்கவழக்கங்கள் உள்ளிட்ட காரணங்கள் கூறப்படுகின்றன.
இந்த நிலையில், ஒரு குழந்தை பிறந்த 12 மாதங்களிலேயே அந்த குழந்தைக்கு பிற்காலத்தில் உடல் பருமன் ஏற்படுமா என்பதை தெரிந்துகொள்ளலாம் என ஆராய்ச்சியாளர்கள் கூறுகின்றனர்.
குழந்தைப் பருவத்தில் சுறுசுறுப்பு இல்லாத குழந்தைகள் குறித்து மேற்கொள்ளப்பட்ட ஒரு ஆய்வில் 3, 6, 9 மற்றும் 12 மாத வயது கொண்ட 506 குழந்தைகள் ஆய்வுக்கு உட்படுத்தப்பட்டனர். சராசரியான கால அளவில் குழந்தைகளின் சுறுசுறுப்பு குறித்து கண்காணிக்கப்பட்டது. குழந்தைகளின் உடல் செயல்பாட்டை கண்காணிக்க ஒரு கருவியும் பொருத்தப்பட்டது. முடிவில், அதிக உடல் அசைவைக் கொண்ட குழந்தைகள் எதிர்காலத்திலும் மிகவும் சுறுசுறுப்பாக இருக்கும், எனவே அவர்களுக்கு உடல் பருமன் ஏற்படும் வாய்ப்பு மிகவும் குறைவு என்று ஆய்வில் தெரிவிக்கப்பட்டுள்ளது.
அதே நேரத்தில் சுறுசுறுப்பு குறைந்த குழந்தைகள் எதிர்காலத்தில் உடல் பருமன் நோயால் பாதிக்கப்படும் என்றும் சிறு வயது முதலே உடலில் கொழுப்பு சேர்வதால் எளிதாக உடல் பருமன் நோய் அவர்களைத் தாக்கும் என்றும் அமெரிக்காவின் ஜான்ஸ் ஹாப்கின்ஸ் பல்கலைக்கழகத்தைச் சேர்ந்த ஆராய்ச்சியாளர் சாரா பெஞ்சமின்-நீலன் கூறியுள்ளார். இந்த ஆய்வு குழந்தைகளின் வளர்ச்சி மற்றும் உடல் பருமன் குறித்த முக்கியமான ஆய்வு என்று அமெரிக்க ஆராய்ச்சியாளர்களால் கூறப்படுகிறது.
மேலும், 'குழந்தைகள் தவழ்ந்து செல்வத்தையும், நகர்வதையும் எந்த சாதனத்தின் மூலமும் கட்டுப்படுத்தாதீர்கள்; குழந்தைகள் சிறுவயது முதலே சுறுசுறுப்பாக இருக்க உதவ வேண்டும்' என்று பெற்றோர்களுக்கு வலியுறுத்தப்பட்டுள்ளது.